U Siryi zatrymali hienierała, adkaznaha za śmiarotnyja prysudy ŭ turmie Sajdnaja
Siły biaśpieki novych siryjskich uładaŭ zatrymali hienierała Muchamieda Kanžo Chasana, jaki byŭ kiraŭnikom vajskovaj justycyi pry režymie Bašara Asada.
Pavodle danych Siryjskaj absiervatoryi pa pravach čałavieka, Chasan byŭ aryštavany ŭ pravincyi Tartus, jakaja źjaŭlajecca apłotam prychilnikaŭ Asada, razam z hrupaj z 20 čałaviek, piša Bild.
Chasana abvinavačvajuć u pramoj adkaznaści za vyniasieńnie šmatlikich śmiarotnych prysudaŭ źniavolenym u viadomaj turmie Sajdnaja, dzie viaźniaŭ padviarhali katavańniam i masavym pakarańniam.
«Jaho imia źviazana ź biesčałaviečnym abychodžańniem sa źniavolenymi i šmatlikimi niepravamiernymi prysudami», — adznačajecca ŭ dakładzie centra VDC, jaki dakumientuje parušeńni pravoŭ čałavieka ŭ Siryi.
Paviedamlajecca, što padčas sproby zatrymańnia Chasana adbyłosia ŭzbrojenaje sutyknieńnie pamiž siłami novaj i byłoj ułady, u vyniku jakoha zahinuli 17 čałaviek, uklučajučy troch pradstaŭnikoŭ byłoha režymu i 14 bajcoŭ novaj administracyi.
Raniej Chasan zajmaŭ pasadu dyrektara vajskovaj sudovaj sistemy i padparadkoŭvaŭsia Ministerstvu abarony Siryi. Pavodle abvinavačvańniaŭ, jon vykarystoŭvaŭ svajo stanovišča dla vymahalnictva hrošaj u siemjaŭ źniavolenych, što dazvoliła jamu nazapasić značny kapitał.
Kamientary
Sam vinavaty: pačaŭ adstrelvacca.