U Biełarusi zaćvierdzili novuju sistemu infarmacyi dla aryjentacyi turystaŭ. Zroblena heta pastanovaj Minsportu ad 12 śniežnia 2024 hoda № 57, apublikavanaj na Nacyjanalnym pravavym partale. Ustupić u siłu dakumient, praŭda, tolki praz hod — z 1 studzienia 2026 hoda.
Sistema turystyčnaj aryjentacyjnaj infarmacyi — heta nabor simvałaŭ (piktahram, hrafičnych malunkaŭ), jakija dapamahajuć turystam aryjentavacca i vykarystoŭvajucca pry padrychtoŭcy ščytoŭ, stendaŭ, pakazalnikaŭ i inšych infarmacyjnych nośbitaŭ.
U Biełarusi padobnaja sistema isnavała ŭžo daŭno, jana była zaćvierdžanaja Minsportu jašče ŭ 2007 hodzie. Ale z tych časoŭ u adpaviedny dakumient ni razu nie ŭnosilisia źmieny, tamu jana ŭžo paśpieła sastareć i stracić aktualnaść.
U novaj sistemie prysutničajuć 70 znakaŭ. Jany vykarystoŭvajucca dla abaznačeńnia abjektaŭ turystyčnaj industryi (ahraekaturyzm, aktyŭny turyzm, hastranamičny turyzm i inš.), transpartu (aŭtavakzał, aeraport, karšerynh i inš.) i hetak dalej.
Simvały malujucca ŭ formie kvadrata ź biełaj akantoŭkaj na karyčnievym fonie z teksturaj znaka žoŭtaha koleru. I tolki turystyčnyja infarmacyjnyja centry buduć paznačanyja ŭ formie kvadrata na zialonym fonie z teksturaj znaka biełaha koleru.
Ź inšaha boku, pa ŭzhadnieńni ź Minsportu ŭ ekśpierymientalnych metach mohuć ustanaŭlivacca simvały, nie praduhledžanyja dakumientam. Ale nieabchodnaść ich vykarystańnia treba budzie abhruntavać.
Piktahramy adlustroŭvajucca ŭ kalarovym, a taksama čorna-biełym varyjancie (dla asob z parušeńniami zroku) z zachavańniem identyčnaści ich tekstury.
Kamientary