Dadaŭ cyjanid u prateinavy napoj. Stamatołah atruciŭ žonku, a zatym sprabavaŭ zabić śledčaha
Amierykanskaha stamatołaha, jaki atruciŭ svaju žonku, prysudzili da pažyćciovaha źniavoleńnia biez prava na daterminovaje vyzvaleńnie. Sud prysiažnych u Kałarada pryznaŭ jaho vinavatym u zabojstvie i inšych abvinavačvańniach, paviedamlaje Bi-bi-si.
U 47-hadovaha Džejmsa Krejha byŭ raman na baku, kali jon płanavaŭ zabić žonku Anžełu Krejh u sakaviku 2023 hoda.
Jon dadaŭ u prateinavy kaktejl žonki śmiarotnuju dozu cyjanidu, paviedamili prakurory.
Prakurory taksama śćviardžali padčas dvuchtydniovaha sudovaha razboru, što mužčyna nie byŭ ščaślivy ŭ šlubie, ale z-za finansavych prablem nie chacieŭ razvodu.
Advakaty abarony śćviardžali, što Anžeła Krejh, jakoj tady było 43 hady, skončyła žyćcio samahubstvam, bo była raźbita horam z-za «pastajannych» zdrad svajho muža. Adnak koranier akruhi Arapacha vyjaviŭ, što jana pamierła, atruciŭšysia cyjanidam i tetrahidrazalinam — chimičnym rečyvam, jakoje vykarystoŭvajecca ŭ kroplach dla vačej.
Dokazy pakazali, što Džejms Krejh rabiŭ zapyty ŭ internecie — «kolki hramaŭ čystaha myšjaku zabje čałavieka» i «ci možna vyjavić myšjak padčas uskryćcia?»
Jon zamoviŭ dastaŭku cyjanidu kaliju ŭ svaju stamatałahičnuju kliniku. Praz dva dni Anžeła Krejh vypiła prateinavy kaktejl, ad jakoha ŭ jaje zakružyłasia hałava i jana adčuła słabaść, žančynu špitalizavali ŭ balnicu ŭ pryharadzie Denviera.
Na videazapisie z kamiery nazirańnia vidać, jak stamatołah trymaje špryc pierad tym jak zajści ŭ balničnuju pałatu svajoj žonki. Jaje stan chutka pahoršyŭsia, a praź niekalki dzion daktary kanstatavali śmierć mozhu.
U sieradu prysiažnyja pryznali Krejha vinavatym u zabojstvie pieršaj stupieni, a taksama pa inšych abvinavačvańniach, uklučajučy padbuchtorvańnie da zabojstva. Krejh sprabavaŭ prymusić inšaha źniavolenaha zabić detektyva, jaki pracavaŭ nad hetaj spravaj.
Adna z šaści dziaciej muža i žonki vystupiła z zajavaj, jak na jaje paŭpłyvała zabojstva maci.
«Ja pavinna była daviarać svajmu baćku, — skazała Miryjam Mieziervi, paviedamlajuć amierykanskija ŚMI. — Jon pavinien byŭ być maim hierojem, a zamiest hetaha jon nazaŭždy zastaniecca złydniem u maich uspaminach».
Akruhovy sudździa akruhi Arapacha Šej Uitakier prysudziŭ Krejha da pažyćciovaha źniavoleńnia biez prava na ŭmoŭna-daterminovaje vyzvaleńnie pa abvinavačvańni ŭ zabojstvie, a taksama da 33 hadoŭ turemnaha źniavoleńnia pa dadatkovych punktach.
«Anžełu atruciŭ jaje muž, vyklikaŭšy pavolnuju śmierć», — skazała akruhovy prakuror Emi Paden žurnalistam na pres-kanfierencyi paśla vyniasieńnia prysudu.
«Jon zrabiŭ heta nie ŭ zapale, a strymana i naŭmysna».
Kamientary
Jon dadaŭ ---dabaviŭ
zastaniecca złydniem --- złačyncam
złydzień = lichodiej, złodiej,niesčastnyj, niŝij, brodiaha; zavistnik
pavolnuju śmierć --- marudnuju
pavolny = nietoroplivyj