Navapołackaha deputata pakarali štrafam za niepadparadkavańnie milicyjantam i pjanuju jazdu. Ale z deputackaha kresła nie vyhnali
Byłoha načalnika navapołackaj milicyi i dziejnaha deputata Navapołackaha harsavieta Uładzimira Dubroŭskaha zatrymlivali ŭ žniŭni, kali jon niećviarozy jechaŭ z restarana i ledź nie ŭrezaŭsia ŭ budynak. Adnamu ź milicyjantaŭ jon parvaŭ formiennuju kašulu. «Naša Niva» pisała tady pra hety vypadak, a ciapier staŭ viadomy praciah historyi.
Deputata pryznali vinavatym pavodle art. 24.3 KaAP (niepadparadkavańnie zakonnym patrabavańniam supracoŭnika milicyi) i č.2 art. 18.15 ( kiravańnie transpartnym srodkam u niećviarozym stanie). Sud Navapołacka aštrafavaŭ jaho na 200 bazavych vieličyń (7 400 rubloŭ) i pazbaviŭ prava 5 hadoŭ zajmać pasady, źviazanyja z kiravańniem transpartam.
Pra pakarańnie byłoha milicejskaha kiraŭnika daviedaŭsia pravaabaronca Pavieł Levinaŭ: jon dasłaŭ zapyt u Navapołacki harsaviet, kab tam patłumačyli, nakolki sumiaščalnyja pavodziny Dubroŭskaha sa zvańniem deputata. Adkaz daviałosia čakać doŭha: staršynia haradskoha savieta deputataŭ Aleh Bujevič musiŭ vybačycca za «techničnyja prablemy ŭ elektronnaj sistemie zvarotaŭ».
U liście da Levinava jon pahadziŭsia, što «dadzieny ŭčynak źjaŭlajecca aburalnym», raspavioŭ pra vynik sudu nad Dubroŭskim i paviedamiŭ, što prezidyum Navapołackaha harsavieta na padstavie materyjałaŭ administracyjnaj spravy vynies deputatu «papiaredžańnie ab niedapuščalnaści padobnych pavodzinaŭ».
Pakarać Uładzimira Dubroŭskaha pazbaŭleńniem deputackaha statusu biełaruskaje zakanadaŭstva nie dazvalaje, bo jaho sudzili za administracyjnaje pravaparušeńnie, a nie za kryminalnaje złačynstva.
Tamu da jaho niemahčyma prymianić pałažeńnie artykuła №6 Zakona «Ab statusie deputata miascovaha Savieta» i daterminova spynić deputackija paŭnamoctvy, patłumačyŭ u liście Aleh Bujevič.
Na dumku pravaabaroncy Paŭła Levinava, taki padychod faktyčna raźviazvaje ruki deputatu:
«Toj samy artykuł zakona daje prava adazvać deputata rašeńniem miascovaha Savieta, ale ŭ Navapołacku im nie nie skarystalisia, patłumačyŭšy ŭsio nibyta niaznačnaściu zdareńnia, raz jaho razhladali ŭ miežach administracyjnaha prava. Takim čynam, deputatam faktyčna dazvolena chulihanić, debašyryć, abražać hramadzian, kali hetyja praviny nie pieravyšajuć normy administracyjnaj adkaznaści. Uładzimiru Dubroŭskamu ŭsiaho tolki «pakivali palčykam»: «Aj-jaj-jaj, jak niadobra». Pra toje, što narodny abrańnik — heta najlepšy z najlepšych, i jon musić być prykładam dla inšych, u Navapołackim harsaviecie zabylisia».
Deputacki status dazvoliŭ Uładzimiru Dubroŭskamu paźbiehnuć zatrymańnia navat niepasredna paśla pravaparušeńnia. Unočy z 4 na 5 žniŭnia jon jechaŭ napadpitku z połackaj restaracyi «Hrand Pab» i ledź nie ŭrezaŭsia ŭ budynak.
Kali na miesca zdareńnia prybyŭ narad DAI, Dubroŭski admoviŭsia sieści ŭ słužbovuju mašynu, akazaŭ supraciŭleńnie supracoŭnikam milicyi i adnamu ź ich parvaŭ formiennuju kašulu. Adnak pakolki jon źjaŭlajecca dziejnym deputatam Navapołackaha harsavieta, u adpaviednaści z zakanadaŭstvam jaho musili adpuścić, jak tolki vyśvietliłasia hetaja akaličnaść.
Kamientary