Kab abyhrać kamandu biełaruski Aleny Povyšavaj u «Što? Dzie? Kali?», daviałosia pajści na chitraść
Heta była apošniaja adboračnaja hulnia zimovaj sieryi maskoŭskaj pieradačy «Što? Dzie? Kali?». Jana prajšła ŭ minułuju niadzielu, 17 śniežnia.
Pierad hetym u papiarednich hulniach viadučy Barys Kruk niekalki razoŭ nahadvaŭ statystyku: amal za 50 hadoŭ pieradačy kamanda, što hulaje 17 śniežnia, zaŭsiody prajhraje. Jak budzie na hety raz?
U efiry ANT heta hulnia budzie pakazanaja 24 śniežnia, tamu, kali vy chočacie pahladzieć jaje, nie čytajcie hety tekst.
Minułuju adboračnuju hulniu, jakaja prajšła 10 śniežnia, vyjhrała kamanda Dzianisa Elkisa na rašajučym raŭndzie.
Kamandzie Aleny Povyšavaj, pieramožcy letniaj sieryi, kab vyjści ŭ finał zimovaj sieryi, taksama treba było nie tolki pieramahać, ale i zrabić heta na rašajučym raŭndzie.
Što takoje rašajučy raŭnd? Kamanda znatakoŭ pavinna nabrać piać bałaŭ i pakinuć za stałom adnaho čałavieka. Kali jon daje pravilny adkaz na pytańnie, to lik stanovicca 6:0 na karyść znatakoŭ, i kamanda vychodzić u finał. Kali adkaz niapravilny, to lik stanovicca 0:6 na karyść telehledačoŭ, i kamanda prapuskaje, jak minimum, viasnovuju i letniuju sieryju nastupnych hulniaŭ.
Kamanda Aleny Povyšavaj vielmi kiepska pačała hulniu, jana prajhravała 0:4, zmahła skaracić lik da 3:4, ich hałoŭnaja zorka Dźmitryj Aŭdziejenka daŭ na adno z pytańniaŭ daterminovy adkaz i tym samym zekanomiŭ lišniuju chvilinu. Potym dajšło da 5:5, i kamanda ŭziała rašajučy raŭnd.
Za stałom pakinuli Dźmitryja Aŭdziejenku. Vypaŭ kanviert, na jakim było napisana: Tałdykarhan (Kazachstan).
«Suprać vas hulaje miedsiastra Aksana Kisialova, horad Tałdykarhan, — skazaŭ viadučy. — Pytańnie źniata samim telehledačom».
«Niekalki hadoŭ tamu ŭ majho muža źjaviłasia niezvyčajnaje chobi. Adnym z nastupstvaŭ stała toje, što jon staŭ viešać hetyja partrety na ścianu. Potym hetaje chobi pieradałosia i mnie. Što heta za chobi?»
Dźmitryj Aŭdziejenka dumaŭ chvilinu, potym uziaŭ jašče adnu chvilinu. U vyniku adkazaŭ spačatku, što heta napeŭna viazańnie, zatym papraviŭsia i skazaŭ, što heta zaviazvańnie halštukaŭ, bo na partretach dvoje mužčyn z halštukami.
Adkaz ździviŭ i kalehaŭ Dźmitryja Aŭdziejenki pa stale, i prysutnych znatakoŭ ź inšych kamand u zale.
«Aksanie Kisialovaj, kab zadać pytańnie, pryjšłosia źviarnucca da chitraści, źmianić proźvišča na dziavočaje i ŭkazać nie miesca pražyvańnia, a miesca vučoby. Inakš by vy adhadali», — skazaŭ Barys Kruk.
Tut z-pad stała vynyrnuŭ viadomy telehladač Mikałaj Suščanka ź siała Karabułak (Tałdykarhanskaja vobłaść), viadomy svaimi kavierznymi pytańniami da znatakoŭ.
A źmieščanyja na ścianie partrety, heta ludzi, pra jakich zadavaŭ raniej pytańni Mikałaj Suščanka: Leanid Uciosaŭ, Ihar Kia i Juryj Aleša.
Jak vynik, 0:6, i ŭ finale zimovaj sieryi zhulaje kamanda Dzianisa Elkisa.
A kamanda Aleny Povyšavaj i inšyja znataki ŭ zale byli, miakka kažučy, ździŭlenyja.
***
Alena Povyšava skončyła ŭniviersitet u Minsku, ale z 2011 hoda žyvie ŭ Sankt-Pieciarburhu. U «Što? Dzie? Kali?» hulaje z 2012 hoda. Jaje muž — znatok Juryj Filipaŭ. U červieni Alena vyjhrała sa svajoj kamandaj letniuju sieryju i zavajavała «Kryštalnuju savu».
Taksama nahadajem, što častka hulcoŭ pakinuła kłub paśla poŭnamaštabnaha ŭvarvańnia Rasii va Ukrainu. Kaciaryna Mieraminskaja, jakaja pakinuła kłub, skazała ŭ intervju «Nastojaŝiemu vriemieni», što stanam na pačatak vosieni maskoŭski elitarny kłub pakinuli 12 čałaviek. Heta Alaksiej Samuloŭ, pryznany ŭ Rasii zamiežnym ahientam i abvieščany ŭ vyšuk Raŭšan Askieraŭ, Mikałaj Krapil, Dzianis Haliakbieraŭ, biełaruska Darja Sałaviej dy inš.
Kamientary