Cichanoŭskaja: Bierlinskaja ściana ruchnuła dziakujučy mužnaści prostych ludziej — i takim ža čynam upaduć ścieny pryhniotu ŭ Biełarusi
Demakratyčnaja lidarka Biełarusi ŭziała ŭdzieł u adznačeńni 35-j hadaviny padzieńnia Bierlinskaj ściany.
Śviatłana Cichanoŭskaja dałučyłasia da palitykaŭ, aktyvistaŭ i hramadzianskich dziejačaŭ, jakija sabralisia, kab ušanavać hetuju znamianalnuju padzieju, jakaja padkreślivaje važnaść baraćby za svabodu i demakratyju. Uračystaść prachodziła pad devizam «Adstojvajcie svabodu!» Pra heta paviedamlaje jaje pres-słužba.
Bierlinskaja ściana, jakaja padzialała nie tolki horad, ale i losy tysiačaŭ ludziej, siońnia stała simvałam pieramohi nad dyktaturaj — i natchnieńniem dla novych pakaleńniaŭ, jakija zmahajucca za svabodny i spraviadlivy śviet.
«Dla biełarusaŭ Bierlinskaja ściana maje vielmi važnaje simvaličnaje značeńnie. Jak pakazała padzieńnie Bierlinskaj ściany, źmieny mohuć pryjści tady, kali ich nichto nie čakaje, i my pavinny być da ich hatovyja. My praciahniem zmahacca za toje, kab nablizić hetyja źmieny.
Bierlinskaja ściana ruchnuła dziakujučy mužnaści prostych ludziej — i takim ža čynam upaduć ścieny pryhniotu ŭ Biełarusi. Kožny akt niepadparadkavańnia — mały ci vialiki — nabližaje nas na adzin krok. Razam my razburym usie ścieny, jakija adździalajuć nas ad volnaj i demakratyčnaj budučyni», — zajaviła Śviatłana Cichanoŭskaja.
Najbolš emacyjnym momantam uračystaści stała cyrymonija restaŭracyi i pierafarboŭki častki ściany. Hetaja akcyja — simvał abnaŭleńnia i pieraasensavańnia kaštoŭnaściaŭ svabody dy adzinstva, jakija stali mahčymymi paśla padzieńnia Bierlinskaj ściany.
Uračystyja mierapryjemstvy z nahody 35-hodździa padzieńnia Bierlinskaj ściany ŭ subotu, 9 listapada, prajšli ŭ stalicy Hiermanii z udziełam prezidenta FRH Franka-Valtera Štajnmajera, moładzi z šerahu jeŭrapiejskich krain, a taksama pradstaŭnikoŭ mižnarodnych ruchaŭ i arhanizacyj, jakija vystupajuć u abaronu roznych pravoŭ i svabod, u tym liku ź Irana, Biełarusi, Hruzii, Hankonha i Kuby.
«Naša Niva» — bastyjon biełaruščyny
PADTRYMAĆCiapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie23
Kamientary