Rasija z-za sankcyj nie spraŭlajecca ramantavać NPZ, paškodžanyja Ukrainaj

Udary ŭkrainskich dronaŭ, ad jakich sioleta paciarpieła bolš za dziasiatak NPZ, stvaryli prablemy dla naftapierapracoŭčaha siektara Rasii, raskazali Reuters nie mienš za 10 jahonych pradstaŭnikoŭ.

Pa ich słovach, na kožnym NPZ jość zachodniaje abstalavańnie, jakoje pradavali i ŭstaloŭvali amierykanskaja UOP («dačka» Honeywell International) i šviejcarskaja ABB; ich śpiecyjalisty taksama zajmalisia jaho absłuhoŭvańniem. Abiedźvie kampanii spynili pracavać u Rasii paśla taho, jak Uładzimir Pucin raźviazaŭ vajnu suprać Ukrainy ŭ lutym 2022 hoda.

U jakaści prykładu prablem, jakija ŭźnikli, piać krynic Reuters raskazali pra pałomku abstalavańnia na Nižaharodskim NPZ (NORSI) «Łukojła» ŭ studzieni hetaha hoda. Usiaho ŭ śniežni — studzieni avaryi na NORSI, čaćviortym pa mahutnaści NPZ Rasii, adbylisia na troch ustanoŭkach, z-za čaho za pieršuju dekadu studzienia zavod vyrabiŭ tolki 60 000 ton aŭtamabilnaha bienzinu, ci kala 44% ad pradukcyjnaści najaŭnych bienzinavych pracesaŭ.

Kali adnavić pracu dvuch aparataŭ častkova ŭdałosia da druhoj pałovy studzienia, to pieršaja ŭstanoŭka katalityčnaha krekinhu (KK-1) nie pracuje da hetaha času i nieviadoma, pa słovach krynic Reuters, kali jaje ŭdasca papravić.

Zrabić heta mohuć tolki śpiecyjalisty UOP. Inžyniery «Łukojła» sprabavali znajści zapčastki na zamienu złamanym, ale ŭ ich ničoha nie atrymałasia, skazaŭ blizki da rasijskaj kampanii čałaviek.

KK-1 dazvalaje vypuskać na NORSI kala 25% usiaho aŭtabienzinu, abo kala 1,2 młn ton u hod. Prablema tolki pahoršyłasia, kali NORSI byŭ atakavany ŭ lutym ukrainskimi dronami, jakim udałosia paškodzić inšaje abstalavańnie, kažuć krynicy Reuters.

Honeywell zajaviła, što ź lutaha 2022 h. nie davała ni pradukcyi, ni pasłuh jak NORSI, tak i NPZ kampanii «Słaviansk Eka», jaki zahareŭsia ŭ vyniku ŭdaru drona 18 sakavika. Akramia taho, Honeywell z usich sił «sprabuje nie dapuścić mahčymaha traplańnia svajoj pradukcyi ŭ Rasiju praz trecija baki».

U vyniku napadaŭ bieśpiłotnikaŭ u I kvartale hetaha hoda było vyviedziena z ładu, pa padlikach Reuters, kala 14% rasijskich naftapierapracoŭčych mahutnaściaŭ. Spačatku Ukraina atakavała naftaschoviščy: letam minułaha hoda drony ŭdaryli pa abjektach u Biełharadzie i Varoniežy. Ale ciapier jana stała śviadoma bić pa NPZ, tamu što ŭstalavanaje na ich zachodniaje abstalavańnie Rasii ciapier budzie składana zamianić.

Sa słoŭ dźviuch krynic Reuters, «Łukojł» źviartaŭsia da dźviuch kitajskich kampanij z prośbaj adramantavać KK-1 na NORSI. «U Kitaja jość patrebnaja technałohija, — skazała adna ź ich. — Ale vielmi časta heta budzie aznačać darahuju zamienu ŭsioj ustanoŭki zamiest narmalnaha, tannaha, rehularnaha ramontu».

Kali mahutnaść patoku dronaŭ zachavajecca, a rasijskaja SPA nie pavialičyć svaju efiektyŭnaść i nie buduć znojdzienyja niejkija inšyja sposaby abarony, Ukraina budzie zdolnaja źnižać abjomy vypracoŭki na rasijskich NPZ chutčej, čym rasijskija naftavyja kampanii buduć zdolnyja ich adnaŭlać.

• 39
• 0
• 2
• 0
• 1
• 2
• 1
• 0