Bolš čałaviečy, ale vierny pryncypam. Jakim atrymaŭsia 7-y siezon «Čornaha lusterka»
Dniami Netflix pradstaviŭ novy siezon svajho chita «Čornaje lusterka» (Black Mirror), i krytyki ŭžo ŭ zachapleńni. Čym jon ich začapiŭ?
«Čornaje lusterka» ŭpieršyniu źjaviłasia na ekranach u 2011-m, nazva sieryjała adsyłaje da čornych ekranaŭ hadžetaŭ. Heta prajekt, jaki biare na siabie misiju papiaredžvać pra niebiaśpieku technałohij, tamu nie čakajcie ad jaho pazityvu i pryjemnych emocyj.
«Čornaje lusterka» składana hladzieć, i samy varty dla jaho epitet — zmročny. Ale, ź inšaha boku, jon nie pakidaje abyjakavym, i kali vy žadajecie vostrych emocyj, śmieła ŭklučajcie hety sieryjał. Nie treba bajacca, što ciapier pradstaŭleny ŭžo siomy siezon sieryjała, bo «Čornaje lusterka» — heta sieryjał-antałohija, dzie ŭ kožnaj sieryi raskryvajecca asobnaja historyja, tamu jaho možna hladzieć ź luboj sieryi.
Što da siomaha siezona, jon užo całkam dastupny — možna pahladzieć usie šeść sieryj. Vodhuki pra jaho dobryja: naprykład, na sajcie-ahrahatary recenzij Rotten Tomatoes siezon maje rejtynh uchvaleńnia 89%.
Usio pačynajecca z historyi Amandy i Majka — ščaślivaj pary, jakaja choča zavieści dzicia. U mozhu Amandy znachodziać puchlinu, i Majk pahadžajecca na prapanovu ad startapa Rivermind: zamianić paškodžanuju častku jaje mozha, dzie znachodzicca puchlina, na sintetyčny anałah. Infarmacyju, što znachodzicca na stračanych niejronach, pierapraŭlajuć na sierviery Rivermind, a klijenty musiać płacić kampanii štomiesiac, kab mieć da jaje dostup i, adpaviedna, funkcyjanavać.
Dalej budzie sieryja pra dźviuch byłych adnakłaśnic, Vieryci i Maryju, dzie pryhoža raskryvajuć sutnaść hazłajtynhu — manipulacyj, kali čałavieku naviazvajuć inšy pohlad na jaho ŭłasnyja dumki i adčuvańnie realnaści. U nastupnych čatyroch sieryjach čakajcie temy virtualnaha śvietu, štučnaha intelekta i videahulniaŭ — jak zvyčajna ŭ «Čornym lusterku», biez anijakich chepi-endaŭ.
Asobnaja razynka — niedaacenienaja krytykami sieryja Hotel Reverie. Heta historyja pra kłasičny film z takoj nazvaj, jaki vyrašyli pieraźniać z dapamohaj novaj technałohii, jakaja stvaraje virtualnuju prastoru na bazie filma i dazvalaje ŭvieści tudy novaha akciora. Antyŭtopija pieratvarajecca ŭ pryhožuju historyju kachańnia, i zdajecca, što ŭ hetym «Čornaje lusterka» adstupaje ad svajoj znakamitaj zmročnaści, za jakuju sieryjał časam krytykujuć. Niezdarma fanaty navat źviarnulisia da Netflix z zaklikam źniać «Biełaje lusterka», dzie raskazvałasia b pra tuju karyść, jakuju prynosiać u śviet technałohii.
Jašče adna śvietłaja i vielmi čałaviečaja sieryja — epizod pad nazvaj Eulogy. Stały mužčyna atrymlivaje zvanok pra toje, što jaho byłaja kachanaja pamierła, i ciapier jaje rodnyja źbirajuć uspaminy pra jaje. Admysłovaja technałohija dapamahaje mužčynie trapić u realnaść fotazdymkaŭ, što ŭvasablajuć jaho raman z toj žančynaj, i pražyć pačućci, ad jakich jon, vidać, chavaŭsia, a zaadno pabačyć prapuščanyja mahčymaści — rychtujcie nasoŭki!
Asobnaja historyja — heta epizod pad nazvaj USS Callister: Into Infinity. Navat kali vy nie fanat navukovaj fantastyki, ciažka nie acanić kolkaść sił i resursaŭ, vydatkavanych — i niezdarma — na hety paŭnavartasny film praciahłaściu paŭtary hadziny.
«Čornaje lusterka» krytykujuć za toje, što sieryjał byccam sastareŭ: maŭlaŭ, my i tak žyviom u toj realnaści, jakuju jon nam pradkazvaŭ raniej. I tut treba skazać, što ŭ 7-m siezonie stvaralniki zrabili pracu nad pamyłkami, bo historyi z hetaha siezonu vyhladajuć całkam realnymi dla bližejšaj budučyni. Tamu, mahčyma, nievialičkaje papiaredžańnie nam sapraŭdy nie paškodzić.
Novaje «Čornaje lusterka» vyhladaje bolš emacyjnym i śvietłym za raniejšyja siezony, bolš padobnyja da cyničnaj i šakujučaj antyŭtopii. Ale pry hetym prajekt nie adstupaje ad svajoj fiłasofii i raniejšych zaściarohaŭ nakont technałahičnaha prahresu. Kali vy chacieli adkryć dla siabie «Čornaje lusterka», ciapier samy čas.
«Naša Niva» — bastyjon biełaruščyny
PADTRYMAĆ
Kamientary