Novym śpikieram Kaardynacyjnaj rady, chutčej za ŭsio, stanie Arciom Bruchan
Tłumačym łohiku pracesu.
13 maja pavinny adbycca vybary śpikiera Kaardynacyjnaj rady. U adsutnaść źnikłaj Anžaliki Mielnikavaj jaje abaviazki časova vykonvaje vice-śpikierka Stasia Hlińnik.
Adnak protaparłamient urešcie ŭznačalić nie jana. I havorka nie tolki pra toje, što Hlińnik sama dekłaruje, što nie budzie pretendavać na pasadu. Kali b jana i chacieła stać śpikierkaj, u jaje heta naŭrad ci b atrymałasia.
Hlińnik pradstaŭlaje «Jeŭrapiejski vybar» — frakcyju paplečnikaŭ Śviatłany Cichanoŭskaj. Jaje asnoŭnaja pasada — asistentka Śviatłany Cichanoŭskaj.
A najbolšuju kolkaść hałasoŭ u Kaardynacyjnaj radzie maje kaalicyja Paŭła Łatuški i ruchu «Za svabodu» Jurasia Hubareviča. Pa sutnaści mienavita Łatuška vyznačaje, chto budzie śpikieram Kaardynacyjnaj rady — farmalna treciaj asobaj u apazicyi. I dla jaho niama nijakaj patreby, kab protaparłamient uznačalvała asistentka Cichanoŭskaj. Navošta, kali jość ułasnyja pamočniki?
Raniej pačesnaje miesca zajmała Anžalika Mielnikava — jana mieła tolki piataje miesca ŭ vybarčym śpisie Łatuški, adnak u vyniku była biezalternatyŭna naminavanaja na pazicyju śpikierki.
Ciapier miechanizm vybaru staršyni budzie padobnym — Łatuška prapanuje kandydaturu sa svajoj kamandy.
Pavodle infarmacyi krynic «Našaj Nivy», chutčej za ŭsio, heta budzie Arciom Bruchan. Jon namieśnik Łatuški ŭ Narodnym antykryzisnym upraŭleńni i namieśnik pradstaŭnika Abjadnanaha pierachodnaha kabinieta pa tranzicie ŭłady.
Arciom Bruchan — vypusknik histaryčnaha fakulteta Bresckaha dziaržaŭnaha ŭniviersiteta. Pa raźmierkavańni trapiŭ u miemaryjalny kompleks «Bresckaja krepaść-hieroj» (2012-2017), pracavaŭ tam staršym navukovym supracoŭnikam. Paśla pierajšoŭ u Brescki abłvykankam (2017-2020). Tam jon kaardynavaŭ dziejnaść arhanizacyj kultury, daros da pasady namieśnika načalnika adździeła.
U 2020 hodzie Arciom Bruchan padtrymaŭ pratesty i pierajšoŭ na bok naroda.
Čytajcie archiŭnuju hutarku z Arciomam Bruchanam: Były čynoŭnik raskazaŭ, jak pracavaŭ u vykankamie, nie pajechaŭ na mitynh za Łukašenku i za što chacieŭ by vybačycca
Niahledziačy na toje, što ŭ vybarčym śpisie Bruchan mieŭ tolki №11, Łatuška całkam daviaraje jamu, cenić prafiesijanalizm i pradstaŭničyja navyki. Vyhladaje, što na pasadzie śpikiera Kaardynacyjnaj rady Łatuška chacieŭ by bačyć nie prafiesijnaha palityka, a adkaznaha funkcyjaniera. Hetym patrabavańniam adpaviadała Mielnikava, adpaviadaje i Bruchan.
Top-piersony, jakija znachodzilisia ŭ vybarčym śpisie Łatuški vyšej za byłoha bresckaha čynoŭnika, majuć svaje niedachopy. Juraś Hubarevič — sam ambitny palityk, u jaho mohuć być i ŭłasnyja intaresy. Były dypłamat Uładzimir Astapienka — kamandny čałaviek, ale nie nastolki inicyjatyŭny, dyj jamu moža być niecikava zajmacca takoj arhanizacyjnaj pracaj. Astatnija, u tym liku Andrej Kurejčyk, jaki ŭvohule znachodzicca ŭ ZŠA, u mienšaj stupieni ŭciahnutyja ŭ palityčnuju dziejnaść.
Kamientary