Biełarusy mohuć zastacca biez šenhiena, navat kali jaho atrymali. Źjaviłasia novaja tendencyja anulavańnia viz

«Apošnim časam sustrakajecca ŭsio bolš historyj pra anulavańnie. Asnoŭnaja pryčyna — admiena reziervacyi hatelaŭ, paznačanych padčas padačy dakumientaŭ, — havoryć vizavaja ekśpiertka i redaktarka visaflow.live Anastasija Łysakoŭskaja. — Asabliva časta my z kalehami zaŭvažajem heta ŭ takich krain, jak Bałharyja i Vienhryja, radziej — Hrecyja. Čytała, što padobnaja situacyja ŭźnikaje i ŭ konsulstvie Rumynii, ale ja z takim nie sutykałasia. Pa astatnich krainach — Ispanija, Italija, Francyja, Hiermanija, Polšča — takoha nie nazirajecca».

Prava anulavańnia šenhiena prapisanaje ŭ art. 34 Vizavaha kodeksa ES. Siarod inšaha ŭ im havorycca: «Viza moža być skasavanaja ŭ tym vypadku, kali vyjaŭlena, što ŭmovy vydačy pierastali vykonvacca».

«Dumaju, siudy i možna adnieści admienu reziervacyi», — adznačaje surazmoŭca.

Anastasija kaža, što vypadki, kali šenhien zabirali praz skasavańnie reziervacyi, byli i raniej. Prosta ŭ 2024-m jana i jaje kalehi pačali sutykacca ź imi čaściej.

Jak konsulstva daviedvajecca, što čałaviek admoviŭsia ad reziervacyi? U surazmoŭcy niama dakładnaha adkazu.

«Dumajem, supracoŭniki konsulstva mohuć praviarać reziervacyju paśla vydačy vizy, — razvažaje jana. — Taksama niekatoryja hateli mohuć pieradavać infarmacyju konsulstvu pra častuju admienu reziervacyj».

Pavodle nazirańniaŭ Anastasii, u takich vypadkach, jak praviła, rašeńnie pra anulavańnie konsulstvy prymajuć jašče da pajezdki.

«Jany mohuć źviazacca z uładalnikam vizy dla aktualizacyi infarmacyi. Naprykład, Hrecyja moža paprasić paćviardžeńnia apłaty hatela, i kali jaho niama, to čałavieka čakajuć nie vielmi dobryja naviny, — kaža śpiecyjalistka. — Bałharyja i Vienhryja mohuć dasłać list pra anulavańnie na elektronnuju poštu».

Pavodle Anastasii, kali vas paprosiać padać abnoŭlenyja źviestki pra reziervacyju, važna zrabić heta svoječasova.

«U lubym vypadku paśla takoha papiaredžańnia vašaja pajezdka budzie znachodzicca pad asablivym kantrolem», — nahadvaje jana.

A za što jašče mohuć zabrać vizu?

Stracić vizu možna ŭ tych vypadkach, kali atrymaŭ jaje, naprykład, pad kankretny tur, ale ŭ jaho nie pajechaŭ.

Uvachodzić u śpis i parušeńnie pravił metavaha vykarystańnia. Takim ličycca i vypadak, kali čałaviek nie pajechaŭ u krainu, jakaja vydała jamu vizu.

«Byŭ taki precedent, kali turysty z hrečaskimi vizami jechali ŭ Ispaniju i trapili na pravierku ŭ Hiermanii, paśla čaho im ich anulavali, — pryvodzić prykład ekśpiertka. — Čamu tak zdaryłasia? Chutčej za ŭsio, šenhien u ich byŭ na termin pajezdki (naprykład, na 14 dzion z «kalidoram» 30). Jon moh być adnarazovy ci mult, tut niavažna. Važnaje toje, što pa hetych dakumientach jany musili bolšuju častku terminu znachodzicca ŭ Hrecyi. A pakolki aŭtobus jechaŭ u Ispaniju, niemcy, vidać, paličyli, što ludzi naŭrad ci paśpiejuć trapić jašče i ŭ Hrecyju».

Jašče siarod pryčyn — nieadpaviednaść vizy zajaŭlenaj mecie pajezdki. Naprykład, čałaviek jedzie pa turystyčnym šenhienie, pačynaje ŭ ES kamiercyjnuju dziejnaść, i jaho na hetym łoviać.

«Ci jon jedzie pa turystyčnaj vizie, a na miažy kaža: «Meta vizitu — biznes-pajezdka (hości ci kanfierencyja)», — pryvodzić prykłady surazmoŭnica. — Heta taksama moža vyklikać dadatkovyja pytańni i nie vielmi dobry vynik».

Pavodle Anastasii, jašče adna častaja źjava — anulavańnie nacyjanalnaj pracoŭnaj vizy Polščy.

«Asnoŭnaja pryčyna — jaje vykarystańnie nie pa pryznačeńni. Pracoŭnaja pryznačanaja dla pracoŭnaj dziejnaści ŭ Polščy. Častyja pierasiačeńni miažy mohuć vyklikać padazreńni ŭ pamiežnikaŭ, što moža pryvieści da anulavańnia vizy, — adznačaje śpiecyjalistka. — U takich vypadkach heta čaściej za ŭsio adbyvajecca na miažy paśla pravierki i vyjaŭleńnia niametavaha vykarystańnia».

Pry hetym Anastasija papiaredžvaje: anulavańnie — nie prysud, i ŭ budučyni čałaviek zmoža znoŭ atrymać šenhien. Adnak varta razumieć: kali paśla niepryjemnaha precedentu vy pryjdziecie ŭ toje ž konsulstva, dakumienty «buduć razhladać pad łupaj».

«I kali pastaviać adnarazovuju vizu pad daty pajezdki, heta ŭžo budzie dobry vynik», — adznačaje surazmoŭca.

• 5
• 0
• 3
• 3
• 0
• 1
• 0
• 0