Palicyja zatrymała ŭ Machačkale Achmieda Džabraiłava, jaki viarnuŭsia z vajny suprać Ukrainy. U Savieckim RAUS jaho bili elektrašokieram i prymianiali da jaho siłu — mužčyna zahinuŭ. Pra heta raspavioŭ dahiestanski dziejač Šamil Chadułajeŭ, pišuć «Važnyja historyi».
48-hadovaha Džabraiłava zatrymali jašče 9 lipienia paśla skarhaŭ miascovych žycharoŭ. Pa ich słovach, jon u nieprytomnaści zabraŭsia na dach doma, biehaŭ z nažom i nie paznavaŭ baćkoŭ. Da ŭdziełu ŭ vajnie bajec byŭ niekalki razoŭ sudzimy i ŭžyvaŭ narkotyki. Paśla viartańnia z zony bajavych dziejańniaŭ jon zapiŭ.
Šamil Chadułajeŭ apublikavaŭ videa z kamier nazirańnia ŭ adździele palicyi. Na kadrach bačna, što kala 18:04 zatrymanaha zaviali ŭ kabiniet, ź im razmaŭlali. Zatym mužčyna abmiak i spoŭz na padłohu. Kala 18:10 palicejski staŭ kalenam na Džabraiłava, jaho trymali čaćviora inšych siłavikoŭ. Jany taksama ŭstali na jaho kaleniami i nanosili ŭdary elektrašokieram.
Adzin ź siłavikoŭ pačaŭ skakać na mužčynie. Praź piać chvilin katavańniaŭ Džabraiłaŭ pierastaŭ padavać prykmiety žyćcia, jamu vyklikali miedykaŭ.
«Hetaha chłopca SVAšnika <…> volna ci mižvoli, ale zabili. <…> Jakim treba być prydurkam, kab kaleniami cisnuć na jaho, dy jašče budučy takim zdarovym supracoŭnikam? Jon dryhaje nahami, jamu drenna, a inšy supracoŭnik jaho elektrašokieram «supakojvaje». A daktary paŭhadziny palčatki adziavajuć zamiest terminovaj dapamohi. Plavali jany na chłopca», — napisaŭ u svaim telehram-kanale Šamil Chadułajeŭ.
Kamientary