«Za kožnaha padpisčyka — 50 rubloŭ». U Minsku nabirajuć pracaŭnikoŭ na «OnliFansServis». Što?
Na adnym ź biełaruskich sajtaŭ dla pošuku pracy źjaviłasia niezvyčajnaja vakansija — praca ŭ TAA «OnliFansServis» na pasadzie apieratara. Nazva arhanizacyi suhučnaja z OnlyFans — papularnaj płatformaj u asnoŭnym z darosłym kantentam.
U apisańni vakansii paznačana, što praduhledžvajecca addalenaja praca, zarobak — tysiača rubloŭ, možna nie mieć pracoŭnaha dośviedu. Praca apłočvajecca štodzień, hrafik hnutki, tak što mahčyma padabrać sabie zručny pracoŭny čas.
Siarod patrabavańniaŭ nazyvajuć pierš za ŭsio adkrytaść i tavaryskaje staŭleńnie da klijentaŭ, taksama važna mieć mocnyja kamunikacyjnyja navyki i być zdolnym vyrazna i zrazumieła tłumačyć składanyja techničnyja kancepcyi. Dla pracy ŭ TAA «OnliFansServis» taksama spatrebicca zachapleńnie technałohijami i žadańnie raźvivacca ŭ śfiery IT. Jość i ŭzrostavaje abmiežavańnie — treba być nie maładziejšym za 16 hadoŭ.
Abaviazkaŭ na takoj pracy tolki dva. Heta apracoŭka ŭvachodnych zapytaŭ ad klijentaŭ praz čaty, a taksama prapanova vysakajakasnaj techničnaj padtrymki karystalnikam, u tym liku adkazy na ich pytańni i vyrašeńnie mahčymych prablem.
Na pieršy pohlad, usio prazaična: nazvu «OnliFansServis» maje maładaja STA, jakaja adkryłasia ŭ pačatku viasny 2022-ha na vulicy Navavilenskaj u Minsku.
Akramia ŭłasna aŭtaservisnaj pracy, STA taksama padtrymlivaje aŭtaspartyŭnyja padziei ŭ Minsku.
Ale akazvajecca, što ŭ hetaj STA inšy telefonny numar, dyj na zapyt našaj čytački kampanija adkazała, što nijakaj vakansii apieratara ŭ ich ciapier niama, niechta prosta vykarystoŭvaje ich imia. Forma ŭłasnaści taksama inšaja — IP, a nie TAA.
Chto ž heta?
Źviazacca z arhanizacyjaj pa numary, paznačanym na sajcie, nie atrymajecca, bo takoha abanienta nie isnuje. Ale ž u vakansii jość spasyłka na zakryty telehram-čat, i tam paznačana, jakuju kankretna pracu musić rabić apieratar.
Zadača ŭ tym, kab zarehistravacca ŭ telehram-bocie dla znajomstvaŭ ad imia dziaŭčyny, vybrać horad Biełarusi, znajomicca z mužčynami i zaprašać ich padpisacca na biaspłatny Onlyfans (spasyłku abiacajuć dasłać u pryvat). Za kožnaha padpisanta abiacajuć vypłočvać pa 50 rubloŭ, za padpisku na čałavieka, jakoha vy pryviali na hetuju pracu, dastaniecca jašče 10 rubloŭ.
Hetaje pradpryjemstva prapanuje jašče adnu vakansiju apieratara, i ŭ joj jakraz trochi raskazvaje pra siabie. Voś hetaja cytata: «TAA «OnliFansServis» — lidar u piersanalizavanych anłajn-uražańniach. My stvarajem unikalny kantent, jaki pahružaje ŭ śviet ekskluziŭnych emocyj. Dałučajciesia da našaj kamandy prafiesijanałaŭ, kab razam raskryvać novyja hrani anłajn-zabavak i ŭvasablać samyja ambicyjnyja idei ŭ zachaplalny kantent».
Svojeasablivaje apisańnie pracy z servisam dla darosłych.
«Naša Niva» — bastyjon biełaruščyny
PADTRYMAĆ
Kamientary