Mikrapłastyk spryjaje raspaŭsiudžvańniu supierbakteryj, ustojlivych da antybijotykaŭ
Novaje daśledavańnie pakazała, što mikrapłastyk nie prosta pieranosić bakteryi — jon dapamahaje im stanavicca ŭstojlivymi da antybijotykaŭ navat pry ich adsutnaści ŭ navakolnym asiarodździ. Heta ŭjaŭlaje surjoznuju pahrozu dla zdaroŭja ludziej.
Čaścicy mikrapłastyku šyroka raspaŭsiudžany ŭ pryrodzie, a ściokavyja vody stali adnoj z asnoŭnych krynic ich nazapašvańnia. Adnačasova z hetym navukoŭcy adznačajuć rost ustojlivaści bakteryj da antybijotykaŭ, što ŭ mnohim źviazana z uździejańniem faktaraŭ navakolnaha asiarodździa. Viadoma, što bakteryi ŭtvarajuć kałonii na pavierchni mikrapłastyku, stvarajučy tak zvanuju «płastyśfieru».
Jak piša Scitech Daily, navukoŭcy Bostanskaha ŭniviersiteta (ZŠA) daśledavali, jak mikrapłastyk upłyvaje na raźvićcio ŭstojlivaści bakteryj va ŭmovach, blizkich da realnych. Jany pratestavali try typy płastyku: polistyroł (vykarystoŭvajecca ŭ upakoŭcy, naprykład, pienapłast); polietylen (ź jaho vyrablajuć pakiety z zašpilkaj zip-lock); poliprapilen (užyvajecca ŭ kantejnierach i butelkach).
Čaścicy płastyku pamieram ad 10 mikramietraŭ da 0,5 milimietra źmiaścili ŭ asiarodździe z bakteryjami kišečnaj pałački (Escherichia coli) na 10 dzion. Kožnyja dva dni navukoŭcy praviarali, nakolki pavialičyłasia ŭstojlivaść bakteryj da čatyroch antybijotykaŭ: ampicylinu, cyprafłaksacynu, doksicyklinu i streptamicynu.
Vyniki, apublikavanyja ŭ časopisie Applied and Environmental Microbiology, pakazali, što niezaležna ad pamieru i kancentracyi, mikrapłastyk spryjaŭ raźvićciu ŭstojlivaści kišečnaj pałački da ŭsich čatyroch antybijotykaŭ.
Jašče adna tryvožnaja vysnova daśledavańnia zaklučajecca ŭ tym, što bakteryi zachoŭvali ŭstojlivaść da antybijotykaŭ navat paśla taho, jak mikrapłastyk i antybijotyki byli vydaleny z navakolnaha asiarodździa.
Jak adznačajuć aŭtary, ich vysnovy staviać pad sumnieŭ raspaŭsiudžanaje ŭjaŭleńnie pra toje, što mikrapłastyk — heta prosta pasiŭny pieranosčyk ustojlivych bakteryj, i padkreślivajuć jaho rolu jak aktyŭnaha ačahu evalucyi ŭstojlivaści da supraćmikrobnych preparataŭ.
Asabliva niebiaśpiečnym akazaŭsia polistyroł, jaki pryvodziŭ da najvyšejšaha ŭzroŭniu ŭstojlivaści. Adzin z klučavych miechanizmaŭ — farmiravańnie bijaplonki, jakaja pavyšaje vyžyvalnaść bakteryj i ich supraciŭlalnaść antybijotykam.
Jak adznačajuć śpiecyjalisty, atrymanyja vyniki padkreślivajuć nieabchodnaść terminovych mier pa baraćbie z zabrudžvańniem mikrapłastykam u ramkach stratehii pa źmianšeńni antymikrobnaj ustojlivaści.
Kamientary