Siurrealistyčny rolik biełarusaŭ źbiraje miljony prahladaŭ u zachodnim tvitary
Niečakanyja pierachody i niepraŭdapadobnyja rašeńni robiać videa padobnymi da našych snoŭ.
Pieršym rolik biełarusaŭ u tvitary zapościŭ partuhałamoŭny akaŭnt Serafim, jaki źbiraje miemy i śmiešnyja videa. Videa supravadžaje podpis: «Sny zaŭsiody majuć sens» /
Maje sny».
I sapraŭdy, siužet rolika vielmi nahadvaje čałaviečyja sny, dzie łohika apaviadańnia i zakony fiziki sastupajuć na druhi płan pierad jaskravaściu vobrazaŭ.
Hahahahah pic.twitter.com/BlvYFH4Jfy
Jon pačynajecca z taho, što naha chłopca zacisnuta pamiž rejkami, a nasustrač zadnim chodam ruchajecca ciahnik. Kab paźbiehnuć nieminučaj śmierci, jon vymaje z bananki na pojasie ržavuju piłu i pačynaje piłavać sabie nahu. Ad hetaj spravy jaho adciahvaje dziaŭčyna, jakaja prosić patelefanavać, chłopiec praciahvaje joj stacyjanarny dyskavy telefon, pa jakim dziaŭčyna pačynaje abmiarkoŭvać svaje spravy ź siabroŭkaj.
Kali chłopiec prosić jaje paskorycca, bo jaho voś-voś sabje ciahnik, dziaŭčyna naciahvaje bałakłavu i źbiahaje z telefonam. Na dapamohu prychodzić kaŭboj, jaki łaso zachoplivaje złodziejku, raskručvaje vakoł siabie, plaskaje ab ziamlu i z razhonu padaje na jaje. Padniaŭšysia na nohi, kaŭboj łoŭkim udaram pasyłaje hałavu dziaŭčyny ŭ futbolnuju bramu, ale nie zabivaje, bo jaje łović bramnik.
Tvit z hetym videa ŭžo sabraŭ 3,6 miljona prahladaŭ. Ale sapraŭdnuju papularnaść jano zdabyła ŭ sacsietcy, kali jaho pieraapublikavaŭ anhłamoŭny miemny akaŭnt Enez Özen (@Enezator). Tut kolkaść prahladaŭ rolika dasiahnuła ŭžo 22 miljonaŭ, a reposty i łajki ličacca dziasiatkami tysiač.
Niezvyčajny rolik chłopcy z «ŽIHULET» zapisali jašče ŭ lipieni. Miarkujučy pa krajavidach, bolšaść svaich videa jany zdymajuć u Babrujsku. Kožny ź ich adroźnivajecca siurrealistyčnaściu — nastolki niepraŭdapadobnaj, ale tak pierakanaŭča źniataj, — što mozh nie zaŭsiody paśpiavaje zrazumieć, što tak nie moža być — usio ž jon sam niaredka hienieruje taki ž kantent pa načach.
U rolikach babrujskich chłopcaŭ kafe rabujuć z dapamohaj fiena, pa telefonie razmaŭlajuć praz navušnik i estradny mikrafon, damafon uzłomvajecca praz noŭtbuk, bakał dziŭnaha smuzi pieranosiać u čamadanie, a dźviery mohuć vieści zusim nie tudy.
Kto-to vidit vsio…
Samy papularny rolik «ŽIHULET» u ciktoku nabraŭ za paŭhoda ŭžo bolš za 7 miljonaŭ prahladaŭ, ale da tvitarskaj słavy jamu pakul daloka.
«Naša Niva» — bastyjon biełaruščyny
PADTRYMAĆCiapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary