«Karty nie vyratujuć». Biełaruscy pad mižnarodnaj abaronaj udałosia paźbiehnuć ekstradycyi z Armienii i viarnucca ŭ Polšču
Biełaruska Iłona (imia źmieniena) atrymała mižnarodnuju abaronu ŭ Polščy, jašče budučy niepaŭnaletniaj. Niadaŭna jana vyrašyła źlotać u Armieniju, ale ŭžo pry ŭjeździe ŭ hetuju krainu, na pašpartnym kantroli, jaje zatrymali. Akazałasia, Biełaruś abviaściła jaje ŭ miždziaržaŭny vyšuk, jaki dziejničaje ŭnutry SND. Hrupie jurystaŭ udałosia damahčysia taho, kab dziaŭčyna zmahła viarnucca ŭ Polšču, ale na heta pajšoŭ miesiac. Jurystka WKB Lawyers i Partyzanka Hanna Macijeŭskaja raskazała vydańniu Most pra kiejs dziaŭčyny.
Palityčna aktyŭnymi ŭ Biełarusi byli baćki Iłony, tady jana była jašče niepaŭnaletniaj. Pra toje, što pretenzii jość da jaje samoj, dziaŭčyna nie viedała. Tym nie mienš, pierad pajezdkaj u Armieniju jana prakansultavałasia z čatyrma ludźmi, jakija pazicyjanavali siabie jak jurysty, i tyja zapeŭnili, što takoje padarožža budzie dla jaje biaśpiečnym.
U Armienii dziaŭčyna płanavała sustrecca ź ludźmi, «jakich tam viedaje». Na ŭjeździe ŭ krainu biełaruskuju zatrymali. U dačynieńni da jaje pačali ekstradycyjny praces. Sud pavinien byŭ vyrašyć, ci pieradavać jaje Biełarusi.
Hanna Macijeŭskaja padkreślivaje, što praces usio jašče viadziecca. Ale mižnarodnaj hrupie jurystaŭ udałosia damahčysia źniaćcia abmiežavańniaŭ na vyjezd z Armienii. Tamu dziaŭčyna zdoleła pakinuć hetuju krainu i viarnucca ŭ Polšču.
U Armienii Iłonie dapamahała Chielsinskaja hramadzianskaja asambleja, a kaardynavali praces rasijskija aktyvisty z arhanizacyi «Kaŭčeh», jakija dapamahali biaspłatna. Macijeŭskaja taksama akazvała padtrymku siamji zadarma.
Damahčysia ŭdałaha dla Iłony vyniku ŭdałosia za miesiac i adzin dzień. Hanna Macijeŭskaja miarkuje, što dla takich spraŭ heta niadoŭha. Jana čakała, što sprava moža zaniać nie mienš za try miesiacy.
Uvažliva vybirać krainy, nie publikavać paviedamleńni
Mnohija biełarusy, jakija ź mierkavańniaŭ biaśpieki nie mohuć viarnucca dadomu, sustrakajucca sa svajakami i siabrami ź Biełarusi ŭ biaźvizavych (ci ŭmoŭna biaźvizavych) krainach. Samyja papularnyja napramki — Armienija, Hruzija, Turcyja, Jehipiet.
Macijeŭskaja miarkuje, što takija krainy nielha ŭsprymać jak całkam biaśpiečnyja.
«Ja jašče raz chaču padkreślić, što biełarusam, schilnym da ryzyki palityčnych represij, varta ŭvažliva płanavać svaje pajezdki. Nijakija śpisy / karty vas nie vyratujuć — dziaŭčyna, darečy, pryznałasia, što paspadziavałasia taksama na «žoŭty» koler Armienii na staroncy pashpart.org (pahadziciesia, žoŭty ž — nie čyrvony). Ja jak i hod tamu, tak i ciapier prytrymlivajusia pazicyi, što nie isnuje ŭniviersalnych śpisaŭ/kartaŭ», — napisała jana.
Jurystka adznačaje, što navat kali biełarusa nie zatrymlivajuć na ŭjeździe, heta nie aznačaje, što ŭ jaho nie ŭźniknie prablem pry vyjeździe z krainy. U suviazi z hetym jana rekamienduje, kali ŭžo čałaviek pryniaŭ rašeńnie zrabić pajezdku i biaśpiečna zajechać, nie publikavać paviedamleńni, fota ci videa, jakija śviedčać pra toje, što jon tam znachodzicca. Bo kali siłaviki ŭ Biełarusi adsočvajuć takoha čałavieka, to mohuć apieratyŭna nakiravać zapyt u krainu jaho znachodžańnia abo abviaścić u vyšuk.
Zamiest sustrečy sa svajakami ŭ trecich krainach jana rekamienduje biełarusam pad mižnarodnaj abaronaj Polščy vykarystoŭvać instrumient haściavoj polskaj vizy dla členaŭ siemjaŭ. Niahledziačy na šerah niaŭdałych kiejsaŭ, takija vizy ciapier vydajucca.
Kamientary
NN, vy ž u susiednim artykule pra Turcyju pisali, što heta adna z samych niebiaśpiečnych dla biełarusaŭ krain. A tut akazvajecca, Turcyju vybirajuć biełarusy dla sustreč ź mierkavańniaŭ biaśpieki. Niešta ŭ vas nie sychodzicca. I pra jakija polskija vizy vy tut raśpisali ? Ich ŭrabić dla baćkoŭ amal nie realna. Praściej u Hruziju kupić kvitki baćkam i sabie, čym zamacca polskimi vizami. Pa koštach vyjdzie ci nie tańniej. A ŭvohule, dzie Cichanoŭskaja ? Čamu prablema ź vizami?