Čas dla vialikaha nastupu Rasii: jakimi mohuć być «apošnija 50 dzion vajny»

Zhodna z ultymatyŭnaj zajavaj Donalda Trampa, Rasija atrymaje surovyja druhasnyja taryfy, kali na praciahu 50 dzion nie zaklučyć pahadnieńnie ab miry va Ukrainie.

Kiraŭnik Biełaha doma taksama zaŭvažyŭ, što niekalki razoŭ takaja damova ŭžo zryvałasia mienavita z-za dziejańniaŭ Kramla. Ale ciapier amierykanski prezident daje 100% harantyj, što «zavieršyć hetuju vajnu».

Ekśpierty, praŭda, majuć sumnievy.

Situacyja na poli boju

Adterminoŭka dziejańnia ŭltymatumu ździviła mnohich nie tolki va Ukrainie.

Pradstaŭnica Jeŭrasajuza pa pytańniach zamiežnych spraŭ Kaja Kałas zajaviła, što 50 dzion — «heta vielmi doŭhi termin» tady, kali ŭsie bačać, što «Rasija štodnia zabivaje mirnych žycharoŭ».

U hetym kantekście pryhadvajecca infarmacyja, raspaŭsiudžanaja amierykanskim vydańniem Axios, pra toje, što Pucin u pačatku lipienia nibyta zajaviŭ Trampu pra namier całkam akupavać čatyry ŭkrainskija vobłaści (Łuhanskuju, Danieckuju, Chiersonskuju i Zaparožskuju) za 60 dzion, heta značyć da pačatku vieraśnia.

Pa stanie na siaredzinu lipienia hetaje zadańnie vyhladaje dalokim ad zaviaršeńnia.

Niahledziačy na toje, što ź viasny hetaha hoda armija RF uzmacniła svoj nastup na ŭschodzie, a taksama zachapiła płacdarm u Sumskaj vobłaści, ahulnaje prasoŭvańnie rasijskich vojskaŭ na poli boju nie vyhladaje ŭražvajučym.

Nivodnaja z čatyroch častkova akupavanych abłaściej nie znachodzicca pad poŭnym kantrolem rasijan. Praŭda, heta nie pieraškodziła Maskvie ŭžo dvojčy abjavić pra 100% zachop terytoryi Łuhanščyny.

Upieršyniu rasijskaja ŭłada zajaviła pra «poŭnaje vyzvaleńnie ŁNR» u pačatku lipienia 2022 hoda. Praz try hady bajoŭ daviałosia rabić novuju zajavu. Kiraŭnik sieparatysckaha ŭtvareńnia Leanid Pasiečnik 1 lipienia hetaha hoda zajaviŭ, što terytoryja vobłaści «znoŭ vyzvalena na 100%».

Analityčny prajekt DeepState pakazvaje na svajoj anłajn-mapie, što hetyja zajavy nie adpaviadajuć rečaisnaści: pad kantrolem USU zastajecca nievialiki kavałak ziamli ŭ Łuhanskaj vobłaści ŭ rajonie viosak Novajahoraŭki i Nadziei.

Značna bolšyja terytoryi Siły abarony kantralujuć u Danieckaj, Zaparožskaj i Chiersonskaj abłaściach. U dźviuch apošnich pad kantrolem kala 30% terytoryi, na Danieččynie — kala 25%.

Bolš za toje, dla zachopu Chiersona rasijskim vojskam pryjdziecca pieraadolvać vialikuju vodnuju pieraškodu — raku Dniepr, a dla akupacyi Zaparožža, jakoje zaraz znachodzicca za 30-40 km ad linii frontu, im pryjdziecca pieraadoleć šerah abarončych umacavańniaŭ vakoł horada.

Značna bolš składanaja situacyja na Danieččynie. Pa stanie na siaredzinu lipienia rasijanam udałosia istotna prasunucca kala dvuch klučavych haradoŭ — Pakroŭska i Kanstancinaŭki. Jany faktyčna znachodziacca ŭ paŭakružeńni. Zaraz armija RF sprabuje abyści ich z fłanhaŭ i ŭziać pad kantrol łahistyčnyja šlachi Sił abarony. Jany ŭžo znachodziacca pad ahniom artyleryi i dronaŭ-kamikadze.

Na poŭdzień ad hetych haradoŭ rasijanie amal vycieśnili ŭkraincaŭ za administracyjnyja miežy Danieččyny ŭ rajonie pasiołka Vialikaja Navasiołka i sprabujuć zajści ŭ susiedniuju Dnieprapiatroŭskuju vobłaść.

Kali RF praciahnie nastup na Danieččynie takimi ž tempami, jakija byli ŭ červieni i na pačatku lipienia, to całkam vierahodna, što zmoža całkam vyjści na liniju administracyjnaj miažy na poŭdzień ad Pakroŭska.

Akupacyja samoha Pakroŭska i Kanstancinaŭki taksama mahčymaja, kali nie ŭdasca spynić ruch armii RF na fłanhach hetych haradoŭ. Biez łahistyki ŭkrainskija vajskoŭcy nie zmohuć utrymlivać praciahły čas harnizony ŭ hetych vuzłach abarony.

Adnak poŭny zachop vobłaści, u pryvatnaści vialikaj ahłamieracyi Słaviansk-Kramatorsk i haradoŭ Liman i Sieviersk, usio ž vyhladaje małavierahodnym biez praviadzieńnia novaha maštabnaha nastupu RF.

Čas dla finalnaha nastupu

Jość uskosnyja prykmiety, što Rasija ŭ bližejšy čas rychtuje taki masiravany nastup na froncie z pryciahnieńniem braniatechniki, kaža VVS ukrainski vajenny analityk Michaił Žyrochaŭ. Jon miarkuje, što heta moža adbycca ŭ Zaparožskaj ci Danieckaj abłaściach, dzie dla hetaha jość adpaviednyja ŭmovy, a mienavita — rakadnyja darohi i čyhunka.

Rakadnaja daroha — heta daroha, jakaja prakładzienaja paralelna da linii frontu (abo miažy), najčaściej dla zabieśpiačeńnia vajennych patreb. Jaje hałoŭnaja funkcyja — chutkaje pieramiaščeńnie vojskaŭ, techniki i zabieśpiačeńnia ŭzdoŭž frontu, nie nabližajučysia niepasredna da linii bajavych dziejańniaŭ.

Pavodle jaho słoŭ, apošnija miesiacy vajskoŭcy RF amal nie vykarystoŭvajuć braniatechniku, atakujučy pazicyi USU pieššu ci na matacykłach.

Ale pry hetym jość šmat śviedčańniaŭ taho, što rasijanie pierakidajuć vialikuju kolkaść tankaŭ i inšaj braniatechniki bližej da linii frontu.

«Tut pytańnie moža być u tym, što jany nazapašvajuć ich, kab prarvać front… U mianie składvajecca takoje ŭražańnie, što rasijanie sabrali dla hetaha 100-120 tysiač ludziej i peŭnuju kolkaść tankaŭ», — kaža ekśpiert.

Na jaho dumku, niečakany braniatankavy ŭdar paralelna z adciahvajučaj, dadatkovaj atakaj na inšym učastku frontu, moža dać Kramlu šaniec prarvać linii abarony USU.

Pravieści hetuju apieracyju RF nieabchodna da pačatku vosieni, kali moža pahoršycca nadvorje na poŭdni i ŭschodzie Ukrainy, a mienavita — pačnucca daždžy i tumany.

Hetaja ataka moža być apošnim akordam «vialikaha nastupu» Rasii, jaki pačaŭsia jašče ŭ kastryčniku 2023 hodzie kala Aŭdziejeŭki i ź nievialikimi pierapynkami praciahvajecca i dahetul. Praciahvać jaho biez novaj maštabnaj mabilizacyi Kreml nie zmoža, upeŭnieny Michaił Žyrochaŭ.

«Kali budzie admoŭny vynik (hetaha nastupu — Red.), jany buduć vymušany pryjści da vialikaj mabilizacyi», — reziumuje jon.

Na jaho dumku, hałoŭnaj zadačaj ukrainskaha hienštaba zaraz źjaŭlajecca nie «prapuścić» momant hetaj ataki praciŭnika i strymać jaho.

Zachodnija analityki taksama nie bačać prykmiet taho, što Pucin imkniecca da miru va Ukrainie. Aŭstralijski hienierał u adstaŭcy, vajenny ahladalnik Mik Rajan źviartaje ŭvahu, što rasijskaja ŭłada nie robić realnych krokaŭ da mirnaha ŭrehulavańnia.

«Pucin nie prademanstravaŭ nijakaha žadańnia adstupać ad svaich maksimalisckich met adnosna vajny z pačatku poŭnamaštabnaha ŭvarvańnia ŭ lutym 2022 hoda. Z taho času jaho mety zastajucca niaźmiennymi», — adznačaje jon u svaim błohu.

«Było b nadzvyčaj dziŭna, kali b Pucin zaraz źmianiŭ kurs. Navat kali spravy dla rasijan byli davoli zmročnymi paśla pravału ich pieršapačatkovaha nastupu na Kijeŭ u 2022 hodzie, Pucin praciahvaŭ dziejničać. Vierahodna, jon zrobić toje samaje zaraz».

Rajan maje sumnievy, što druhasnyja sankcyi, jakija pahražaje ŭvieści Tramp, zmohuć realna padkasić vajennuju mašynu Kramla. U pryvatnaści z-za značnaj padtrymki bojeprypasami i vojskami z boku Paŭnočnaj Karei, jakaja pryvykła žyć va ŭmovach žorstkich sankcyj.

U vyniku vajenny ekśpiert adznačaje, što pahrozy amierykanskaha prezidenta buduć mieć realny efiekt, kali jany buduć padmacavany praktyčnymi dziejańniami.

«Razmovy — heta tanna. Važnyja tolki dziejańni», — padkreślivaje jon.

Navat paśla žorstkich zajaŭ u adras Pucina Donald Tramp usio jašče ŭpeŭnieny, što Rasija maje pieravahu na poli boju, piša amierykanskaje vydańnie Politico.

«Pohlad prezidenta zaklučajecca ŭ tym, što Rasija idzie da pieramohi (goping to win), pytańnie ŭ tym, kolki času heta zojmie», — skazaŭ vysokapastaŭleny čynoŭnik Biełaha doma ŭ kamientary ŚMI. Jon dadaŭ:

«Rasija maje bolšuju ekanomiku, maje bolšuju armiju, maje bolš čym dastatkova cieł, kab kinuć ich u miasarubku, i joj prosta abyjakava. I choć jany dasiahajuć pavolnaha prahresu, jany ŭsio roŭna dasiahajuć prahresu. Prezident prosta choča spynić zabojstvy».

• 2
• 0
• 0
• 1
• 0
• 2
• 0
• 0