Rasijskija dypłamaty ŭ Arhiencinie byli zaśpiety pjanymi i chavalisia ŭ mašynach ad palicyi i presy. Heta trapiła ŭ žyvy efir
Kiraŭniku miascovaha «Ruskaha domu» i jašče adnamu supracoŭniku rasijskaha pasolstva ŭ Arhiencinie nie pašancavała. Abodva jechali pjanymi ŭ svaich aŭto i amal adnačasova na adnoj i toj ža vulicy narvalisia na palicyju i presu, jakija ŭ toj momant ładzili ŭ žyvym efiry pakazalnyja rejdy suprać pjanych kiroŭcaŭ. Dypłamaty admovilisia zdavać ałkatesty i zapierlisia ŭ mašynach na vačach u miljonaŭ hledačoŭ. Historyja na hetym nie skončyłasia.
Dva supracoŭniki rasijskaha pasolstva ŭ Arhiencinie pa čarzie admovilisia vychodzić z aŭtamabilaŭ na patrabavańnie miascovaj palicyi i prachodzić test na ałkahol. Adzin dypłamat, nastojliva admaŭlajučysia ad ałkatestu, prasiadzieŭ u zamknionaj mašynie kala hadziny, druhi — try hadziny, paviedamlajuć arhiencinskija vydańni Clarin i Pagina 12.
Palicyja ŭ arhiencinskaj stalicy Buenas-Ajres sumiesna z žurnalistami šerahu miascovych telekanałaŭ ź miljonnymi aŭdytoryjami tradycyjna paśla kaladnaj nočy pravodziać prafiłaktyčnyja i pakazalnyja rejdy z metaj vyjavić i publična prysaromić pjanych kiroŭcaŭ.
Jak adznačajuć miedyja, prosta ŭ razhar takich rejdaŭ na nastupnuju ranicu paśla katalickaha Rastva na adnoj i toj ža vulicy z roźnicaj u dźvie hadziny apynulisia dva aŭtamabili z rasijskimi dypnumarami, čyje kiroŭcy demanstravali prykmiety pjanaha vadžeńnia, za što byli spynieny palicyjantami.
Pieršy ź ich — rasijski dypłamat Siarhiej Bałdzin — u adkaz na patrabavańnie vyjści z mašyny i prajści ałkatest skazaŭ, «što jamu treba patelefanavać», padniaŭ akno i pierastaŭ razmaŭlać z palicyjaj, prasiadzieŭšy ŭ začynienym aŭtamabili kala troch hadzin. Ale i zrušyć mašynu ź miesca jon taksama nie zmoh, bo palicyja zabłakavała jaje z dvuch bakoŭ.
Pakul palicyja i presa zdymali na kamiery zabarykadavanaha Bałdzina, na toj ža vulicy praź dźvie hadziny apynuŭsia ŭžo Cimur Sałamacin — adzin z kiraŭnikoŭ miascovaha «Ruskaha domu» — jaki taksama padavaŭ vyhlad pjanaha kiroŭcy. Jon pahadziŭsia pakazać palicyjantam svaje dakumienty, ale admoviŭsia pakidać mašynu i prachodzić test na ałkahol, prasiadzieŭšy ŭ aŭto kala hadziny, adznačajuć arhiencinskija miedyja.
Nieŭzabavie prybyli fiederalnyja palicyjanty, a taksama niekalki mužčyn u biełych kašulach, jakija pradstavilisia supracoŭnikami rasijskaha pasolstva ŭ Buenas-Ajres. Na nabližeńnie presy jany reahavali ahresiŭna, raspaviali arhiencinskija miedyja.
Mužčyny padyšli da aŭtamabilaŭ z zabarykadavanymi kiroŭcami i ŭ vyniku zmahli damovicca ź fiederalnymi palicyjantami ab ich vyzvaleńni, pastaviŭšy abodva aŭtamabili na stajanku rasijskaha pasolstva. Vyzvalenyja dypłamaty paabiacali palicyi zdać ałkatest užo na terytoryi dyppradstaŭnictva. Ci zdali jany jaho ŭ vyniku — žurnalistam nieviadoma, adznačajuć miascovyja telekanały.
Paźniej, jak raspaviadajuć arhiencinskija miedyja, z budynka pasolstva vyjšaŭ jašče adzin pradstaŭnik rasijskaj dypmisii, jaki zajaviŭ žurnalistam, što zabarykadavanyja kiroŭcy «pastupili pravilna, bo, zhodna ź Vienskaj kanviencyjaj, dypłamataŭ nielha zatrymlivać i ahladać». Jon adznačyŭ, što toje, što adbyłosia, treba razhladać jak «surjoznaje parušeńnie mižnarodnaha prava».
Arhiencinskija aficyjnyja asoby ŭ adkaz patłumačyli žurnalistam i rasijskamu boku, što mienavita palicyjanty dziejničali pravilna, pakolki, zhodna z artykułam 41 toj ža Vienskaj kanviencyi, dypłamaty abaviazany vykonvać zakony toj krainy, u jakoj znachodziacca.
Arhiencinski cud. Jak Milej utajmavaŭ inflacyju mienš čym za hod
Na jakich umovach biełarusy mohuć atrymać hramadzianstva Ispanii, Partuhalii, Hiermanii i inšych krain
«Buenas-Ajres — vielmi kamfortny horad, kali vy zarablajecie ŭ valucie». Biełaruska pierajechała ŭ Arhiencinu i raskazvaje, kolki kaštuje tam žyć
Kamientary