Bild sabraŭ śviedčańni taho, jak ludzi ŭ 1924 hodzie ŭjaŭlali śviet praz 100 hadoŭ. Voś siem pradkazańniaŭ — pryčym niekatoryja ź ich na ździŭleńnie supali z realnaściu.
Paleantołah Edvard Fiorłonh z Kalifarnijskaha ŭniviersiteta šakiravaŭ usich svajoj idejaj ab tym, što da 2024 hoda koni zastanucca biez spravy. U svaim artykule ŭ haziecie Kansas City Post jon vykazaŭ mierkavańnie, što traktary i aŭtamabili zmohuć poŭnaściu zamianić ich u sielskaj haspadarcy, a koni buduć sustrakacca pieravažna ŭ zaaparkach.
Brytanski palityk Kinhśli Vud na zvanaj viačery ŭ 1924 hodzie zajaviŭ, što ŭ 2024 hodzie ludzi buduć žyć u siarednim nie mienš za 100 hadoŭ, a ŭ 75 hadoŭ jany buduć ličycca adnosna maładymi.
Inžynier Arčybald Łou jašče 100 hadoŭ tamu ŭ svajoj knizie «Biazdrotavyja mahčymaści» vykazaŭ zdahadku, što ŭ 2024 hodzie asnoŭnaja masa ludziej budzie pracavać z domu. «My zmožam vieści mnostva roznych vidaŭ biznesu, jakija raniej patrabavali fizičnaj prysutnaści», — pisaŭ jon.
Šviedski architektar Ben Bjorksan pradbačyŭ raźvićcio aŭtamabilebudavańnia i sprahnazavaŭ źjaŭleńnie ŭ vialikich haradach trochjarusnaj šašy i kanviejernych stužak, jakija pavinny byli zamianić tratuary.
Aŭtar haziety Olderman Newton sto hadoŭ tamu maryŭ pra toje, što ŭ 2024 hodzie dzieci buduć nasić aźbiestavyja kaściumy, jakija nie daviadziecca prać, a na ŭrokach anhlijskaj movy buduć słuchać pjesy Šekśpira, zapisanyja na hramafonnuju płaścinku.
Ńju-jorkski mahnat Džozef Dej sto hadoŭ tamu ličyŭ, što ŭ 2024 hodzie ŭsie buduć kožny dzień dabiracca na pracu z dapamohaj dyryžablaŭ i samalotaŭ.
Halivudski režysior Devid Hryfit kazaŭ u 1924 hodzie, što dziakujučy kino ludzi daviedajucca značna bolš pra inšyja kultury i im bolš nie treba budzie bajacca nieznajomcaŭ — tak filmy, na jaho dumku, pavinny byli skončyć z usimi vojnami.
Kamientary