Prezidentam Finlandyi staŭ Alaksandr Stub. Jaho baćka — švied, a žonka — brytanka

Alaksandr Stub atrymaŭ pieramohu ŭ druhim tury prezidenckich vybaraŭ i abahnaŭšy svajho supiernika, byłoha kiraŭnika MZS Pieka Chaavistu, piša Bi-bi-si.

Paśla padliku 100% biuleteniaŭ Stub atrymaŭ 51,7%, Chaavista nabiraje 48,3% hałasoŭ. Prahnozy karparacyi Yle pradkazvali, što Stub nabiare 51,4% hałasoŭ.

«Što ž, Alaksandr. Vinšuju 13-ha prezidenta Finlandyi», — skazaŭ Chaavista ŭ pramym teleefiry.

Źmiena hieapalityčnaha łandšaftu ŭ Jeŭropie praz vajnu va Ukrainie stanie hałoŭnym vyklikam dla novaha kiraŭnika dziaržavy, jaki, majučy abmiežavanyja paŭnamoctvy ŭ paraŭnańni z premjer-ministram, razam z uradam vyznačaje zamiežnuju palityku krainy i vystupaje ŭ jakaści viarchoŭnaha hałoŭnakamandujučaha ŭzbrojenymi siłami Finlandyi.

Rašeńnie pajści na vybary było pradyktavana situacyjaj, u jakoj kraina akazałasia paśla ŭvarvańnia Rasii va Ukrainu, kazaŭ Stub.

«Mahu skazać, pakłaŭšy ruku na serca, što da pačatku vajny hetyja mierkavańni [ab vyłučeńni na pasadu] nie byli realnaściu, — zajaviŭ jon u žniŭni. — Kali Radzima kliča, vy idziacie».

Paśla pieramohi na vybarach Stub skazaŭ, što stać prezidentam — «najvialikšy honar u jaho žyćci».

«Finlandyja staić na parozie novaj ery, pakolki mižnarodnyja praviły asprečvajucca z roznych bakoŭ. Akramia taho, Finlandyja — novy čalec NATO. Ja ćviorda ŭpeŭnieny, što ŭ najbližejšyja niekalki hadoŭ Finlandyja zastaniecca najlepšaj krainaj u śviecie», — zajaviŭ Alaksandr Stub.

Jak paviedamlaje Yle sa spasyłkaj na Centrvybarkam, jaŭka ŭ druhim tury skłała 70,7% (daterminova prahałasavali 46 pracentaŭ). U pieršym tury ŭ vybarach uziali ŭdzieł 75% vybarščykaŭ.

55-hadovy Kaj-Joran Alaksandr Stub byŭ premjer-ministram Finlandyi ŭ 2014-2015 hh., kali ŭznačalvaŭ nacyjanalnuju kaalicyju — Libieralna-kansiervatyŭnuju partyju, jakaja i ciapier źjaŭlajecca hałoŭnaj partyjaj va ŭradavaj kaalicyi. Vybary lidara partyi Stub u 2016 hodzie prajhraŭ mienavita ciapierašniamu premjeru, Pietery Orpa.

Stub vystupaŭ za ŭvachodžańnie Finlandyi ŭ NATO zadoŭha da napadu Rasii na Ukrainu. Akramia taho, novy prezident — pierakanany prychilnik Jeŭrasajuza i pahłybleńnia jeŭraintehracyi.

Stub — praciŭnik žorstkaha abmiežavańnia imihracyi: jon ličyć, što prytok imihrantaŭ dabratvorna ŭpłyvaje na hramadstva i ekanomiku

Paśla sychodu z pasady premjera Stub byŭ ministram finansaŭ, a da premjerstva zajmaŭ pasady ministra zamiežnych spraŭ i ministra pa jeŭrapiejskich spravach, a taksama byŭ deputatam Jeŭraparłamienta i parłamienta Finlandyi.

Baćka Stuba — finski švied Joran Stub, jaki byŭ chakieistam i ŭznačalvaŭ Fiederacyju chakieja Finlandyi. Maci — finka.

Žonka — Sjuzan Inies-Stub, jakaja pracavała ŭ bielhijskaj jurydyčnaj firmie. Jana sama z hrafstva Eseks (Anhlija), jaje baćka — šatłandziec. Sjuzan Ines-Stub stanie pieršaj žančynaj zamiežnaha pachodžańnia, jakaja stała pieršaj łedzi Finlandyi.

Alaksandr Stub svabodna razmaŭlaje na abiedźviuch dziaržaŭnych movach Finlandyi, a taksama na anhlijskaj, francuzskaj i niamieckaj.

• 11
• 0
• 0
• 0
• 0
• 0
• 1
• 0