Navukoŭcy ŭpieršyniu adnavili RNK vymierłaj žyvioły. Jany spadziavajucca viarnuć u śviet stračanyja vidy
Hrupie daśledčykaŭ udałosia vyłučyć RNK viekavoj daŭniny z tyłacyna, taksama viadomaha jak tasmanski tyhr.
Apošni viadomy tyłacyn — samy bujny sumčaty drapiežnik apošnich časoŭ — pamior u tasmanijskim zaaparku Beaumaris u 1936 hodzie.
Ale niadaŭna hetaja žyvioła stała abjektam namahańniaŭ pa adnaŭleńni vymierłych vidaŭ, i ciapier hrupie daśledčykaŭ udałosia adnavić RNK istoty. Upieršyniu hetaja pracedura była ździejśnienaja dla žyvioły, jakaja vymierła.
Daśledčyki vyłučyli, siekvienavali (siekvienavańnie ŭjaŭlaje saboj vyznačeńnie aminakisłotnaj abo nukleatydnaj paśladoŭnaści) i praanalizavali RNK (rybanukleinavuju kisłatu) z prykładna 130-hadovaha ŭzoru tyłacyna (Thylacinus cynocephalus) u Stakholmskim muziei naturalnaj historyi. Daśledavańnie kamandy, jakoje apisvaje adnaŭleńnie i tłumačyć jaho karysnaść, było apublikavana ŭ Genome Research.
RNK — heta malekularnaja struktura, jakaja (jak i DNK) składajecca z nukleatydaŭ. RNK adnałancuhovaja, jana vykarystoŭvajecca ŭ sintezie białku i niasie hienietyčny materyjał u niekatorych virusach. U apošnim daśledavańni navukoŭcy identyfikavali RNK sa skury vysušanaha ŭzoru tyłacyna i tkanak škiletnych ciahlic, jakija kadujuć białki.
Tyłacyn — taksama zvany tasmanskim tyhram abo sumčatym vaŭkom — byŭ drapiežnaj sumčataj žyviołaj i endemikam Tasmanii (a ŭ bolš staražytnym minułym i Aŭstralii).
Jak heta vielmi časta byvaje, tasmanski tyhr najbolš paciarpieŭ ad ruk ludziej, kali ŭ kancy XIX i pačatku XX stahodździaŭ na jaho pačali praźmierna palavać paśla abvinavačvańniaŭ z boku tasmanijskaha ŭrada ŭ zabojstvach svojskaj žyvioły. Pa danych Nacyjanalnaha muzieja Aŭstralii, žyviołu taksama padšturchnuła da vymirańnia strata asiarodździa pražyvańnia i zaniesienyja zvonku na vostraŭ chvaroby.
Niadaŭna kampanija Colossal Biosciences, jakaja zajmajecca adnaŭleńniem vymierłych vidaŭ, zajaviła, što pasprabuje stvaryć proksi-vid tyłacyna i ŭvieści jaho ŭ lasy Tasmanii, jakija hety vid nasialaŭ stahodździe tamu.
Kampanija taksama zajaŭlaje, što płanuje stvaryć proksi-vidy šarścistaha mamanta i ptuški dado — znakavych vymierłych vidaŭ, jakija źnikli prykładna 4000 i kala 350 hadoŭ tamu adpaviedna.
Adnak, pa słovach daśledčykaŭ, jakich cytuje Gizmodo, adradžeńnie tasmanskaha tyhra nie było i nie jość hałoŭnaj metaj daśledavańnia, a jość tolki fonam dla daśledavańniaŭ RNK.
Kamanda spadziajecca, što ŭsie navukovyja raspracoŭki, nieabchodnyja dla ažyŭleńnia vymierłych vidaŭ, pryniasuć karyść navucy i hramadstvu ŭ cełym: ad technałohii redahavańnia hienaŭ da ekstrakarparalnaha apładnieńnia abo vyličalnych pryład, nieabchodnych dla analizu danych.
Čytajcie taksama:
Novy fieniks: navukoŭcy blizkija da taho, kab uvaskresić vymierły vid ptušak
200 ton kostak i płoci. Navukoŭcy znajšli kandydata ŭ samyja ciažkija žyvioły ŭ historyi Ziamli
Zubny kamień nieandertalcaŭ daŭ materyjał dla antybijotyku novaha pakaleńnia
Ciapier čytajuć
Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali12
Kamientary