Nielubimy čas Łukašenki

Hetym razam u navahodnim zvarocie Łukašenki niekalki razoŭ prahučała słova «kryzis». Toje samaje słoŭca, što im ža było «zabaroniena» na pačatku 2009-ha.

«Śviaty — moj samy nielubimy čas», — pryznaŭsia hałoŭny načalnik na pieradnavahodniaj pres-kanfierencyi ŭ ałmazie viedaŭ. Narod daviedaŭsia, što aficyjnamu lideru navat «kryšačku kryŭdna: vy adpačyvajecie, šampanskaje pjacie, a ja mušu siadzieć pry pulcie kiravańnia».

Pry hetym była abmalavana typovaja karcina prezidenckaha Novaha hoda: mały Kola ŭžo śpić, suhramadzianie viesialacca jak dzieci, a jon — na varcie, pilnuje mir i spakoj Ajčyny. Prahučała i dramatyčnaja historyja pra nabližeńnie da Minska niejkich nieapaznanych latučych abjektaŭ: źbivać — nie źbivać, vo dzie niervy pierahareli!

Tak u padśviadomaści elektaratu abudžajecca archietyp kłapatlivaha baćki. A taksama — hienierujecca ŭ padkorcy ŭlubiony pravadyrami vobraz atočanaj krepaści, vakoł jakoj tak i šnurujuć złyja siły.

Namiok na vorahaŭ, vonkavych dy ŭnutranych, prahučaŭ i ŭ navahodnim zvarocie: «Čarhovy raz pamylilisia tyja, chto pradkazvaŭ nam nieminučy krach».

A tady, u ałmazie viedaŭ, Łukašenka niečakana pryznaŭsia ŭ svajoj fobii: kab čortaŭ kryzis nie skončyŭsia jakoj vajnoj. Nie dumajcie, što heta prosta liryka. Tym bolej što padavacca słabym jon nie lubić. Heta, badaj, intuicyjnaja hulnia na biełaruskim sialanska-piensijanierskim«aby vajny nie było».

Što vy chočacie: de-faktapačałasia pieradvybarnaja kampanija.

Jašče adna jaje prykmieta: naviazłyja ŭ vušach śviatočnyja vinšavańni ad «Biełaj Rusi». Pakul dajedzieš na mietro ad «Uručča» da «Kastryčnickaj», pačuješ jak minimum trojčy. Pierasiadaješ na aŭtobus — i tam nie schavacca.

Pamiatajecie «Fiermu» Orueła: «Usie žyvioły roŭnyja. Ale niekatoryja žyvioły raŭniejšyja za inšych». Z troch tysiač hramadskich arhanizacyj čamuści vybrali hetu.

Dobruju nišu znajšli: zaraz — z Novym hodam dy Kaladami ad imia BR vinšujuć, potym možna — z Dniom abaroncaŭ Ajčyny, žanočym śviatam i h.d. pa kalendary. «Prošła viesna, nastało leto, spasibo partii za eto!».

Nahadaju: uviesnu — miascovyja vybary pa novym zakonie. Tracinu miescaŭ u kamisijach treba achviaravać partyjam i hramadskim arhanizacyjam. Tak što

hruziać z prycełam. Frukt — jabłyk, častka tvaru — nos, hramadskaja arhanizacyja — pravilna, lichtarat! — «Biełaja Ruś».

Zrešty, nakont vybaraŭ Łukašenka, jak prahučała na toj samaj pres-kanfierencyi, nie napružvajecca. Mašyna adładžana. Jahony vorah — ekanomika.

Maskva choć nienašmat, na 11%, ale ž zadrała canu na haz — da 168 dołaraŭ. Nu, a z naftaj pakul što zatyk. Pieramoŭščyki viartajucca z Maskvy ni z čym.

Pad zasłonu hoda rasijskija krynicy paviedamili, što delehacyja ź Minska nie mieła paŭnamoctvaŭ zhadžacca na varyjant Siečyna. Pamiatajecie: 5–6 miljonaŭ ton biazmytnaj nafty dla ŭnutranych patreb, za astatniaje ž budźcie łaskavyja adšpilić pa poŭnaj! Vidać, pieramoŭščykam było zahadana da apošniaha — kroŭ z nosu! — zmahacca za całkam biazmytnaje čornaje zołata.

U vyniku baki ŭvachodziać u 2010-y biez naftavaj damovy. Kreml demanstruje, što navažyŭsia pryčynić tutejšy naftavy afšor. Uvohule novy hod abiacaje pieryjadyčnaje badańnie z Maskvoj.

Z 1 studzienia pačynaje dziejničać razrekłamavany Adziny mytny taryf, ale ŭ tym Mytnym źviazie jašče koń nie valaŭsia. Łukašenka jaŭna niepakoicca z nahody niepapularnaha myta na aŭto. Buduć novyja bitvy, najpierš z Rasijaj, ci nie pa kožnaj z 632 adčuvalnych pazicyj, pad jakija Biełaruś zareziervavała pryncyp kansiensusu (ci, inačaj kažučy, prava vieta).

Na 2010 hod zaćvierdžany valuntarysckija płany. Jak nahnać toj VUP, adkul nabracca hrošaj na tyja zarobki — zdajecca, nie viedaje nichto, uklučna z hałoŭnym načalnikam. Nadzieja, jak zaŭsiody, na šancavańnie.

Tym časam puchnie śniežny kamiak pazyk. Praz paru hadoŭ budziem tolki kraktać, viartajučy asnoŭnuju masu kredytaŭ. Naprykład, hrafik pahašeńnia zapazyčanaści pierad MVF taki: 2009 hod — 22,9 młn. dołaraŭ, 2010 — 79,4 młn., 2011 — 83,5 młn., 2012 — 627 młn., 2013 — 1 695,5 młn., 2014 — 1 194 młn., 2015 — 83,4 młn. dołaraŭ. Jak vam dynamika? A heta ž nie adziny kredytor! I kredyt, musić, nie apošni.

Refarmavać ža ekanomiku treba nie tamu, što dziadźki z MVF zahadvajuć, a tamu, što inačaj kapiec. Tak što zajavy hałoŭnaha načalnika ŭ ałmazie viedaŭ: narod, maŭlaŭ, reformaŭ nie choča, a ja rablu, jak narodu padabajecca — nie bolej čym pieradvybarny papulizm. Daviadziecca rabić cieraz «nie chaču».

Pad vybary, kaniečnie, ekanomiku zhvałciać i sakralnyja $500 na brata, mahčyma, vycisnuć. Ale potym heta stanie vyłazić bokam. Dy i nie tolki ekanomika adhukniecca.

Niezdarma Łukašenka pryznaŭsia: jaho navahodniaja mara — viarnucca «ŭ dakryzisny pieryjad». Ale heta tolki mara. I kali nakont vybaraŭ niaźmienny kiraŭnik «nie napružvajecca» (chacia i tut nie kažy «hop!»), to

nastupnaja kadencyja abiacaje być vostrasiužetnaj i jak minimum nie takoj kiravanaj.

Alaksandr Kłaskoŭski.

P. S. A naftavy siužet tym časam abvastrajecca. Interfaks-Zachad siarod nočy cytuje blizkuju da biełaruskaha ŭradu krynicu, što skardzicca: u biełakamiennaj na našu delehacyju «rabiŭsia biesprecedentny cisk».

Reziumie: «Prapanavanyja rasijskim bokam padychody faktyčna tarpiedavali ŭsie damoŭlenaści pra stvareńnie Mytnaha źviazu». Jak i prahnazavałasia, Minsk pačynaje padviešvać novy prajekt.

Možna zrazumieć nieluboŭ Łukašenki da śviataŭ: Novy hod — novaja vajna.

• 0
• 0
• 0
• 0
• 0
• 0
• 0
• 0