U Homieli asudzili žančynu, jakaja vykłała ŭ tyktoku videa incydentu z supracoŭnikam DAI i svajoj dačkoj
U Homielskim abłasnym sudzie 8 śniežnia pavodle č. 1 art. 130 Kryminalnaha kodeksa (raspalvańnie inšaj sacyjalnaj varožaści) asudzili 40-hadovuju palitźniavolenuju Śniažanu Cadavu. Jaje sudzili za videa ŭ tyktoku incydentu na Łojeŭščynie, dzie jana kamientavała dziejańni supracoŭnika DAI, jaki aštrafavaŭ jaje dačku za adsutnaść flikiera.
Jak piša «Homielskaja viasna», sudździa Aleh Charoška pryznačyŭ žančynie šeść miesiacaŭ kałonii va ŭmovach ahulnaha režymu — ich jana ŭžo adbyła ŭ śledčym izalatary.
Incydent na Łojeŭščynie, u vyniku jakoha sudzili palitźniavolenuju, zdaryŭsia ŭ siaredzinie lipienia. Tady ŭ vioscy Byvalki pad Łojevam dziaŭčynu inśpiektar aštrafavaŭ za adsutnaść flikiera — jana išła pa abočynie. Jaje maci — Śniažana Cadava — źniała na kamieru dziejańni supracoŭnika DAI sa svaimi kamientarami i vykłała ŭ tyktoku.
Jak pisali va UUS Homielskaha abłvykankama, «pravaachoŭnik zaprasiŭ dziaŭčynu ŭ słužbovy aŭtamabil dla składańnia administracyjnaha pratakoła za pravaparušeńnie». U svaim videa maci kaža, što jaje dačku nie vypuskajuć z mašyny. Taksama supracoŭnik nie addavaŭ telefona adnoj ź siabrovak dziaŭčyny.
Pavodle viersii abvinavačvańnia, maci dziaŭčyny «ŭsialak sprabavała pieraškadžać viadzieńniu administracyjnaha pracesu, zdymała toje, što adbyvajecca, na telefon, emacyjna kamientujučy dziejańni supracoŭnika milicyi i dajučy acenku dziejańniam pravaachoŭnikaŭ u cełym».
U vyniku pry kancy žniŭnia supracoŭniki AMAPa zatrymali žančynu doma z užyvańniem siły. Da Cadavaj dadomu pryjechała śledča-apieratyŭnaja hrupa. Paśla raspačali kryminalnuju spravu ab raspalvańni varožaści abo varožaści ŭ dačynieńni da milicyi pavodle art. 130 Kryminalnaha kodeksa (raspalvańnie inšaj sacyjalnaj varožaści). Da suda jaje źmiaścili pad vartu ŭ SIZA.
Dziaržaŭnyja sacyjołahi: Biełarusy najpierš źviazvajuć svaju dziaržaŭnaść ź Vialikim Kniastvam Litoŭskim19
Kamientary