Brytanija znajšła ŭ svaich vodach špijonskija datčyki Rasii dla sačeńnia za submarynami
Vajskoŭcy Złučanaha Karaleŭstva niadaŭna znajšli ŭ mory vakoł Brytanii špijonskija datčyki, imavierna ŭstalavanyja Rasijaj dla sačeńnia za atamnymi padvodnymi łodkami Vialikabrytanii.
Pra heta piša The Sunday Times — vydańnie havaryła z vajskoŭcami i byłymi ministrami abarony ab tym, jak Rasija moža ŭžyvać svaje zdolnaści na mory dla padrychtoŭki dyviersij suprać Vialikabrytanii. Asnoŭnaje pierakazvaje «Jeŭrapiejskaja praŭda».
Niadaŭna brytanskija vajskoŭcy znajšli ŭ mory datčyki, jakija ličać rasijskimi špijonskimi pryładami. Niekatoryja ź ich sarvalisia z macavańniaŭ i byli prybityja chvalami na bierah, dzie ich i znajšli. Jašče šerah znajšli z dapamohaj fłotu. Žurnalisty vyrašyli nie raskryvać miescy, dzie byli znojdzieny pryłady, i niekatoryja inšyja detali ź mierkavańniaŭ nacbiaśpieki.
Vajskoŭcy ličać, što datčyki ŭstalavali rasiejcy z metaj zboru infarmacyi ab brytanskich atamnych padvodnych łodkach. Adna ź ich pastajanna znachodzicca ŭ mory ŭ ramkach mier strymlivańnia.
U publikacyi taksama tłumačać, jakuju pahrozu Rasija moža ŭjaŭlać dla krain NATO svaimi padvodnymi mahčymaściami, jakija Maskva nie spyniała raźvivać i paśla «chałodnaj vajny», i što Rasija maje vyklučnyja srodki dla padvodnaj vajny i špijanažu, ź jakich niekatoryja mohuć i pieraŭzychodzić zdolnaści Brytanii i inšych krain NATO.
Taksama adznačajuć, što jašče da poŭnamaštabnaha napadu Rasii na Ukrainu Kreml pačaŭ rychtavacca da patencyjnaj vajny z NATO, i hetaja stratehija ŭklučała padrychtoŭku da dyviersij suprać padvodnaj infrastruktury.
Taksama niekalki surazmoŭcaŭ skazali ab najaŭnaści davoli pierakanaŭčych vyvieddanych ab tym, što da lutaha 2022 hoda jachty rasijskich aliharchaŭ mahli ŭdzielničać u špijonskaj dziejnaści Rasii ŭ vodach vakoł Brytanii. U pryvatnaści, na niekatorych ź ich byli ŭsie techničnyja srodki, kab ustalavać ci atrymać padvodnaje špijonskaje abstalavańnie.
Kamientary