Najezdy Trampa pryviali da skačka papularnaści libierałaŭ u Kanadzie

Apytańni hramadskaj dumki ŭ studzieni davali kansiervataram 20-pracentnuju, a časam i 25-pracentnuju pieravahu nad libierałami. Heta vyklikała bunt unutry Libieralnaj partyi, premjera Džaścina Trudo zmusili zajavić pra adstaŭku.

Ale varta było Trampu pačać ataki na Kanadu, ahučyć pahrozy pavyšeńnia taryfaŭ i zakliki da kanadcaŭ dałučycca da ZŠA ŭ jakaści 51-ha štata, jak usio pamianiałasia. Padtrymka libierałaŭ rezka vyrasła, bo kansiervatary, choć taksama stajać na pazicyjach abarony suvierenitetu, u sacyjalnych pytańniach iduć na vybary na płatformie, jakaja šmat u čym napaminaje trampisckuju.

Tramp zajaŭlaŭ pra Kanadu, što «biez našaj padtrymki kraina pierastanie isnavać». A jahony daradca Iłan Mask nazvaŭ Kanadu «niesapraŭdnaj krainaj».

Vybary ŭ Kanadzie majuć prajści da 25 kastryčnika 2025 hoda, ale nie vyklučana, što akrylenyja rostam papularnaści libierały praviaduć ich raniej.

Novym lidaram libierałaŭ moža stać 59-hadovy Mark Karni, były kiraŭnik nacyjanalnych Banka Kanady i Banka Anhlii. Ź im za pasadu zmahajecca Chryścia Fryłand — palityk z ukrainskimi karaniami. Jana maje dośvied pracy ministram finansaŭ i zamiežnych spraŭ.

Apytańnie hramadskaj dumki, praviedzienaje kampanijaj Ekos, vyniki jakoha byli apublikavanyja 24 lutaha, daje libierałam 38,4% hałasoŭ, a kansiervataram — 37%. Jašče 11,8% vybarcaŭ hałasavali b za levuju Novuju demakratyčnuju partyju, jakaja tradycyjna schilnaja da chaŭrusu ź libierałami. U frankamoŭnaj pravincyi Kviebiek lidarstva zachoŭvaje niezaležnicki Kviebiekski błok.

Kanada ekanamična mocna źviazanaja z ZŠA i zaŭsiody raźličvała na amierykanski abaronny parason. Armija Kanady paraŭnalna słabaja, a vydatki na abaronu — minimalnyja, pry hetym kraina ŭvachodzić u NATA i G7. Sacyjalnaja sistema Kanady nahadvaje jeŭrapiejskija. U adroźnieńnie ad ZŠA, u krainie — biaspłatnaje ŭsieahulnaje miedabsłuhoŭvańnie.

40-miljonnaja Kanada — druhaja pa płoščy kraina śvietu, ale, jak i ŭ Rasii, jaje abšyrnyja paŭnočnyja terytoryi słabazasielenyja. Źmiena klimatu, adnak, adkryvaje dostup da patencyjna hihanckich pakładaŭ karysnych vykapniaŭ u Arktycy. 

Naporysty kurs administracyi Trampa šturchaje Kanadu da zbližeńnia ź jeŭrapiejskimi sajuźnikami. Premjer Trudo 24 lutaha naviedaŭ Kijeŭ — vyrazny znak padtrymki ŭ čas, kali Tramp zalacajecca da Rasii.

• 18
• 1
• 3
• 2
• 0
• 0
• 0
• 0