Kolkaść zahinułych u vyniku pavodak u Techasie ŭzrasła da 80 čałaviek, siarod ich 28 dziaciej

U vyniku mocnaj pavodki ŭ Techasie, pavodle apošnich paviedamleńniaŭ uładaŭ, zahinuli prynamsi 80 čałaviek, u tym liku 28 dziaciej, piša Bi-bi-si.

Šeryf akruhi Kier štata Techas Łary Lita ŭ niadzielu viečaram skazaŭ žurnalistam, što kolkaść paćvierdžanych śmierciaŭ u akruzie ŭźlacieła da 68: 40 darosłych i 28 dziaciej. U piaci inšych akruhach, jak pieradaje CNN sa spasyłkaj na miascovyja ŭłady, zahinuli jašče 12 čałaviek.

U niekalkich akruhach Techasa abvieščana nadzvyčajnaje stanovišča: mnostva daroh źniščana, telefonnyja linii nie pracujuć.

Jašče 41 čałaviek, u tym liku 10 dziaŭčynak, ličacca źnikłymi bieź viestak

Zahinułyja i źnikłyja dzieci — dziaŭčynki — adpačyvali ŭ letnim chryścijanskim łahiery dla dziaŭčynak Camp Mystic niepadalok ad horada Kiervił, na bierazie raki Huadałupie, jakaja raptoŭna vyjšła ź bierahoŭ paśla mocnych zalevaŭ.

Nacyjanalnaja mietearałahičnaja słužba (NWS) abviaściła pra pahrozu pavodki jašče i ŭ akruzie Komał na paŭdniovym centry Techasa.

U zajavie słužby havorycca, što «vielmi pavolnaja navalnica vyklikaje nadzvyčajna mocnyja apadki — 100—150 mm u hadzinu».

NWS zaklikaje ludziej, jakija znachodziacca niepasredna kala rajona stychijnaha biedstva, šukać vyratavańnia na ŭzvyššach, a ŭsich, kamu jašče dazvalaje čas, — nieadkładna evakujavacca.

«My majem spravu z nadzvyčajnaj i ekstremalnaj situacyjaj», — havorycca ŭ papiaredžańni na veb-sajcie NWS.

Prezident ZŠA Donald Tramp zajaviŭ, što jaho administracyja ciesna supracoŭničaje z uładami štata, dadaŭšy, što ŭ Techas pa jaho daručeńni nakiravałasia ministr unutranaj biaśpieki ZŠA Kryści Noem.

Užo znachodziačysia ŭ Techasie, Noem zajaviła na pres-kanfierencyi, što prezident «hłyboka ŭražany» hibiellu ludziej u vyniku pavodki i prasiŭ jaje raspavieści žycharam štata, jak mocna jon i Miełanija smutkujuć, i što jon hatovy dać usie resursy fiederalnaha ŭrada dla sadziejničańnia ŭ pošukavych rabotach.

Pa słovach Noem, niama nikoha lepšaha za miascovych vyratavalnikaŭ, pakolki jany dobra viedajuć miascovaść, ale fiederalny ŭrad pavinien akazać im maksimalnuju padtrymku.

Kryści Noem adznačyła, što Fiederalnaje ahientstva pa nadzvyčajnych situacyjach (FEMA) znachodzicca ŭ stanie «padvyšanaj hatoŭnaści» i budzie praciahvać akazvać svoječasovuju i apieratyŭnuju dapamohu ŭ vyratavalnych apieracyjach, uklučajučy dadatkovyja samaloty i viertaloty.

«Štat Techas ździŭlaje tym, jak jon reahuje na stychijnyja biedstvy — nie ŭsie štaty takija, — adznačyła ministr. — Vy słužycie prykładam dla nacyi i viedajecie, što vy nie adzinokija».

• 0
• 0
• 0
• 0
• 0
• 0
• 0
• 0