U Minsku i Hrodnie možna ŭziać žyvuju jalinku na śviaty ŭ arendu. Kolki heta kaštuje?
Taki servis pracuje ŭ Biełarusi nie pieršy hod. Možna ŭziać u arendu žyvuju jalinku ŭ kadcy, a paśla śviataŭ dreva zabiaruć i buduć kłapacicca pra jaho.
Startam prajekta «EkaJalinka» možna ličyć 2019 hod. Tady siamja z Hrodna prydumała, jak racyjanalna vykarystoŭvać ziamlu ŭ vioscy Karobčycy. Muž i žonka raniej tłumačyli ŭ intervju «Anłajnieru», što z adnaho boku nadziełu była daroha, ź inšaha — aerakłub, tamu vyroščvać niejkuju sadavinu ci harodninu było b nie vielmi ekałahičnym rašeńniem.
Jany vysadzili kala 1000 jalinak z dumkami pra toje, što hadoŭ praz 7-8 ich možna budzie śsiekčy pierad Novym hodam i pradać. Ale siabry pary stolki čakać byli nie hatovyja: biaskonca pytalisia, kali ž buduć jalinki. Ssiekčy maleńkija drevy ruka nie padniałasia, tamu muž z žonkaj vyrašyli, što možna było b prapanoŭvać śviatočnyja drevy ŭ kadkach.
Jašče adnym vynikam siamiejnaha mazhavoha šturmu stała racyjanalnaja dumka, što šmat ludziej, jakija nabyvajuć jalinki ŭ kadcy, potym nie viedajuć, što ź imi rabić. Prosta adnieści na śmietnik — škada, pasadzić dzieści dreva nie ŭsie majuć miesca, dy i jak heta zrabić, nie kožny viedaje.
Tamu siamja vyrašyła zrabić servis prakatu jalinak. Pieršyja drevy dali siabram, potym apublikavali post na asabistaj staroncy ŭ instahramie — i ašaleli ad kolkaści zamoŭ.
Paśla pieršaha ekśpierymientalnaha hodu vyžyła kala 80% jalinak, jakija viarnulisia da haspadaroŭ ad arandataraŭ. Ciapier siamja navat zapuściła servis, jaki dazvalaje adsačyć los jalinki, jakuju vy ŭžo arandavali raniej. I kali dreva, jakoje vy zamaŭlali letaś, vyžyła sioleta, vam jaho zdaduć u arendu sa źnižkaj.
Servis pracuje tolki ŭ Minsku i Hrodnie.
U hetym hodzie ŭ asartymiencie źjavilisia navat instahramnyja pichty Nordmana. Kaštujuć jalinki ad 50 da 220 rubloŭ, sosny — 60-90 rubloŭ, pichty Nordmana — 190-220 rubloŭ.
Razvozić ich buduć bližej da śviataŭ. A pakul u akaŭncie prajekta pakazvajuć, jak akuratna vykopvajuć drevy i pieramiaščajuć u kadki — na kožnuju jalinku idzie kala paŭhadziny.
Kamientary