U minskich aptekach raźmiali rasijski anałah «Aziempika». Ludziej nie pałochała navat cana

«Kali jon źjavicca?» i «Ci budzie ŭ najbližejšy čas?» — udakładniajuć žychary stalicy. Pa danych tabletka.by, na 17.00 19 červienia ŭ stalicy «Siemavik» byŭ tolki ŭ adnoj aptecy. Praŭda, kali «Lusterka» tudy patelefanavała, akazałasia, što leki ŭžo vykupili.

Zastajecca varyjant pajechać pa jaho ŭ rehijony. Ale i tam srodak na vahu zołata: pa ŭsioj krainie jaho možna znajści ŭsiaho ŭ 60 aptekach, i hetaja kolkaść pastajanna pamianšajecca. 

«Ludzi prasili: «Kali łaska, adkładzicie. Užo biahu pa recept»

U rajonie, dzie pravizaram pracuje Iryna (imia źmieniena), žyvie šmat maładych siemjaŭ. Jany asnoŭnyja pakupniki ŭ ich nievialikaj aptecy. Nakolki pamiataje žančyna, «Siemavik» na pryłaŭkach ich punktu staŭ źjaŭlacca jašče zimoj. Pastupaŭ jon u nievialikaj kolkaści, jaho chutka raskuplali, i «jon źnikaŭ».

— Paśla ŭsie nasilisia, šukali jaho. Dzieści ŭ krasaviku jon źjaviŭsia apošni raz. Tady zahadčyca pasprabavała zamović maksimalna vialikuju kolkaść upakovak, jakuju moža adhruzić skład. Ale treba razumieć: tut sistema takaja, što kali preparat papularny, to nie fakt, što atrymaješ stolki, kolki vypisaŭ, ci ŭvohule choć niešta, bo ŭsie apteki chočuć tavar u realizacyju. Kalehi mahli jaho ŭžo raschapać, i ty navat nie paśpiavaješ hetaha ŭbačyć, — uśmichajecca surazmoŭca. — Tamu staralisia brać šmat: paradku 10-15 upakovak. Kamuści ŭdałosia i pa 20 uziać.

U aptecy Iryny viasnovuju partyju «Siemavika» raskupili da pačatku červienia.

Žančyna miarkuje, kali b preparat byŭ tolki ŭ ich, 10-15 pačkaŭ syšli b za paru dzion. Nie spyniŭ b navat košt — 253-265 rubloŭ za ŭpakoŭku.

Zaraz farmaceŭty čakajuć novuju pastaŭku. Dakładnaj daty, kali heta adbudziecca, surazmoŭnica nie viedaje. Z taho, što čuła ad kalehaŭ, usio pavinna zdarycca da kanca hetaha tydnia.

— Dumaju, ažyjataž vakoł preparata ź dźviuch pryčyn. Pa-pieršaje, ludziam jon cikavy. Pa-druhoje, jon pastupaje ŭ krainu nievialikimi partyjami. Čamu? Dakładna nie viedaju. Ciapier, kali čałaviek pytajecca «Siemavik», prapanujem zapisacca na čarhu. Ale ŭ nas jana nievialikaja. Dumaju, tamu što nie ŭsie viedajuć pra takuju mahčymaść, — razvažaje surazmoŭca. Ciapier vielmi papularnyja sajty, na jakich možna pahladzieć, dzie jakija leki pradajucca. I ludzi čaściej prychodziać za im metanakiravana, a nie prosta spytać.

Pakupnikoŭ, jakija ŭ aptecy Iryny biaruć rasiejski anałah «Aziempika», žančyna padzialiła b na dźvie hrupy. Pieršaja — žančyny i mužčyny za 50, druhaja — žančyny 30+.

— Pieršyja — ź vidavočnymi pakazańniami [da pryjomu]. Vidać, što indeks masy cieła (pakazčyk, jaki dazvalaje vyznačyć, ci jość u čałavieka zališniaja vaha) u ich sapraŭdy zavyšany. Druhija časta vielmi dahledžanyja, z dobraj fihuraj, ja b skazała. Na maju dumku, tam nie było da preparata supiermiedycynskich pakazańniaŭ pa zdaroŭi, što krychu biantežyła. Choć recepty ŭ ich mielisia, — dzielicca nazirańniami pravizar. — Abjadnoŭvaje hetyja dźvie katehoryi toje, što ŭsio heta całkam sabie ludzi pry hrošach. Babulki ŭ mianie jaho nie pytalisia ni razu.

Pa nazirańniach surazmoŭnicy, u krasaviku, kali novaja partyja leka tolki źjaviłasia, jaho ŭ asnoŭnym brali pa adnoj upakoŭcy. U mai, kali ŭ aptekach Minska jon staŭ zakančvacca, kuplali adrazu pa dźvie-try.

— I pačaŭsia ažyjataž. Ludzi prasili: «Kali łaska, adkładzicie. Užo biahu pa recept», — adznačaje Iryna. — Bačyli, što jaho mała, razumieli: nieviadoma, kali źjavicca — i zakuplali z zapasam. Apošniaja dziaŭčyna, jakaja zabirała ŭ nas «Siemavik», spytała ŭ kalehi: «Kolki ŭ vas? Ja pajdu, vypišu [recept]». Jana, napeŭna, try ci čatyry ŭpakoŭki adrazu ŭziała.

Z taho, što čuła Iryna, leki «dobra dapamahajuć schudnieć». Na jaje dumku, u nadziei na hety efiekt niamała ludziej za im i haniajucca.

— Preparat prytuplaje pačućcio hoładu, ale, mnie zdajecca, mnohija nie razumiejuć, što jon pracuje, kali čałaviek psichałahična hatovy nie jeści, — razvažaje farmaceŭt. — Zaŭvažała, što vaha znajomaj, jakaja jaho prymaje, niejki čas nie mianiałasia. Spytała: čamu tak? Jana pryznavałasia, što na aŭtamacie praciahvała spažyvać prysmaki. Joj było składana psichałahična raźvitacca z dumkaj, što jana nie moža jeści cukierki.

«Ad kaleh čuła, što ci to piać, ci to vosiem u adny ruki brali»

Alena (imia źmieniena) pracuje ŭ nievialikaj aptecy ŭ novym rajonie Minska. Pakupnikoŭ u ich niašmat. «Siemavik» pytajucca biez ažyjatažu, ale aktyŭna. Tut jon źjaviŭsia ŭ krasaviku.

— Apteka ŭ nas nievialikaja, pastaŭki niekalki razoŭ na tydzień, tamu zakazvali jaho ŭsiaho pa 1-3 upakoŭki. Zvyčajna da novaha pryvozu leki raskuplali, choć dla našaha punktu košt u preparata niemaleńki, — raspaviadaje surazmoŭnica. — Paźniej stali afarmlać jaho kankretna pad čałavieka — brali [u patencyjnaha pakupnika] numar i, atrymaŭšy, telefanavali. Na majoj pamiaci tolki adzin klijent kuplaŭ adrazu try ŭpakoŭki, astatnija mienš. Ale ad kaleh čuła, što ci to piać, ci to vosiem u adny ruki brali.

U aptecy Aleny «Siemavik» skončyŭsia ŭ kancy maja. Zamović jany jaho pakul nie mohuć: na składzie ich sietki preparata pakul niama.

— Nakolki čuła, u horadzie jaho zastalisia «chvościki» dla asablivych vypadkaŭ. Heta pracuje ŭ dziaržaŭnaj sistemie aptek. Jak? U daviedcy lekaŭ niama, ale toj, kamu jano treba pa miedpakazańniach prychodzić u apteku. Tam jamu prapanujuć aformić tak zvanaje adterminavanaje zabieśpiačeńnie, — apisvaje miechanizm Alena. — Jon rehistruje zajaŭku, jaje padajuć na skład. Tam jość abmiežavanaja partyja mienavita dla padobnych vypadkaŭ. Jana nie ŭ ahulnym dostupie. Adpaviedna, kankretna pad klijenta prychodzić preparat. Čałavieku telefanujuć — i jon jaho zabiraje.

Pa nazirańniach Aleny, čaściej za ŭsio ŭ ich aptecy «Siemavik» pytalisia žančyny 45-50 hadoŭ, jakija sočać za trendami i «paralelna imknucca lačyć svaich mužčyn». Prykładna hetaja ž katehoryja klijentaŭ u 2024-m cikaviłasia «Aziempikam».

Surazmoŭnica tady pracavała ŭ punkcie prodažaŭ u centry Minska. Kaža, ad pakupnikoŭ jana pačuła pra hetyja leki raniej, čym vakoł ich pačałasia šumicha.

— Ščyra skažu, pytalisia pra «Aziempik» tady adnosna niačasta. Moža, raz na paru tydniaŭ. Z kalehami navat paśmiejvalisia troški nad takimi pakupnikami. Usio ž taki heta surjozny recepturny preparat dla lačeńnia zachvorvańnia, a pra jaho kazali tak, byccam by heta hiematahien. Bo vonkava pa hetych klijentach dakładna nielha było skazać, što jany majuć patrebu ŭ srodku. Mnie zdavałasia, heta byli ludzi, jakija prosta chacieli palepšyć formu.

Z «Siemavikam», choć pa jaho i prychodziać z receptami, časam padobnaja situacyja, — dzielicca nazirańniami farmaceŭt. — U toj ža čas u mianie adnojčy była razmova z pakupnicaj, jakaja raspaviała, što preparat patrebny jaje mužu. U mužčyny dyjabiet, jamu doŭha padbirali terapiju, i mienavita siemahłutyd (dziejučaje rečyva ŭ preparacie) vydatna padyšoŭ. Jana vielmi radavałasia i biehała pa ŭsich aptekach, źbirajučy reštki.

Alena, jak i jaje kaleha Iryna, taksama adznačaje, što rasijski anałah «Aziempika» raskupili chutka.

— Tak, partyja była maleńkaja, ale i toje, što ludzi na jaho nakinulisia, taksama fakt. I heta vy nie tolki ad mianie pačujecie, — kaža jana. — Ciapier čakajuć druhuju. Z dośviedu, zvyčajna ŭ situacyjach aktyŭnaj cikavaści da lekaŭ pieršyja zakupačnyja partyi popyt nie zadavalniajuć, ale pramiežki pamiž pastaŭkami nievialikija. Čuła ad kaleh, što leki čakajuć paśla lipienia. Ale kali dakładna, nieviadoma. Usio ž taki «paśla lipienia» — heta moža być i ŭ žniŭni, i ŭ vieraśni.

U Minskaj aptecy №67 «Biełfarmacyi» na Šyškina, 26, dzie 19 červienia ŭ 17.00 servis tabletka.by pakazvaŭ adziny dastupny dla prodažu «Siemavik» u horadzie, a 17.30 žurnalistcy paviedamili, što preparata ŭžo niama.

— Jaho vykupili. Možam prapanavać uziać na čarhu. Kali daduć, to ŭ aŭtorak, — udakładnili ŭ aptecy.

• 1
• 0
• 0
• 4
• 2
• 1
• 2
• 0