Hamielčuku paviedamili pra śmierć maci. Na pachavańni vyśvietliłasia, što jana žyvaja, a ŭ trunie inšy čałaviek
Usio vyśvietliłasia padčas adpiavańnia.
Historyja zdaryłasia try hady tamu, ale daviedalisia pra jaje tolki paśla publikacyi rašeńnia suda Centralnaha rajona Homiela, jaki razhledzieŭ 19 studzienia pazoŭ mužčyny da ŭstanovy achovy zdaroŭja ab kampiensacyi materyjalnaj škody i materyjalnaj kampiensacyi. U jakaści suadkazčykaŭ byli pryciahnutyja adździeł ZAHS i administracyja Savieckaha rajona Homiela, pišuć Mocnyja naviny.
25 lutaha 2021 hoda ŭ adnu z homielskich balnic (u materyjałach spravy havorka idzie pra špital) dastavili pažyłuju žančynu. 27 lutaha sa špitala patelefanavali jaje synu i paviedamili pra śmierć maci.
Hamialčuk atrymaŭ u adździele ZAHS paśviedčańnie ab śmierci, paśla čaho zaniaŭsia arhanizacyjaj pachavańnia, apłaciŭšy ŭsie pasłuhi, u tym liku i za paminalny stoł u adnoj z kaviarniaŭ. Pachavańnie pavinna było adbycca 1 sakavika. U toj čas u Biełarusi dziejničali karanavirusnyja abmiežavańni. Imavierna, pa hetaj pryčynie svajaki i blizkija tvar pamierłaj ubačyli tolki niepasredna pierad raźvitańniem.
«Padčas adpiavańnia byli vyjaŭlenyja adroźnieńni ŭ źniešnaści, paśla čaho pry zvarocie ŭ špital jamu stała viadoma, što maci žyvaja i znachodzicca ŭ špitali», — paviedamiŭ mužčyna ŭ pazoŭnaj zajavie.
Dadatkova jon ukazaŭ pra toje, što viestka pra śmierć, što była paviedamlena jamu pamyłkova, pryčyniła jamu maralnyja pakuty, «jakija praz dva hady vyklikajuć u jaho niespryjalnyja psichičnyja pieražyvańni».
Hamialčuk prasiŭ sud pakryć pryčynienuju materyjalnuju škodu ŭ 1877 rubloŭ. U hetuju sumu ŭvajšli košt pachavalnych pryładaŭ i pasłuh pa arhanizacyi pachavańnia: miesca na mohiłkach, zakaz stała ŭ kafe, vydatki pa nabyćci praduktaŭ i dziaržpošlina.
Jak paviedamiła ŭ sudzie pradstaŭnik pazoŭnika, «nabytyja rytualnyja prynaležnaści, pradukty i porcyi dla paminalnaha stała byli ŭtylizavanyja pa relihijnych mierkavańniach».
Svaju maralnuju škodu mužčyna acaniŭ u 20 tysiač rubloŭ. Jašče 176 rubloŭ jon prasiŭ spahnać jak sudovyja vydatki, paniesienyja im pry razhladzie hramadzianskaj spravy sudom Savieckaha rajona pa pazovie ab anulavańni zapisu akta ab śmierci mamy.
Pazicyi adkazčykaŭ u sudovym dakumiencie pradstaŭleny tak:
«Pradstaŭnik adkazčyka UAZ h.h. iskavyja patrabavańni ŭ častcy pakryćcia materyjalnaj škody pryznała ŭ poŭnym abjomie, zajaviła pra adsutnaść padstaŭ dla kampiensacyi maralnaj škody. Pradstaŭnik adkazčyka administracyi Savieckaha rajona h. Homiela pazoŭnyja patrabavańni nie pryznaŭ. Pradstaŭnik ZAHSa patrabavańni nie pryznała, ukazaŭšy pra toje, što anulavańnie zapisu akta hramadzianskaha stanu ažyćciaŭlajecca tolki ŭ sudovym paradku».
Što vyrašyŭ sud, i jak adbyłasia pamyłka?
U vyniku rajsud pryjšoŭ da vysnovy, što pazoŭniku była naniesienaja i materyjalnaja, i maralnaja škoda. Sa špitala na jaho karyść było spahnana 1701,36 rubla ŭ košt kampiensacyi materyjalnaj škody i 5000 rubloŭ u košt kampiensacyi maralnaj škody. Jašče pa 196 rubloŭ było spahnana na karyść hamialčanina ź miedykaŭ i administracyi Savieckaha rajona za paniesienyja sudovyja vydatki. U častcy zadavalnieńnia pazovu da adździeła ZAHS było admoŭlena.
U matyvirovačnaj častcy rašeńnia rajsuda koratka tłumačycca, jak adbyłasia hetaja žachlivaja pamyłka:
«Materyjałami słužbovaha rasśledavańnia UAZ» h. «ŭstanoŭlena, što ŭ suviazi z transparciroŭkaj pacyjentaŭ bieź miedycynskaj dakumientacyi rabotnikami ŭstanovy achovy zdaroŭja pierabłytany proźviščy pacyjentaŭ, što paciahnuła pamyłkovaje paviedamleńnie 27 lutaha 2021 hoda pazoŭniku, jaki źjaŭlajecca synam K., ab jaje śmierci. U suviazi z vyjaŭlenymi pry akazańni miedycynskaj dapamohi parušeńniami vinavatyja rabotniki ŭstanovy achovy zdaroŭja pryciahnutyja da dyscyplinarnaj adkaznaści».
I jašče adzin niuans. Aficyjna pa papierach paśla pamyłki miedykaŭ hamialčanka dva miesiacy ličyłasia pamierłaj. 27 lutaha 2021 hoda jana nibyta pamierła i tolki 26 krasavika sud Savieckaha rajona adnaviŭ jaje ŭ śpisie tych, chto žyvie, anulavaŭšy svaim rašeńniem zapis akta ab śmierci.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary
Bardak vo vsiem.
Vot jeŝio.
https://t.me/allians_belarus/148