Bieły dom apublikavaŭ aficyjny fotazdymak pieršaj łedzi Miełanii Tramp
Na fota — elehantnaja, mocnaja, nadzvyčaj upeŭnienaja ŭ sabie žančyna. Čorna-bieły zdymak jaskrava demanstruje, što štany ŭ Avalnym kabiniecie nosić nie tolki novaabrany prezident, iranizuje redaktar Bild Alaksandr Chajnien.
Vobraz Miełanii nahadaŭ jamu hučny sieryjał pra amierykanskuju palityku «Kartačny domik» i aktrysu Robin Rajt u roli Kłer Andervud, jakaja stanovicca prezidentam ZŠA.
«Poza žonki Trampa taksama naŭrad ci była vybrana vypadkova: składzienyja palcy na paliravanym stale, drapiežny pozirk, jaki fiksuje hledača. Miełanija apranuta ŭ ciomny błejzier i ciomnyja štany, a biełaja rasšpilenaja kašula śviedčyć pra rašučaść i enierhičnaść. Mova cieła Miełanii Tramp na aficyjnych fotazdymkach pieršaj łedzi dziŭna nahadvaje movu cieła Kłer Andervud z paśpiachovaha palityčnaha sieryjała «Kartačny domik». Kłer <…> simvalizuje vobraz sučasnaj žančyny, zdolnaj zajavić pra siabie ŭ takich tradycyjna mužčynskich śfierach, jak palityka i biźnies, dziakujučy sile voli, ambicyjam, chałodnaj racyjanalnaści i stratehičnamu myśleńniu — jakaściam, jakija taksama prypisvajuć Miełanii.
Pieraŭtvareńnie Miełanii stanovicca ŭsio bolš vidavočnym: padčas pieršaha prezidenckaha terminu Donalda Trampa byłaja top-madel starałasia pracavać na zadnim płanie. Časam zdavałasia, što jana śviadoma imkniecca paźbiahać blizkaści z mužam. Z pačatkam druhoha prezidenckaha terminu pieršaja łedzi źjaŭlajecca na publicy spakojnaj i ŭpeŭnienaj u sabie. Zdajecca, jana całkam pryniała svaju rolu i, mahčyma, vynošvaje značna bolš maštabnyja płany…»
Siońniašni fotazdymak rezka adroźnivajecca ad partreta pieršaj łedzi ŭ 2017 hodzie, na jakim jana vyhladaje amal saramlivaj. Na dumku Chajniena, heta padkreślivaje pavyšanyja ambicyi pieraŭtvoranaj Miełanii.
Kamientary