Niezvyčajnyja jahadnyja banany źjavilisia ŭ biełaruskich kramach. Ad zvyčajnych jany adroźnivajucca skurkaj čyrvonaha koleru i smakam, piša «Anłajnier».
Hetyja čyrvonyja banany pradajucca ŭ «Jeŭraopcie» na praśpiekcie Dziaržynskaha, 3B. Ich pryvieźli z Ekvadora, cana za kiłahram — 10,99 rubla, što amal udvaja daražej za zvyčajnyja. Adzin banan z takoj źviazki budzie kaštavać kala 1,5 rubla.
Tekstura čyrvonaha banana bolš śmietankovaja i kremavaja, čym u zvyčajnaha, u smaku adčuvajucca jahadnyja noty. Heta značyć, adroźnieńni ad kłasičnaj sadaviny jość, ale nie kardynalnyja.
Vydańnie Telegraf.news, u svaju čarhu, tłumačyć, što čyrvonyja banany — heta nie pradukt hiennaj inžynieryi ci markietynhavych ekśpierymientaŭ. Nasamreč heta cełaja hrupa pryrodnych sartoŭ, jakaja isnuje ŭ pryrodzie sotni hadoŭ.
Usie sučasnyja banany pachodziać ad dvuch dzikich vidaŭ: Musa acuminata i Musa balbisiana. Čyrvonyja banany jak raz adnosiacca da Musa acuminata. Jany mienš raspaŭsiudžanyja ŭ kramach, bo saśpiavajuć nieraŭnamierna i patrabujuć bolš aščadnaha abychodžańnia. Tamu i ličacca «niazručnymi» dla masavaha ekspartu.
Darečy, śpiejuć čyrvonyja banany daŭžej. I moža tak zdarycca, što vy kupili ich jašče ćviordymi. U takim vypadku lepš pakłaści banany daśpiavać pry pakajovaj tempieratury. Tamu što saśpieły čyrvony banan pavinien być źlohku miakkim pry naciskańni, a jahonaja skurka moža stać navat amal karyčnievaj. Mienavita ŭ takim stanie jon maksimalna smačny.
U čyrvonych bananach u 3—5 razoŭ bolš beta-karatynu, jaki arhanizm pieratvaraje ŭ vitamin A, krytyčna važny dla zdaroŭja vačej i mocnaha imunitetu. Mienavita jon adkazvaje za aranžava-ružovy koler miakaci. Taksama ŭ ich bolš vitaminu S — na 15—20%.
Taksama ŭ čyrvonych bananaŭ hlikiemičny indeks časta krychu nižejšy (kala 45—50 suprać 55—60 u žoŭtych), bo ŭ ich bolš ustojlivaha kruchmału, jaki rasščaplajecca pavolniej.
Kamientary