Bałharyja abvinavaciła śpiecsłužby Rasii ŭ sprobach napoŭnić Jeŭropu mihrantami

Pavodle słoŭ Mitava, va ŭrada Bałharyi jość dokazy pramoha supracoŭnictva SVR sa złačynnymi hrupoŭkami, jakija zajmajucca kantrabandaj ludziej u ES, pierakazvaje «Ahienctva». 

Ahienty rasijskaj raźviedki, jak śćviardžaje kiraŭnik MUS Bałharyi, dapamahajuć kantrabandystam vyjaŭlać uraźlivyja ŭčastki źniešnich miež ES, uklučajučy bałharska-tureckuju miažu, a taksama infarmujuć mihrantaŭ pra sposaby vykarystańnia pracedur pradastaŭleńnia prytułku ŭ ES i Vialikabrytanii i pra toje, jak paźbiehnuć departacyi.

Mitaŭ nazvaŭ nielehalnuju mihracyju «instrumientam destabilizacyi Jeŭrapiejskaha sajuza i Vialikabrytanii», jaki vykarystoŭvajuć «varožyja režymy». «Ich meta — padarvać sacyjalnyja sistemy. Akramia taho, praź mihracyju ludziej z radykalnymi pohladami jany stvarajuć dla nas pahrozy biaśpiecy», — skazaŭ kiraŭnik MUS Bałharyi.

Kiraŭnik MZS Vialikabrytanii Iviet Kupier paviedamiła, što zajavy Mitava demanstrujuć pahrozy, «jakija zychodziać ad varožych dziaržaŭ, takich jak Rasija».

«Nielehalnaja mihracyja ŭ Jeŭropu i za jaje miežy vyklikana nie tolki dziejnaściu arhanizavanych złačynnych sietak, jakija imknucca atrymać prybytak, ale i dziejańniami niedružalubnych dziaržaŭ, jakija imknucca destabilizavać Jeŭropu», — skazała Kupier.

Kupier zajaviła pra nieabchodnaść «pašyrać i ŭmacoŭvać mižnarodnaje supracoŭnictva, kab supraćstajać supolna» hetaj pahrozie. «My praciahniem padtrymlivać Bałharyju i inšych sajuźnikaŭ pa NATA ŭ zabieśpiačeńni biaśpieki źniešnich miež Jeŭropy i ŭ procidziejańni ŭsim vidam pahroz, jakija zychodziać ad režymu Pucina. U tym liku — padajučy śpiecyjalizavanaje abstalavańnie, raźvieddanyja i padrychtoŭku», — skazała Kupier.

Bałharskija ŭłady taksama abvinavacili ŭ sadziejničańni niezakonnaj mihracyi dźvie niaŭradavyja arhanizacyi — No Name Kitchen, jakaja dziejničaje na mihracyjnych maršrutach praz Bałkany, Mižziemnamorje i rehijon Sachiela i vystupaje «ŭ abaronu svabody pieramiaščeńnia», a taksama bałharskuju dabračynnuju arhanizacyju Mission Wings, asnoŭnaj dziejnaściu jakoj źjaŭlajecca abarona dziaciej.

Mitaŭ nazvaŭ hetyja arhanizacyi «nieamarksisckimi hrupami, jakija sprabujuć apraŭdać svaje dziejańni fiłasofskimi abo ideałahičnymi pabudovami». «My sutykajemsia z prablemami, źviazanymi z takimi NDA, jakija, mahčyma, nienaŭmysna ŭdzielničajuć u apieracyjach varožych dziaržaŭ i złačynnych sietak», — dadaŭ Mitaŭ.

Abiedźvie arhanizacyi adchilili abvinavačvańni Mitava. U dačynieńni da šerahu asob, źviazanych z hetymi NDA, viaducca rasśledavańni, piša The Times.

U studzieni Bałharyja dałučyłasia da šenhienskaj zony ES. Heta aznačaje, što 260‑kiłamietrovaja miaža Bałharyi z Turcyjaj stała paŭdniova-ŭschodniaj źniešniaj miažoj błoka.

U 2023 hodzie Finlandyja całkam zakryła suchaputnuju miažu z Rasijaj paśla taho, jak jaje pačali masava pierasiakać mihranty. Da hetaha ŭ 2021 hodzie padobny kryzis zdaryŭsia na miažy Biełarusi i Polščy.

U abodvuch vypadkach žurnalisckija rasśledavańni pakazali, što kryzisam papiaredničali infarmacyjnyja kampanii pa rekłamie pajezdak u Biełaruś i Rasiju jak lohkich maršrutaŭ dla praniknieńnia ŭ Jeŭropu.

• 0
• 0
• 0
• 0
• 0
• 0
• 0
• 0