U Irłandyi zahinuŭ 17‑hadovy ŭkrainiec Vadzim. Jaho zabiŭ padletak-uciakač z Samali

Jak paviedamlaje The Irish Times, incydent adbyŭsia ŭ sieradu, 15 kastryčnika, kala 11 hadzin ranicy, u žyłym kompleksie ŭ rajonie Donahmid (Donaghmede) na poŭnačy Dublina ŭ kvatery, jakaja vykarystoŭvałasia jak časovaje žytło dla niepaŭnaletnich, što pryjechali ŭ Irłandyju biez supravadžeńnia darosłych. Hety centr znachodziŭsia pad apiekaj irłandskaha ahienctva pa spravach dziaciej i siamji Tusla, ale jaho absłuhoŭvańniem zajmaŭsia pryvatny padradčyk.

Pavodle źviestak Daily Mail, napad byŭ nadzvyčaj žorstkim. Vadzim Davydzienka atrymaŭ šmatlikija ranieńni ŭ hałavu, vočy i hrudzi, naniesienyja kuchonnym nažom. Traŭmy byli nastolki surjoznymi, što, niahledziačy na namahańni miedykaŭ jon pamior na miescy zdareńnia.

Paviedamlajecca, što Vadzim pryjechaŭ u Irłandyju ŭsiaho za čatyry dni da śmierci. Krynica, blizkaja da chłopca, raskazała, što jon cikaviŭsia sportam i IT, chacieŭ vyvučycca na śpiecyjalista na kibierbiaśpiecy, kab vajavać na pieradavoj u kibierpadraździaleńni.

«Jon prapuściŭ svoj rejs z Polščy ŭ Irłandyju, i jaho siamja nastojvała na tym, kab jon viarnuŭsia dadomu, ale Vadzim nastajaŭ na svaim padarožžy», — cytujuć ŚMI siabra siamji.

Kvatera ŭ Donahmidzie, dzie adbyłasia trahiedyja, była pryznačanaja dla čatyroch padletkaŭ, jakija prybyli ŭ Irłandyju biez supravadžeńnia darosłych (Separated Children Seeking International Protection, SCSIPs). Jany byli z troch roznych krain.

Akramia Vadzima, paciarpieli jašče dva čałavieki. Padazravany ŭ napadzie padletak z Samali taksama atrymaŭ traŭmy i byŭ dastaŭleny ŭ balnicu. Taksama paciarpieła žančyna, sacyjalnaja rabotnica, jakaja sprabavała spynić bojku. Dvum inšym padletkam, jakija znachodzilisia ŭ kvatery, udałosia ŭciačy. Paźniej ich razam z paciarpiełaj supracoŭnicaj pierasialili ŭ inšaje žyllo.

Pavialičyć

Jak paviedamlajecca, trahiedyja adbyłasia na fonie rostu kolkaści niepaŭnaletnich uciekačoŭ u Irłandyi. Pavodle źviestak Kamiteta pa justycyi Irłandyi, na jakija spasyłajecca Daily Mail, najbolšaja kolkaść padletkaŭ biez supravadžeńnia prybyvaje ŭ Irłandyju z Ukrainy, zatym iduć Samali i Afhanistan.

Ahienctva Tusla maje miescy dla 400 dziaciej u stacyjanarnych žyłych centrach. Adnak jašče kala 150 niepaŭnaletnich, uklučajučy tych, chto žyŭ u Donahmidzie, raźmiaščajucca ŭ arandavanaj nieruchomaści. Heta tak zvanaje ekstrannaje raźmiaščeńnie pa śpiecyjalnaj damoŭlenaści.

Užyvańnie takoha časovaha ekstrannaha žylla dla ŭraźlivych dziaciej vyklikaje surjoznuju krytyku. Hałoŭny arhumient — jano absłuhoŭvajecca pryvatnymi pastaŭščykami i nie inśpiektujecca adpaviednymi orhanami.

U Irłandyi za pravierku i inśpiekcyju bolšaści sacyjalnych i dziciačych žyłych centraŭ adkazvaje śpiecyjalnaje Upraŭleńnie pa infarmacyi i jakaści achovy zdaroŭja (HIQA). Adnak, jak adznačyła ŭ intervju Daily Mail pradstaŭnica HIGA, ekstrannaje raźmiaščeńnie nie ŭvachodzić u ich kampietencyju. 

Pa ironii losu, Vadzim pavinien byŭ nieŭzabavie pierajechać u inšaje žyllo, śpiecyjalna pryznačanaje dla ŭkraincaŭ.

Krynica ŭ palicyi paviedamiła, što dopyt padazravanaha samalijskaha padletka adkłali na niekalki dzion, pakul jon znachodziŭsia pad miedycynskim nahladam. U piatnicu, paśla atrymańnia dazvołu ad lekaraŭ, jaho aryštavali pa padazreńni ŭ zabojstvie. Palicyja paćvierdziła, što nie šukaje inšych datyčnych da złačynstva asob.

Siabry siamji Vadzima ŭ Kijevie raspačali zbor srodkaŭ na repatryjacyju jaho cieła, bo ŭ baćkoŭ niama nieabchodnych 8000 jeŭra. Pasolstva Ukrainy ŭ Irłandyi paćvierdziła, što znachodzicca ŭ kantakcie ź siamjoj i palicyjaj i akazvaje ŭsiu nieabchodnuju konsulskuju dapamohu.

Jak paviedamlajecca, zdareńnie vyklikała rezanans i ŭ irłandskim hramadstvie. Aljans za pravy dziaciej (CRA) zaklikaŭ da terminovaha niezaležnaha rasśledavańnia abstavin śmierci Vadzima, kab vyśvietlić, ci možna było praduchilić hetuju trahiedyju. Najvyšejšyja słužbovyja asoby Irłandyi, uklučajučy premjer-ministra, vykazali spačuvańni siamji zahinułaha, paabiacaŭšy padtrymku ŭsim, kaho zakranuŭ hety žachlivy incydent.

• 0
• 1
• 0
• 6
• 8
• 26
• 15
• 0