Chto ŭznačaliŭ naziralnuju radu Pryjorbanka paśla źmieny ŭłaśnika
Im staŭ viadomy ŭ AAE bankaŭski śpiecyjalist i aŭdytar.
Nahadajem, u kancy listapada minułaha hoda aŭstryjski Raiffeisen Bank International zaviaršyŭ ździełku pa prodažy Pryjorbanka małaviadomaj kampanii Soven 1 Holding z AAE. Kamientujučy prodaž, staršynia praŭleńnia RBI Jochan Štrobl nazvaŭ heta «važnym krokam u imknieńni źnizić ryzyki prysutnaści va Uschodniaj Jeŭropie». U RBI aceńvali ahulnyja straty ad hetaj ździełki ŭ 824 miljony jeŭra, ź jakich 311 miljonaŭ — straty ad prodažu aktyvu pa canie nižej za bałansavy košt.
28 lutaha ŭ Pryjorbanku prajšło pasiadžeńnie naziralnaj rady z asabistym udziełam staršyni rady Chamisa Bucharuna Al-Šamsi, paviedamiła pres-słužba banka. Padčas sustrečy ŭdzielniki «abmierkavali biahučyja pytańni, źviazanyja ź dziejnaściu banka, jaho kiravańniem i stratehičnym raźvićciom».
Chamis Bucharun Al-Šamsi naradziŭsia ŭ 1964 hodzie. Jon pachodzić ź siamji Al-Šamsi, adnoj z 10 samych upłyvovych u AAE.
Za jaho plačyma 11 hadoŭ pracy ŭ Centralnym banku AAE, dzie jon byŭ pamočnikam dyrektara pa ŭnutranym aŭdycie. Akramia taho, 14 hadoŭ pracavaŭ u Abu Dhabi Islamic Bank na roznych kirujučych pasadach.
Zaraz Chamis Bucharun Al-Šamsi źjaŭlajecca kiroŭnym dyrektaram kampanii Royal Capital, jakaja akazvaje inviestycyjna-bankaŭskija pasłuhi pa kiravańni aktyvami. Akramia hetaha, jon uvachodzić u rady dyrektaraŭ jašče šerahu kampanij. Bolšaść hetych biznesaŭ źviazana z kirujučymi siemjami ŭ AAE.
Niahledziačy na źmienu ŭłaśnika, skład praŭleńnia Pryjorbanka nie źmianiŭsia.
Svaje pazicyi zachavali staršynia praŭleńnia Vadzim Maciuškin i jaho namieśniki Uładzimir Dziadziul, Andrej Ivankievič i Biernd Rozienbierh.
Kamientary