Udzielnika «X-faktara» aryštavali za palityku — chutka budzie sud
Armien Arzumanian udzielničaŭ u šou ŭ 2021 hodzie. Ale asnoŭny jaho zaniatak — heta biznes pa prodažy padarunkaŭ. U volny čas jon ratuje biazdomnych žyvioł.
Armienu Arzumanianu 44 hady. Jon rodam z Azierbajdžana, ale amal usio žyćcio pražyŭ u Biełarusi i maje biełaruskaje hramadzianstva.
Bolš za 15 hadoŭ Armien trymaje kramy padarunkaŭ, apošniaja ź ich — Podari Minsk. Tam pradajucca knihi-siejfy, vazy, suvieniry i inšyja drobnyja prezienty.
Mužčyna piša muzyku pad psieŭdanimam Arman Alekpieraŭ. Jon dvojčy vystupaŭ na «X-faktary» — spačatku ŭ 2018 hodzie va Ukrainie, a paśla ŭ 2021 u Biełarusi. Admietna, što ŭ biełaruskim prajekcie jon atrymaŭ ad udzielnikaŭ žury adkaz «tak», ale dalejšych vypuskaŭ ź jaho ŭdziełam čamuści tak i nie pakazali.
Armien raskazvaŭ u intervju, što dapamahaje biazdomnym žyviołam. Sam jon, kaža, vyratavaŭ niekalki socień. U svajoj chacie jon uładkavaŭ domiki dla žyvioł na zimu i leta. A jašče vałancioryć u arhanizacyjach, jakija ratujuć žyvioł.
Armiena Arzumaniana pačnuć sudzić 16 śniežnia ŭ Minskim haradskim sudzie. Jaho vinavaciać u «zaklikach da sankcyj» (č. 3 art. 361 KK) i «paklopie na Łukašenku» (č. 2 art. 367 KK). Armienu pahražaje ad 4 da 12 hadoŭ kałonii.
Sudzić jaho budzie Jaŭhien Pisarevič. Jon sudzić biełarusaŭ pa palityčnych artykułach najmienš z 2016 hoda.
Kali vy viedajecie pra toje, što zdaryłasia, bolš, pišycie redaktaru «Našaj Nivy» ŭ TH ci na [email protected]. Abo lubomu redaktaru ci žurnalistu «Našaj Nivy», jakoha viedajecie asabista.
Masavyja palityčnyja represii ŭ Biełarusi praciahvajucca z 2020 hoda.
Tady Alaksandr Łukašenka prajhraŭ Śviatłanie Cichanoŭskaj, ale nie addaŭ uładu.
Pa słovach namieśnika načalnika Hałoŭnaha ŭpraŭleńnia pracesualnaha kantrolu Śledčaha kamiteta Alaksandra Žukava, było zafiksavana bolš za 22 500 «złačynstvaŭ ekstremisckaj skiravanaści», heta značyć, palityčnaha charaktaru. Pa mnohich z hetych kryminalnych spravaŭ prachodziać šmatlikija fihuranty.
Zhodna ź infarmacyjaj Paŭła Łatuški, pradstaŭnika Abjadnanaha pierachodnaha kabinieta, z 2020 hoda represii zakranuli 136 tysiač čałaviek. Niekalki socień tysiač biełarusaŭ vymušanyja byli pakinuć krainu.
«Naša Niva» — bastyjon biełaruščyny
PADTRYMAĆCiapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ125
Kamientary
Zrazumieła, što nazva hetaha błaźnierstva "biełaruskim Ch-faktaram" u niezaležnych miedyja nie spryjajuć anijakamu parazumieńniu, a jakraz naadvarot. Ale, jak trapna sfarmulavaŭ niadaŭna spadar Stryžak, kamientujučy vydaču biełaruskaha dabraachvotnika Vieramiejčyka łukašenkaŭskamu režymu: vy sami adkaznyja za svoj los. Čytaj - niama ŭ vas chaŭruśnikaŭ, ani ŭ vyhladzie zachodnich partnioraŭ, ani ŭ vyhladzie suhramadzian u biaśpiečnych krainach, što musili b spryjać parazumieńniu stanu Biełarusi, nazyvać rečy svaimi imionami, ale ž nia robiać hetaha.