Zabudoŭščyk raspavioŭ, što pabudujuć u «Paŭnočnym bierazie» ŭ najbližejšyja hady
U najbližejšaj budučyni paviarchovaść budynkaŭ nie budzie pavyšacca, a zabudova nie budzie spraščacca i ŭščylniacca, źjavicca paliklinika, piša Onliner.
Za dva z pałovaj hady na byłym kukuruzna-rapsavym poli paśpieli vyraści niekalki kvartałaŭ i bolš za dva dziasiatki damoŭ (u tym liku tak zvanyja kalekcyjnyja, raźmieščanyja na pieršaj bierahavoj linii). Jašče ź dziasiatak šmatkvaternikaŭ znachodziacca ŭ pracesie ŭźviadzieńnia. Ale «Paŭnočny bierah» — heta zusim nie kavałak ziamli kala Cnianskaha vadaschovišča. Nasamreč heta amal 1000 ha, što raspaścirajucca ad kraju da kraju Minska (heta značyć, ad Drazdoŭ da Navinak).
Zabudoŭščyk, TAA «Ryviersajd Deviełapmient Limited», padčas pres-kanfierencyi raskazaŭ, jak prajekt budzie raźvivacca dalej.
Asnoŭnaja dumka — «Paŭnočny bierah» zastaniecca viernym sabie: pieravažna siaredniepaviarchovaja zabudova, bahataje dla novabudoŭlaŭ azielanieńnie, ciopłyja kolery fasadaŭ i tyja samyja kłuby žylcoŭ, jakija, kali tolki źjavilisia, narabili šumu.
— Heta samy bujny inviestycyjny prajekt na siońniašni dzień. Budavać my źbirajemsia bolš za 6 młn kvadratnych mietraŭ, heta značyć, u rajonie 80 000 kvater dla 135 000 čałaviek, — nahadaŭ pra ličby dyrektar kampanii-zabudoŭščyka Anton Rusakievič. — Što datyčycca płanaŭ na najbližejšuju budučyniu, my prystupajem da pašyreńnia parka. Nasielnictva žyłoha kompleksu pavialičvajecca, i najaŭnych 7 ha parkavaj terytoryi ŭžo nie chapaje.
Pa słovach Antona Rusakieviča, park vyraście praktyčna ŭ čatyry razy: pad aphrejd traplajuć 29 z chvościkam hiektaraŭ. Usie sakrety zabudoŭščyk, zrazumieła nie raskryvaje, ale abiacaje, što ŭ abnoŭlenaj zonie dla adpačynku buduć spartyŭnyja placoŭki, restaran, ekaściežka. Styl afarmleńnia, pradstaŭleny na renderach (vizualizacyjach), całkam suadnosicca z užo ŭładkavanaj častkaj parka. Tak što novym miljonam fatahrafij z pryhožaj łakacyi być.
U «Paŭnočnym bierazie» ŭžo pabudavali dziciačy sad. Vierahodna, u nastupnym miesiacy baćki zmohuć advieści svaich dziaciej u novyja hrupy. Taksama ŭ žyłym rajonie pačali budavać škołu z basiejnam. Jana budzie raźličana na 1020 vučniaŭ. «Raźličycca» pa hetaj častcy zabudoŭščyk płanuje ŭ 2027 hodzie. Praz paru hadoŭ prystupiać i da ŭźviadzieńnia palikliniki. Jaje ŭvodu ŭ ekspłuatacyju nie čakajem raniej za 2030-y. Centram hramadskaha žyćcia stanie novaja Centralnaja płošča — z kaviarniami, fudkortam, scenaj dla mierapryjemstvaŭ i miescami dla adpačynku. Tut ža płanujecca adkryć spa-centr.
Što datyčycca žylla, to nastupnym etapam deviełapier budzie asvojvać salidny kavałak ziamli — 60 ha. U pracy akažucca adrazu čatyry kvartały, u jakich zaprajektavany 43 žyłyja damy. Pracy nad imi buduć vieścisia na praciahu 2026—2027 hadoŭ. Kali 5—8 kvartały buduć zavieršany, prajekt akažacca praktyčna na siaredzinie, a dakładniej, na pavarocie na Drazdy (dzie taksama napeŭna znojdziecca miesca kalekcyjnym damam z vyhladam na vadaschovišča).
— Pačniom z šostaha i siomaha kvartałaŭ, potym padklučym piaty, jaki raźmieścicca na pieršaj bierahavoj linii i budzie zabudavany premijalnym žyllom, — tłumačyć Anton Rusakievič. — My, jak i raniej, budziem prytrymlivacca kancepcyi małapaviarchovaj zabudovy: šeść-dziesiać pavierchaŭ. Damy-daminanty raźmieścim bližej da vulicy Karastajanavaj. Vielmi cikavym budzie vośmy kvartał. U im źjaviacca nie tolki damy standartnaj dla nas vyšyni, ale i pa-sapraŭdnamu małapaviarchovyja.
Ciapier viadziecca prajektavańnie, ale možna skazać, što maksimalnaja vyšynia asobnych pabudoŭ składzie dva pavierchi. Jany buduć nabližany da taunchausaŭ.
Zabudoŭščyk abiacaje prapanoŭvać i ŭžo hatovyja damy, jakija ŭzvodziacca «sami pa sabie», biez udziełu dolščykaŭ. Mahčyma, hetaja opcyja znoŭ budzie dastupnaja tolki dla kalekcyjnych damoŭ. Praciahnuć u «Paŭnočnym bierazie» zdavać damy i z azdableńniem, a taksama bazavaj ubudavanaj meblaj (ciapier suadnosiny «hołyja»/uładkavanyja — prykładna 70/30).
Jakimi buduć novyja kvartały?
Kvartał sa skvieram. U im taksama raźmieścicca dziciačaja paliklinika.
Park-kvartał. Zaprajektavany kala miežaŭ novaha parku, z kalekcyjnymi damami i restarannaj vulicaj.
Kvartał z «Padł Parkam». Samy spartyŭny kvartał, u jakim taksama pabudujuć dziciačy sad.
Utulny kvartał. Najbolš cichi i, možna skazać, siamiejny, z vyhladam na zialonuju zonu.
A voś u płanie cen pryjemnych navin dla pakutnikaŭ (tych, chto mocna žadaje kupić) nie pradbačycca. «Viadoma, my sočym za tendencyjami na rynku. I, kali našy kalehi pavyšajuć [košty], čamu b nam nie pavysić? Rynak usio rehuluje — pahladzim, jak jon budzie siabie vieści. Jakija finansavyja instrumienty buduć dastupnyja».
Nahadajem, zaraz siaredni košt «kvadrata» ŭ novym žyłym rajonie składaje 1500 jeŭra.
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza14
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary
Kudy ŭžo tam. Pa rašeńniu t.zv.prezidenta "Paŭnočny bierah" - zvyšščylny rajon, pa pakazčykach navat bolš ščylny za "Minsk-Mir".