I «Masad», i Vatykan sačyli za PVK «Vahnier» i atačeńniem Pucina

Uciečka danych italjanskaj palicyi spravakavała mižnarodny skandał — miłanskaja pryvatnaja vyšukovaja firma Equalize ukaraniła špijonski soft u sierviery MUS Italii i hadami za hrošy źlivała adtul kanfidencyjnuju infarmacyju pra lubych hramadzian krainy, uklučajučy palitykaŭ, hramadskich dziejačaŭ i spartyŭnych znakamitaściaŭ (na hety momant viadoma, što dziejnaść Equalize zakranuła 800 tysiač čałaviek).

Baza danych italjanskaha MUS taksama ŭtrymlivała infarmacyju pra palicejskija rasśledavańni inšych krain Jeŭrasajuza, a sierviery firmy Equalize, na jakich zachoŭvalisia źlivy, byli znojdzienyja ŭ Italii, Vialikabrytanii i Litvie, paviedamlaje vydańnie Politico.

Klijentami Equalize moh być kožny, chto vyhadna zapłacić za infarmacyju. Uciečka danych śviedčyć, što adnymi z asnoŭnych klijentaŭ miłanskaj firmy źjaŭlalisia izrailskaja śpiecsłužba «Masad» i pradstaŭniki Vatykana. 

Pavodle źlitych danych italjanskaj palicyi, hałoŭnym pradstaŭnikom intaresaŭ firmy Equalize u parazumieńni ź Izrailem i Vatykanam vystupiŭ śpiecyjalist pa kibierbiaśpiecy Nuncya Samuele Kałamucy, jakoha italjanskija ŚMI źviazvajuć ź mižnarodnaj chakierskaj hrupoŭkaj Anonymous. 

Tak, u lutym 2023 hoda ŭ miłanskim ofisie Equalize Kałamucy sustrakaŭsia z dvuma ahientami «Masada», jakija prapanavali jamu 1 miljon jeŭra za infarmacyju «pra ŭsie aktualnyja anłajn i afłajn apieracyi rasijskaj raźviedki ŭ Jeŭropie, a taksama za ŭzłom pryład «pravaj ruki» Pucina (u źlitych dakumientach nie adznačajecca, pra kaho mienavita idzie havorka) i danych z bankaŭskich rachunkaŭ niekatorych rasijskich aliharchaŭ, kab «znajści i padarvać» finansavyja patoki, ad jakich siłkujecca PVK «Vahnier».

Akramia 1 miljona jeŭra, izrailskija ahienty ŭ jakaści apłaty taksama prapanoŭvali Kałamucy bolš padrabiaznuju infarmacyju pra «karupcyjnyja ŭhody» pamiž elitami arabskich krain i pradstaŭnikami orhanaŭ ułady Jeŭrasajuza, a taksama danyja pra padpolny trafik iranskaha hazu ŭ Italii, jakija mahli b zacikavić inšych klijentaŭ Equalize, pieradaje Politico.

Hetyja ž danyja pra apieracyi Kramla ŭ Jeŭropie i jeŭrapiejskija tranzakcyi rasijskich aliharchaŭ z atačeńnia Pucina, pavodle źlivaŭ, pavinny byli być pieradadzienyja i pradstaŭnikam vatykanskaha Śviatoha Pasadu. Adnak dahetul zastajecca nieviadomym intares Vatykana ŭ dadzienaj spravie, adznačajuć italjanskija miedyja.

Ciapier pa spravie Equalize u Italii ładziacca masavyja aryšty: siarod zatrymanych jość dziejnyja palicyjanty, pradprymalniki, palityki, sudździ, vajskoŭcy i inšyja ludzi, jakija mahli być datyčnymi da špijonskaj dziejnaści firmy ci dapamahać jaje klijentam u jakaści pasiarednikaŭ (padazrajuć i členaŭ italjanskich mafijoznych hrupovak). Śpiecyjalist pa kibierbiaśpiecy Nuncya Samuele Kałamucy taksama znachodzicca pad śledstvam.

Da maštabnaha rasśledavańnia mohuć dałučycca i inšyja jeŭrapiejskija krainy, čyje hramadzianie byli zakranutyja dziejnaściu Equalize albo na terytoryi jakich byli znojdzienyja sierviery hetaj italjanskaj firmy.

• 2
• 0
• 1
• 1
• 1
• 0
• 1
• 0