Kryścina Arbakajcie, jakoj zabaranili ŭjezd ŭ Łatvii, budzie sudzicca
Łatvijskija ŭłady ŭnieśli rasijska-litoŭskuju śpiavačku Kryścinu Arbakajcie ŭ śpis niepažadanych asob pa rekamiendacyi słužby dziaržaŭnaj biaśpieki. U instahramie dačka Ały Puhačovaj upieršyniu prakamientavała heta.
«Admiena majho kancertu i zabarona na ŭjezd u Łatviju — heta nie prosta rašeńnie suprać artysta. Heta parušeńnie ŭsich mižnarodnych normaŭ i pryncypaŭ, na jakich budujecca sučasny śviet. Hetaje rašeńnie parušaje nie tolki maje pravy jak artystki, ale i asnovy mižnarodnaha prava, svabody słova», — miarkuje śpiavačka.
Jana kaža, što jaje tvorčaść «pa-za palitykaj». «Ja nikoli nie padtrymlivała i nie ŭdzielničała ŭ palityčnych kanfliktach. Ja zaŭsiody havaryła movaj muzyki, teatra i mastactva. Ja vieru, što scena — heta miesca, dzie ludzi znachodziać adzinstva, a nie padstava dla padziełu», — napisała jana.
Arbakajcie piša, što «hłyboka rasčaravanaja, ale nie straciła viery ŭ dyjałoh, rozum i čałaviečyja kaštoŭnaści».
Jana dadaje, što nie maje namieru zdavacca i budzie «adstojvać svajo prava ŭ sudovym paradku vystupać pierad svajoj aŭdytoryjaj».
«Heta pytańnie nie tolki asabistaj spraviadlivaści, ale i pryncypu: u mastactva nie pavinna być miežaŭ», — miarkuje jana.
Letaś łatvijski śpis niepažadanych asob byŭ papoŭnieny na 480 proźviščaŭ. Ułady zajaŭlajuć, što padobnyja rašeńni buduć prymacca i nadalej dziela abarony nacyjanalnaj biaśpieki.
U Litvie, hramadziankaj jakoj źjaŭlajecca Kryścina Arbakajcie, taksama vyklikaŭ chvalu abureńnia ŭ sacyjalnych sietkach kancert Kryściny Arbakajcie, zapłanavany na 31 maja ŭ Vilni. Karystalniki vykazvajuć niezadavolenaść tym, što ŭ Litvu zaprašajuć artystku, jakaja atrymała zvańnie «zasłužanaj artystki Rasijskaj Fiederacyi» i nie asudziła ahresiju Rasii suprać Ukrainy.
U toj ža čas u samoj Rasii taksama admianiajuć kancerty Arbakajcie. Pryčynami tam nazyvajuć, što śpiavačka nie vykazała svajoj pazicyi ab vajnie va Ukrainie, nibyta «finansavała USU» i atrymała zamiežnaje hramadzianstva, a ŭ Rasiju pryjechała tolki dla zarobku hrošaj. Da taho tam jaje ckujuć jak dačku «zamiežnaha ahienta» (Ała Puhačova nie pryznanaja zamiežnym ahientam, im pryznany jaje muž — Maksim Hałkin).
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom23
Kamientary