Najbujniejšy ŭ śviecie ajśbierh sieŭ na miel kala bierahoŭ Antarktydy
Najbujniejšy ŭ śviecie ajśbierh, jakomu prysvojena nazva Ajśbierh A23a, zatrymaŭsia na miełkavodździ la addalenaha brytanskaha vostrava Paŭdniovaja Hieorhija ŭ paŭdniovaj častcy Atłantyki, dzie žyvuć miljony pinhvinaŭ i ciuleniaŭ, piša Bi-bi-si.
Ajśbierh, pamier jakoha prykładna ŭ dzieviać razoŭ pieraŭzychodzić Minsk, vidavočna, sieŭ na miel la paŭdniova-zachodnich bierahoŭ vostrava i nieŭzabavie pačnie razburacca.
Rybaki zaniepakojeny tym, što vielizarnyja kavałki lodu mohuć niehatyŭna paŭpłyvać na žyćcio redkich čubatych pinhvinaŭ, jakija kormiacca ŭ hetym rehijonie. Adnak navukoŭcy, što vyvučajuć Antarktydu, adznačajuć, što ŭnutry ldoŭ utrymlivajecca vialikaja kolkaść pažyŭnych rečyvaŭ, jakija pry rastavańni, naadvarot, aktyvizujuć žyćcio ŭ akijanie.
— Heta ŭsio roŭna što skinuć «pažyŭnuju bombu» pasiarod pustyni, — kaža prafiesar Nadzin Džonstan z Brytanskaj antarktyčnaj słužby.
— Kali jon raskolecca, to novyja ajśbierhi, chutčej za ŭsio, buduć ujaŭlać niebiaśpieku dla sudnaŭ, što kursujuć u hetych vodach, i abmiažujuć dostup da rybałavieckich uhodździaŭ vostrava, — papiaredžvaje ekołah Mark Biełšyr, jaki kansultuje ŭrad Paŭdniovaj Hieorhii.
«Pasadka na miel» stała apošnim pavarotam u amal 40-hadovaj historyi ajśbierha A23a, jaki adkałoŭsia ad šelfavaha lednika Filchniera-Rone ŭ 1986 hodzie.
Spadarožnikavyja zdymki pakazvajuć, što ŭ śniežni 2023 hoda jon, narešcie, vyrvaŭsia z pałonu akijaničnaha vichru i pačaŭ ruchacca na poŭnač praz rajon, viadomy jak «aleja ajśbierhaŭ», dzie vada ciaplejšaja. Pry hetym ajśbierh ździviŭ navukoŭcaŭ svajoj tryvałaściu. Niekalki dzion jon navat, zdavałasia, kruciŭsia na miescy, ale ŭ siaredzinie lutaha pačaŭ paskaracca, ruchajučysia pryblizna 30 km u dzień.
— Los usich ajśbierhaŭ — rastavańnie. Dzivosna nazirać, što A23a isnuje tak doŭha i straciŭ usiaho kala čverci svajoj płoščy, — adznačyŭ prafiesar Chju Hryfits u intervju BBC z palarnaha daśledčaha karabla sera Devida Atenbora, jaki ciapier znachodzicca ŭ Antarktycy.
U subotu ledziany hihant vyšynioj 300 mietraŭ urezaŭsia ŭ kantynientalny šelf prykładna za 80 km ad bieraha i, miarkujučy pa ŭsim, nadziejna tam zatrymaŭsia.
— Jon, vierahodna, zastaniecca tam, dzie znachodzicca, pakul ad jaho nie pačnuć adkołvacca kavałki, — kaža prafiesar Endru Miejiers z Brytanskaj antarktyčnaj słužby.
Ciapier čytajuć
Navukoviec raspavioŭ pra hieałahičnyja zahadki Biełarusi: irtuć ź ziamli i kratar ad padzieńnia mietearyta, jaki źniščyŭ usio žyvoje ŭ radyusie tysiač kiłamietraŭ99
Kamientary