Ukrainski deputat na forumie «dobrych ruskich»: Važna pieranosić vajnu ŭ Biełaruś
Na Forumie svabodnaj Rasii, jaki siońnia prachodzić u Vilni, prysutničaje deputat Viarchoŭnaj Rady Ukrainy Aleh Dunda, jaki padčas svajho vystupleńnia zhadaŭ pra Biełaruś, prytym zhadka hetaja była dastatkova aryhinalnaja: jon ličyć patrebnym pieranosić vajnu i na terytoryju Biełarusi.
Aleh Dunda ličyć, što pieramahčy Rasiju pad ukrainskimi haradami Vuhladaram ci Pakroŭskam Ukrainie niemahčyma, bo heta pazicyjnaja vajna, padobnaja da toj, jakoj była Pieršaja suśvietnaja. I heta vajna na vyčarpańnie resursaŭ, u jakoj Ukraina Rasii sastupić, bo Maskva hatovaja kidać na heta ŭsie svaje resursy, a voś zachodnija sajuźniki Ukrainy nie hatovyja.
U toj ža čas, na jahonuju dumku, bolš karysnyja apieracyi nakštałt toj, jakuju Ukraina praviała ŭ Kurskaj vobłaści, bo heta padryvaje rasijskuju centralizavanuju ŭładu, pakazvaje jaje niazdolnaść vyrašać prablemy. I praktyka praviadzieńnia padobnych apieracyj, ličyć deputat, musić być pašyranaja i na Biełaruś, bo tam jany, maŭlaŭ, buduć jašče bolš paśpiachovymi.
«Ja hłyboka ŭpeŭnieny, kali adnosna nievialikija padraździaleńni USU zojduć, biełaruskaje vojska składzie svaju zbroju. Heta navat nie ŭpeŭnienaść, heta viedańnie. A heta vialiki ŭdar pad dych Maskvie», — zajaviŭ deputat Aleh Dunda.
Paśla ŭ kamientary telekanału «Biełsat» Dunda patłumačyŭ svaju dumku bolš razhornuta. Jon zaznačyŭ, što kab pravieści ŭ Biełarusi takuju ž apieracyju, jak u Kurskaj vobłaści, treba, kab chtości «byŭ u abozie», kab niechta ź biełarusaŭ byŭ hatovy ŭziać na siabie ŭładu i kiravańnie terytoryjami:
«Prosta akupacyjnaja apieracyja nie maje sensu. Heta pavinna być sumiesnaja apieracyja z partniorami, z pradstaŭnikami biełaruskaj hramadskaści. […] Patrebien lidar, jaki budzie iści faktyčna z našaj armijaj, i jakoha biełarusy buduć hatovyja pryniać, bo my — nie akupanty i nie pavinny kiravać Biełaruśsiu. Biełaruśsiu pavinny kiravać sami biełarusy».
Takim lidaram moža być Śviatłana Cichanoŭskaja ci chtości inšy — pryncypovaj roźnicy tut niama, na dumku Aleha Dundy. Hałoŭnaje, kab hetaha lidara padtrymali zamiežnyja partniory i kab hramadstva pryniała jaho na čas da praviadzieńnia demakratyčnych vybaraŭ.
Pry hetym dumka pra biełaruskaje hramadstva ŭ jaho nievysokaja, jon nie ličyć jaho palityčnym subjektam:
«Pa tych sacyjalnych tendencyjach, jakija jość, kali biełaruskaje hramadstva absalutna amorfnaje, možna skazać, što nijakaha pratestu suprać takich vajennych dziejańniaŭ nie budzie. Tamu što kali b była niejkaja hramadskaja pazicyja, navat u dačynieńni da Łukašenki, jana b prajaviłasia b, a jaje niama. Faktyčna, biełarusy nie hatovyja prajaŭlać svaju pazicyju, tamu pry mahčymaj apieracyi ŭ Biełarusi hetaj pazicyi taksama nie budzie».
44-hadovy Aleh Dunda — uradženiec Dniapra. Jon deputat Viarchoŭnaj Rady Ukrainy ad praŭradavaj frakcyi «Słuha naroda», byŭ abrany ŭ adnamandatnaj akruzie ŭ Kijeŭskaj vobłaści. Źjaŭlajučysia sukiraŭnikom mižfrakcyjnaha deputackaha abjadnańnia «Za dekałanizacyju Rasii», jon aktyŭna adstojvaje nieabchodnaść raspadu Rasii jak apošniaj postkałanijalnaj impieryi.
«Pieravychoŭvajuć i militaryzujuć». Dla suda ŭ Haazie padrychtavali dakład pra toje, chto i jak vyvozić ukrainskich dziaciej u Biełaruś
«Dla Kijeva było b lepš, kab Biełarusi nie isnavała naohuł». Vialikaja razmova z ukrainskim palitołaham Jaŭhienam Mahdam
Rasijski apazicyjanier Jašyn raskazaŭ, čamu nie choča raspadu Rasii i jak dumaje pracavać ź biełaruskimi palitykami — repartaž
Ciapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata16
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1313
Kamientary