BCHD: Adzin ź lidaraŭ partyi Jaŭhien Dudkin pryznaŭsia, što źjaŭlajecca daŭnim ahientam KDB

Jaŭhien Dudkin — 36-hadovy palityčny dziejač u emihracyi, biełaruskamoŭny ŭśmiešlivy chryścijanski demakrat u stylovym kapielušy. Ź Biełarusi jon, nastaŭnik pa adukacyi i rehijanalny aktyvist pa žyćci, źjechaŭ jašče ŭ 2018-m, asieŭ u Polščy jak ekanamičny mihrant.

Paśla 2020-ha, tak atrymałasia, dziasiatki ci navat sotni tysiač palityčnych mihrantaŭ rušyli ź Biełarusi na Zachad. Palityčnaje žyćcio zaviravała ŭ Varšavie, i Dudkin pakrysie znoŭ uciahnuŭsia ŭ praces.

Ciapier jon užo nie roznarabočy i nie kiroŭca pahruzčyka, a kiraŭnik fondu «Biełaruskaja chryścijanskaja demakratyja» (Białoruska Chrześcijańska Demokracja), zaciaty krytyk Śviatłany Cichanoŭskaj i ź niadaŭniaha času sajuźnik Zianona Paźniaka.

Adnak moža tak stacca, što ŭ palityčnaj karjery Dudkina hučyć apošni akord. Jak stała viadoma «Našaj Nivie», polskija siłavyja viedamstvy znajšli dokazy taho, što Dudkin — zavierbavany ahient biełaruskich śpiecsłužb.

Biełaruskich aktyvistaŭ vyklikajuć na dopyty, sprabujuć razabracca, ci viedaŭ chtości pra ahienckuju dziejnaść Dudkina.

Pakul my rychtavali hety artykuł i apytvali siabroŭ BCHD, arhanizacyja vypuściła zajavu:

«Baraćba z režymam vymušaje biełaruskija partyi i arhanizacyi być pilnymi i ačyščacca ad vorahaŭ, zasłanych u roznyja hady. Pa šmatlikich skarhach siabroŭ BCHD — Białoruska Chrześcijańska Demokracja fundacja na dziejańni staršyni fundacyi była praviedziena pravierka, padčas jakoj vyjaviłasia sproba rejdarskaha zachopu arhanizacyi Jaŭhienam Dudkinym.

Dalejšyja raźbiralnictvy pa destruktyŭnaj dziejnaści ŭ partyi BCHD hetaj asobaj vyjavili, što Jaŭhien Dudkin daŭno źjaŭlajecca tajemnym supracoŭnikam KDB. Pra što jon sam paćvierdziŭ na pasiadžeńni Upravy partyi BCHD 30 studzienia 2025 hoda ŭ prysutnaści siabroŭ partyi».

Krynicy «NN» adznačajuć, što Dudkin nibyta pryznaŭsia, što byŭ zavierbavany jašče padčas vučoby ŭ Mahiloŭskim univiersitecie ŭ kancy 2000-ch ci pačatku 2010-ch.

Sam Dudkin nie adkazaŭ na paviedamleńni i zvanki karespandenta «NN». Kali jon zachoča vykazacca, my damo jamu takuju mahčymaść.

Apošnija dni palityk piša ŭ fejsbuku mietafaryčnyja dopisy na temu viny i zdrady:

«U kožnaha palityka-chryścijanina jość adzin važny etap u žyćci jak u Jezusa: zdrada za hrošy — ukryžavańnie paplečnikami — palityčnaja śmierć. I tut dla viernych Bohu isnuje palityčnaje ŭvaskrasieńnie. Ale ŭmova — čystaje sumleńnie».

«Jak lohka skazać, što «ja apošni hrešnik» ci abvinavacić i jak ciažka nazvać pa imieni svoj hrech. … Chacia i apostał Pavieł nie adrazu atrymaŭ davier ad apostałaŭ: nie vieryli, što jon źmianiŭ svajo žyćcio, i z zabojcy chryścijan staŭsia ich abaroncam. Čas pakazaŭ. Čas».

***

Paśla 2020 hoda Biełaruskaja chryścijanskaja demakratyja padzialiłasia na dźvie častki — adnu ź ich uznačaliŭ Hieorhij Dźmitruk (tut u kiraŭnictvie byŭ i Jaŭhien Dudkin), siarod lidaraŭ druhoj Vital Rymašeŭski.

Partyja Dźmitruka i Dudkina ŭstupiła ŭ kaalicyju z aktyvistami kolišniaj «Narodnaj Hramady», jakuju ciapier uznačalvaje Jaŭhien Vilski. Darečy, minimum dva aktyvisty «Hramady» akazalisia danosčykami — stučali na inšych palitykaŭ u KDB.

Na vybarach u Kaardynacyjnuju radu kaalicyja BCHD i «Hramady» zaniała pieradapošniaje miesca. Ciapier jany abjadnalisia z tymi, chto staŭ uvohule apošnim, i ŭtvaryli błok «Miemarandum», jaki asprečvaje lidarstva Śviatłany Cichanoŭskaj.

* * *

Jaŭhien Dudkin naradziŭsia 1 śniežnia 1989 hoda ŭ Mahilovie ŭ siamji milicyjaniera. Vyras u Hrodnie. Skončyŭ škołu №13 u Hrodnie, histaryčny fakultet Mahiloŭskaha dziaržaŭnaha ŭniviersiteta i mahistraturu. Mahistarskuju pracu pryśviaciŭ biełaruskamu pytańniu ŭ polskaj nacyjanalnaj palitycy mižvajennaha času.

Adpracavaŭ raźmierkavańnie ŭ škołach Białynickaha rajona na Mahiloŭščynie, paźniej pracavaŭ u škole ŭ Hrodnie, byŭ zahadčykam doma narodnaj tvorčaści ŭ vioscy Zaračanka Hrodzienskaha rajona.

Pavialičyć

U apošnija hady Dudkin aktyŭna atakavaŭ jak Śviatłanu Cichanoŭskuju, tak i niezaležnyja ŚMI. Jon byŭ adnym z suarhanizataraŭ akcyi ŭ Varšavie, jakaja była praviedzienaja ŭ piku maršu biełarusaŭ z pratestam suprać falsifikacyi vybaraŭ, u jakoj udzielničali Śviatłana Cichanoŭskaja i Pavieł Łatuška.

• 5
• 2
• 19
• 67
• 1
• 3
• 17
• 1