Dopyt Uschopčyka prynios Łukašenku zaprašalnik u Vilniu

Litoŭskija krynicy paviedamlajuć, što Hrybaŭskajcie zaprasiła Łukašenku na śviatkavańnie 20-hodździa adnaŭleńnia niezaležnaści svajoj krainy. Kali infarmacyja dakładnaja, to niama sumnievu, što daŭ plon dopyt hienierała Uschopčyka.

Dniami jaho dapytali ŭ biełaruskaj Hienprakuratury i nakiravali pratakoł u Vilniu. Jak tam i chacieli.

Minsk doŭha ŭparciŭsia, kali litoŭcy bambardavali zapytami pa «spravie Uschopčyka». Nahadaju: jaho, kolišniaha kamandzira vilenskaha harnizonu, u susiedniaj krainie vinavaciać za kryvavyja padziei studzienia 1991 hoda.

Pytańnie Uschopčyka stała simvaličnym dla abodvuch bakoŭ. Vilnia prahnie sudu nad tym, chto, jak miarkujecca, datyčny da hibieli zmaharoŭ za niezaležnaść. Minsk ža jaŭna nie choča zdavać byłoha savieckaha hienierała, katory, maŭlaŭ, byŭ abaviazany vykonvać zahady Maskvy.

U rešcie reštaŭ Hrybaŭskajcie, jakuju krytykavali jašče za letašni vizit aŭtarytarnaha susieda, musiła naŭprost vystavić umovu, źviazaŭšy zaprašeńnie na ŭračystaści 11 sakavika z «pierałomam» u pytańni pra Uschopčyka.

Naturalna, jahony dopyt — nie samadziejnaść ajčynnych prakuroraŭ. Jany b i palcam nie varuchnuli biez admaški. Heta aznačaje, što

Łukašenku, pry ŭsioj jahonaj bravadzie (nam Jeŭropa nie ŭkaz!), usio ž chaciełasia atrymać zaprašeńnie ad kalehi ź Jeŭraźviazu.

I ŭvohule, u dačynieńniach ź Jeŭropaj pajšła adkrutka nazad. Zrobleny revierans pierad Varšavaj: 9 sakavika admysłovaja kamisija, jakuju Łukašenka paabiacaŭ stvaryć, kali hutaryŭ u Kijevie z polskim ministram Sikorskim, pačnie raźbiracca z prablemami Źviazu palakaŭ. I Varšava apryjory ścišyła ton. Litoŭcy, jak bačym, taksama zadavalniajucca simvaličnym žestam, bo, jak zaznačaje palitołah Valer Karbalevič, nichto Uschopčyka vydavać nie źbirajecca.

Biełaruskaje kiraŭnictva vydatna asvoiła mietady manipulavańnia palityčnymi zakładnikami. Ciapier voś u ich lik niečakana trapiŭ i adstaŭny hienierał.

Takim čynam, dopyt Uschopčyka daŭ plon. Zaprašalnik ź Vilni atrymany, ambicyi zadavolenyja. Adnak jechać ci nie jechać na ŭračystaści, Łukašenka vyrašyć tolki ŭ paniadziełak, paviedamlaje partał Delfi.lt.

Tut jość dalikatnyja momanty. Tak, isnuje viersija, što biełaruski kiraŭnik nie vypadkova spaźniŭsia na inaŭhuracyju Janukoviča: maŭlaŭ, nie ŭsie vysokija hości prahli takoha susiedstva.

I jašče pikantny momant: Miadźviedzieŭ ad zaprašeńnia Hrybaŭskajcie admoviŭsia. Kali Łukašenka pajedzie, to heta budzie i vyklik Maskvie. Asabliva kali na vyjedzie prahučać niejkija krasamoŭnyja publičnyja zajavy.

Tak ci inačaj, mienavita

žorstkija pavodziny Rasii zmušajuć Łukašenku davać zadni chod u dačynieńniach ź Jeŭropaj. Spalvać masty nadta ž niedarečy.

Alaksandr Kłaskoŭski.

• 0
• 0
• 0
• 0
• 0
• 0
• 0
• 0