Pradstaŭnik Charkaŭskaj abłasnoj prakuratury Dźmitryj Čubienka śćviardžaje, što abłomki adnoj z rakiet, jakija prylacieli ŭ Charkaŭ 2 studzienia, nie padobnyja na abłomki rakiet, jakija ŭžyvalisia Rasiejaj raniej, što moža pakazvać na jaje paŭnočnakarejskaje pachodžańnie.
Pra toje, što Paŭnočnaja Kareja pastaviła Rasiei niejkuju kolkaść balistyčnych rakiet, u čaćvier zajavili ŭrady ZŠA, Vialikabrytanii i Paŭdniovaj Karei. Kijeŭ praź niekatory čas paćvierdziŭ, što ŭ pieršyja dni studzienia Rasieja sapraŭdy ŭžyvała raniej nie znajomyja ŭkrainskaj armii rakiety.
Čubienka pakazaŭ žurnalistam abłomki rakiety i apisaŭ ich asablivaści tak: «Mietad vytvorčaści nie vielmi sučasny. Jość adchileńni ad standartnych rakiet «Iskander», jakija my raniej bačyli pry ŭdarach pa Charkavu. Hetaja rakieta padobnaja na adnu z paŭnočnakarejskich rakiet».
Pavodle jaho słoŭ, ad «Iskandera» jana adroźnivajecca krychu bolšym dyjamietram i formaj chvastavoj častki.
Čubienka taksama adznačyŭ, što raniej nie fiksavalisia vypadki, kab rasiejcy sprabavali schavać markiroŭku rakiet.
«Sproba zacierci numary na peŭnych detalach śviedčyć ab žadańni schavać infarmacyju ab hetaj rakiecie. Da taho ž pa ŭnutranym abstalavańni my bačym: nadpisy ŭnutry nie vielmi akuratnyja, zroblenyja ŭraznaboj. Zvyčajna ŭ takich rakietach, zroblenych i ŭ Savieckim Sajuzie, i ŭžo ŭ Rasiei, nadpisy vielmi akuratnyja, usio zroblena vielmi staranna, časam staviacca navat proźviščy rabotnikaŭ zavoda, kab ustalavać adkaznych — chto mienavita i što rabiŭ. Tut ža takoha niama. I tyja nadpisy, ličby, abrevijatury, jakija jość, jany raznatypnyja», — raspavioŭ Čubienka.
«Mienavita tamu my schilajemsia da viersii, što heta moža być rakieta, pastaŭlenaja Paŭnočnaj Karejaj», — dadaŭ čynoŭnik.
Ciapier čytajuć
Ajcišnik i były palitviazień Viktar Kuŭšynaŭ pradaje za 850 tysiač jeŭra dom u Partuhalii, jaki pabudavaŭ paŭtara hoda tamu FOTY14
Ajcišnik i były palitviazień Viktar Kuŭšynaŭ pradaje za 850 tysiač jeŭra dom u Partuhalii, jaki pabudavaŭ paŭtara hoda tamu FOTY
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary