Pra likvidacyju niekali bujnoj sietki kram bytavoj chimii raspavioŭ ministr handlu Alaksiej Bahdanaŭ.
Handlovaja sietka «Vostraŭ čyścini» kančatkova likvidujecca z-za finansavych prablem. Pra heta raspavioŭ ministr antymanapolnaha rehulavańnia i handlu Alaksiej Bahdanaŭ, piša BiełTA.
Čynoŭnik raspavioŭ, što MARH sprabavaŭ dapamahčy «Vostravu čyścini» vyrašyć finansavyja prablemy, adnak ich sabrałasia zanadta šmat.
«Heta daŭniaja historyja, jany dosyć daŭno išli da hetaha niaŭdałaha zaviaršeńnia. Kali my daviedalisia pra heta, uziali praces pad svoj kantrol, sprabavali ŭsimi siłami niejak dapamahčy ŭ ramkach našaj kampietencyi, ale ŭ ich sfarmavaŭsia za apošnija piać hadoŭ sapraŭdny kom prablem.
Heta nie imhniennyja ciažkaści, prablemy śpieli doŭha. Heta i niaŭdałyja finansavyja ŭkładańni, i stratehija raźvićcia biznesu — jon ros u ich vielmi chutka, i nie kožnaja kampanija pry takim vialikim roście zdolnaja spravicca. Tamu, viadoma, vielmi važna mieć kvalifikavany piersanał, jaki moža kiravać maštabavańniem handlovaj sietki, nie stvarajučy finansavych prablem i inšych pytańniaŭ», — adznačyŭ Bahdanaŭ.
Sa słoŭ čynoŭnika, ministerstva źbirała banki, udzielnikaŭ rynku, vytvorcaŭ i pastaŭščykoŭ i sprabavała raźviazać prablemu, ale heta nie dapamahło.
Ministr ličyć, što spažyŭcy nie adčujuć źniknieńnia niekali adnoj z najbujniejšych sietak.
«Handlovaja sietka budzie likvidavanaja, napeŭna, heta ŭžo praktyčna adbyłosia. Ale dla spažyŭcoŭ prablem nie budzie, na miescach pracujuć ich kankurenty, jakija aktyŭna zakryvajuć hety siehmient rynku», — raspavioŭ Bahdanaŭ.
Jašče ŭ krasaviku ŭładalnik sietki Viktar Ramuk byŭ nastrojeny aptymistyčna — jon raspaviadaŭ, što znajšoŭ rasijskaha inviestara i źbirajecca adkryć kramy, u tym liku pa franšyzie.
U vieraśni 2022 hoda źjaviłasia infarmacyja ab zatrymańni hiendyrektara «Vostrava čyścini» Viktara Ramuka. Praz hod jahony biznes byŭ na miažy bankructva: krynicy «Našaj Nivy» śćviardžali, što vielizarny vykup za vychad ułaśnika ź SIZA i prablemnaja biznes-madel pahražajuć kampanii zakryćciom.
Kamientary