ZŠA hałasavali ŭ AAN pa rezalucyi nakont vajny va Ukrainie razam z Rasijaj i Biełaruśsiu
Hienieralnaja Asambleja AAN padtrymała rezalucyju ab vajnie va Ukrainie, inicyjavanuju Ukrainaj i Jeŭropaj. U joj Rasiju nazyvajuć krainaj-ahresaram i patrabujuć vyvieści vojski z terytoryi Ukrainy ŭ miežach jaje mižnarodna pryznanych miežaŭ. Ale kali raniej heta byŭ chutčej rytualny krok z prahnazavanym vynikam, to ciapier abstaviny źmianilisia.
Za prajekt rezalucyi prahałasavali 93 krainy, suprać — 18, ustrymalisia — 65.
Pierad hałasavańniem ZŠA razasłali krainam — siabroŭkam AAN — list z zaklikam hałasavać za ich varyjant rezalucyi, jakaja nie nazyvaje Rasiju ahresaram, a zaklikaje «nieadkładna spynić kanflikt». Ukrainska-jeŭrapiejskuju rezalucyju amierykanskaja delehacyja nie padtrymała.
U vyniku ŭpieršyniu z 2022 hoda akazałasia, što Rasija i ZŠA hałasavali pa pytańni vajny va Ukrainie ŭ AAN adnolkava — suprać rezalucyi z asudžeńniem Rasii.
Inšyja 16 krain, jakija hałasavali suprać — Biełaruś, Burkina-Faso, Burundzi, Vienhryja, Haici, Izrail, KNDR, Mali, Maršałavy astravy, Nihier, Nikarahua, Pałau, Sudan, Centralnaafrykanskaja Respublika, Ekvataryjalnaja Hvinieja, Erytreja.
Jak bačna ź pieraliku, heta ŭ asnoŭnym, za vyklučeńniem ZŠA i Izraila, viadomyja sajuźniki ci klijenty Rasii. Bolšaść navat sajuznych ZŠA krain, za vyklučeńniem pary maleńkich astraŭnych cichaakijanskich dziaržaŭ, akazalisia ŭ hety momant całkam padtrymać rezki amierykanski źniešniepalityčny pavarot nie hatovyja.
Kitaj, Iran i Indyja pry hałasavańni ŭstrymalisia.
Zrešty, nieŭzabavie było praviedziena hałasavańnie AAN užo adnosna amierykanskaj rezalucyi «Šlach da miru». Za jaje prahałasavali 93 dziaržavy — člena AAN, suprać vystupili 8, 73 — ustrymalisia. Ukraina była adnoj ź dziaržaŭ, jakija ŭstrymalisia.
Hienasambleja AAN adnačasova adchiliła rasijskuju papraŭku «ab nieabchodnaści likvidacyi karennych pryčyn ukrainskaha kryzisu»: suprać jaje vykazałasia 71 dziaržava, a padtrymała — tolki 31.
Roŭna try hady tamu pačałosia poŭnamaštabnaje ŭvarvańnie Rasii va Ukrainu. Jak źmianiłasia Ukraina za hety čas
«Redkaziamielnyja mietały, nafta, i ŭsio, što zmožam atrymać»: Tramp zajaviŭ, što jašče choča zamiest «układzienych va Ukrainu hrošaj»
AAN: Z pačatku vajny va Ukrainie zabita bolš za 12 600 cyvilnych asob
Kamientary