Tramp siońnia pierajmienuje Ministerstva abarony ŭ Ministerstva vajny

Tak abaronnaje viedamstva nazyvałasia da zakančeńnia Druhoj suśvietnaj vajny. Dla farmalnaj źmieny nazvy, jak i dla stvareńnia novaha Departamienta, nieabchodna adabreńnie Kanhresa, tak što pierajmienavańnie nie budzie aficyjnym.

Jak vynikaje z tekstu dakumienta, ź jakim aznajomiłasia Bi-bi-si, ukaz dazvoliŭ ministru abarony, jaho viedamstvu i padnačalenym vykarystoŭvać novuju nazvu ŭ jakaści dadatkovaha. «Nazva» Ministerstva vajny « pasyłaje bolš mocny sihnał hatoŭnaści i rašučaści ŭ paraŭnańni z «Ministerstvam abarony», jakoje fakusujuć tolki na zdolnaści abaraniacca», — havorycca va ŭkazie.

Pierajmienavańnie, zhodna z dakumientam «zasiarodzić uvahu viedamstva na našych nacyjanalnych intaresach i daść sihnał supiernikam, što Amieryka hatovaja vieści vajnu, kab zabiaśpiečyć svaje intaresy».

U kolki abyjdziecca rebrendynh, Bieły dom pakul nie paviedamlaje. Pavodle acenak amierykanskaj presy, košt moža dasiahnuć miljarda dalaraŭ: pierajmienavać pryjdziecca sotni ahienctvaŭ, pamianiać simvoliku, adrasy elektronnaj pošty, uniformu i hetak dalej.

Pieršym pra ŭkaz, jaki rychtujecca, paviedamiŭ Fox News. Kiraŭnik Pientahona Pit Chiehsiet retvitnuŭ paviedamleńnie telekanała ŭ sacsietcy X, supravadziŭšy jaho kamientarom «Ministerstva vajny» (zahałoŭnymi litarami).

Ministerstva abarony, čaściakom nazvanaje Pientahon z-za piacikutnaj formy budynka, u jakim jano znachodzicca, było stvorana ŭ ciapierašnim vyhladzie ŭ 1947 hodzie. Viedamstva abjadnała ŭ sabie vajenna-marskoje ministerstva, ministerstva suchaputnych vojskaŭ i Ministerstva vajenna-pavietranych sił.

Apošnija dva da hetaha byli adnym viedamstvam — Ministerstvam vajny, jakoje isnavała z 1789 hoda. Z 1947 pa 1949 hod abjadnany Departamient nazyvaŭsia Nacyjanalnym vajennym viedamstvam, a ŭ 1949 atrymaŭ ciapierašniuju nazvu — Ministerstva abarony. Donald Tramp nieadnarazova kazaŭ pra svoj namier viarnuć viedamstvu histaryčnuju nazvu, pad jakim u ZŠA była «nievierahodnaja historyja pieramoh» u abiedźviuch suśvietnych vojnach.

«Ja ŭpeŭnieny, Kanhres pahodzicca, kali heta spatrebicca. Ja navat nie dumaju, što heta [zhoda Kanhresa] patrebna», — kazaŭ Tramp žurnalistam u kancy žniŭnia.

Pit Chiehsiet na pasadzie ministra abarony ŭžo pieranazvaŭ niekalki vajennych baz i karabloŭ. U pryvatnaści, pry im było admieniena rašeńnie administracyi Džo Bajdena pierajmienavać siem baz, jakija byli nazvanyja ŭ honar lidaraŭ Kanfiederatyŭnych Štataŭ: da raniejšych nazvaŭ viarnulisia ŭ tym liku Fort-Breh (Fort-Libierci z 2023 pa 2025 hod) i Fort-Bieninh (Fort-Mur z 2023 pa 2025 hod). U červieni karabiel USNS Harvey Milk, nazvany ŭ honar adkrytaha hieja i zmahara za pravy ŁHBT Charvi Miłka, byŭ pierajmienavany ŭ USNS Oscar V. Peterson.

Pientahon tłumačyŭ hetyja pierajmienavańni imknieńniem Chiehsieta adlustravać «vajskovuju kulturu» ŭ abaronnym viedamstvie.

• 1
• 0
• 0
• 5
• 0
• 0
• 0
• 0