«U mianie vałasy jak sałoma!» Jakija pamyłki my robim pry dohladzie za vałasami letam

Čamu vałasy letam chutka hublajuć vyhlad i ci patrebny SPF?

Leta ahresiŭna ŭździejničaje na vałasy. Ultrafijaletavyja pramiani pranikajuć hłyboka ŭ stryžań, razburajučy kieracin i miełanin. Heta vyklikaje vyćvitańnie i robić pasmy porystymi. Infračyrvonaje vypramieńvańnie pierasušvaje ŭnutrany płast vołasa — korteks, z-za čaho jon hublaje ełastyčnaść i stanovicca łomkim.

SPF dla vałasoŭ nieabchodny. Važna vybirać srodki ź fizičnymi filtrami i admysłovymi palimierami, jakija stvarajuć niabačnuju achoŭnuju plonku.

Važny niuans: uvilhatnialnyja sprei z SPF biez vodaniepranikalnych ułaścivaściej mohuć spracavać jak linza. Pad haračym soncam kropli vady na vałasach fakusirujuć pramiani, uzmacniajučy apiok kutykuły. Tamu plažnyja srodki abaviazkova pavinny ŭtrymlivać silikony abo alei, jakija adšturchvajuć vadu.

Jak pravilna myć hałavu letam

Letam praca salnych załoz paskarajecca, tamu chadzić z brudnaj hałavoj bolš škodna, čym časta jaje myć — apošniaje možna rabić choć štodnia.

Vykarystoŭvajcie ciopłuju, a nie haračuju vadu (vysokaja tempieratura stymuluje salnyja załozy jašče macniej).

Vybirajcie srodki dla štodzionnaha prymianieńnia abo z pamietkaj «hłybokaje ačyščeńnie» (z hlinaj, cynkam, salicyłavaj kisłatoj). Myjcie hałavu dvojčy: pieršy raz zmyvajecca brud, druhi — ačyščajecca skura.

Pry śvierbie ci pierchaci raz na 10—14 dzion vykarystoŭvajcie miakki skrab abo šampuń z AHA/BHA-kisłotami, a dla apałoskvańnia — vadu ź limonnym sokam abo jabłyčnym vocatam (kisłaje asiarodździe varožaje dla bakteryj).

Nikoli nie kładziciesia spać z mokrymi abo vilhotnymi vałasami. Ad sutyknieńnia z paduškaj stvarajecca parnikovy efiekt — idealnaje asiarodździe dla razmnažeńnia hrybkoŭ.

Hałaŭnyja ŭbory i kandycyjaniery ŭ pamiaškańniach

Sami pa sabie hałaŭnyja ŭbory nie škodziać, ale niebiaśpieka kryjecca ŭ spałučeńni brudu, potu i ciapła. Pad ščylnaj sintetyčnaj kiepkaj hetaja sumieś zakarkoŭvaje pory, vyklikaje śvierb i pierchać. Addavajcie pieravahu naturalnym tkankam — bavoŭnie abo lnu — i zdymajcie hałaŭny ŭbor u pamiaškańni.

Kandycyjaniery pierasušvajuć pavietra, vyciahvajučy vilhać z vałasoŭ. U ofisie abo mašynie nanoście na končyki niezmyvalny krem ci alej — jany stvorać achoŭny barjer.

Jak minimizavać škodu ad kupańnia ŭ vadajomach i basiejnach

Chłor razburaje lipidny płast i vymyvaje pihmient, marskaja sol dziejničaje jak abraziŭ i vyciahvaje vilhać, a žorstkaja presnaja vada pakidaje soli kalcyju i mahniju.

Recept vyratavańnia: namačycie vałasy čystaj vadoj z duša pierad zapłyvam. Pakolki jany ŭžo napoŭniacca vilhaćciu, sol i chłorka nie ŭbiarucca. Paśla vychadu z vady apałaśnicie hałavu, a doma vykarystajcie šampuń i niezmyvalny kandycyjanier.

Čamu škodna sušyć vałasy na vietry i rabić tuhija pryčoski

Sušyć vałasy na ciopłym vietry vielmi škodna. Stvarajecca efiekt paravoj łaźni: vilhać vyparajecca tolki z pavierchni, a ŭnutry zastajecca, z-za čaho łuskavinki litaralna razryvajucca. Da taho ž da vilhotnych pasmaŭ lipnie pył.

«Zalizanyja» chvasty, pučki i mietaličnyja zakołki pryvodziać da trakcyjnaj ałapiecyi (vypadzieńnia vałasoŭ ad naciažeńnia). Biaśpiečniej źbirać vałasy ŭ svabodnyja kosy abo nizkija chvasty, vykarystoŭvać šaŭkovyja stužki abo płastykavyja «krabiki» z hładkimi zubami.

Letni racyjon i afarboŭvańnie

Letni racyjon pracuje z adterminoŭkaj u 2—3 miesiacy. Kłubnicy i čarnicy (vitamin S, antyaksidanty), čarešnia (miedź suprać rańniaj sivizny) i maładaja zielanina (jaje treba jeści z tłuščami) umacujuć cybuliny tolki da vieraśnia. Pry hetym lubyja jahady buduć małaefiektyŭnyja biez dastatkovaj kolkaści białku (babovyja, harošak).

Afarboŭvańnie i kieracin. Pierad adpačynkam heta drennaja ideja, bo sonca i sol chutka razburać vynik. Płanujcie takija pracedury minimum za dva tydni da adpačynku.

Suchi šampuń. Paśla vykarystańnia jaho abaviazkova treba vyčesvać na noč, kab čaścicy kruchmału nie zabivali pary.

Try hałoŭnyja praviły letniaha dohladu ad trychołaha

Zmyvajcie «plažnuju» vadu da šampunia. Pierad myćciom naniasicie masku abo balzam na 2—3 chviliny, kab niejtralizavać sol i chłor biez traŭmavańnia kutykuły.

SPF — štodnia. Nanoście sprej z SPF pierad vychadam z domu. Sonca rujnuje pryrodny kieracin nie horš za płojku.

Admoŭciesia ad vysokaj tempieratury. Sušycie fienam tolki karani, a daŭžyniu pakidajcie sochnuć naturalnym šlacham.

• 1
• 0
• 0
• 1
• 0
• 0
• 0
• 0