U Paryžy siońnia pačniecca pieršy sudovy praces suprać Žerara Depardjo — jaho abvinavačvajuć u seksualnych damahańniach
Pa artykule ab seksualnych damahańniach jamu pahražaje da piaci hadoŭ pazbaŭleńnia voli.
U Paryžy siońnia pačniecca pieršy sudovy praces suprać Žerara Depardjo. Pasiadžeńnie pačniecca a 13:00 pa miascovym časie (15:00 pa Minsku).
Viadomamu akcioru vystaŭleny abvinavačańni ŭ seksualnych damahańniach u dačynieńni da dźviuch žančyn padčas zdymak filma Les Volets Verts («Zialonyja akanicy») u 2021 hodzie, piša Bild.
Dekaratarka i asistentka režysiora abvinavacili Depardjo ŭ seksualnym hvałcie, seksualnych damahańniach i seksisckich abrazach u lutym 2024 hoda. Advakat akciora Žeremi Asus zajaviŭ, što Depardje asabista źjavicca na siońniašniaje pasiadžeńnie.
«Śviedki i dokazy, jakija jon pradstavić, pakažuć, što jon źjaŭlajecca tolki abjektam iłžyvych abvinavačańniaŭ. Meta, jakuju pieraśledujuć pazoŭščyki, tolki što była raskrytaja ŭ patrabavańniach kampiensacyi — nabyć ad 6 000 da 30 000 jeŭra», — dadaŭ advakat.
Pa słovach vidavočcaŭ, Depardjo na zdymačnaj placoŭcy całavaŭ žančyn i chapaŭ ich za hrudzi, a taksama ŭ cełym pavodziŭ siabie nieprystojna, ale tolki z tymi žančynami, jakija znachodzilisia ŭ jaho padnačaleńni.
«Ja byŭ ź im na zdymkach. Jon monstr, jakomu nikoli nie kazali «stop», i jon praciahvaŭ», — padzialiŭsia kaleha Depardjo, akcior Maćjo Kasavic.
Niekatoryja francuzskija telekanały ŭžo admovilisia tranślavać filmy z udziełam Žerara Depardjo. Akramia taho, jaho vaskovuju statuju ŭ paryžskim muziei Hrevien demantavali, a taksama akciora pazbavili ordena Hanarovaha lehijona.
Na dumku kinakrytykaŭ, film «Zialonyja akanicy» stanie apošnim u doŭhaj filmahrafii Depardjo. Pa artykule ab seksualnych damahańniach jamu pahražaje da piaci hadoŭ pazbaŭleńnia voli.
Ahułam suprać Žerara Depardjo razhladajucca piać sudovych iskaŭ. 21 žančyna zajaviła pra damahańni ź jaho boku.
Ciapier čytajuć
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty21
Kamientary