U Smarhoni žančynie praz traŭmu ŭ cechu «Jeŭraopta» amputavali častku ruki. Jana padała ŭ sud i damahłasia kampiensacyi
U Smarhoni žančyna pracavała ŭ cechu «Jeŭraopta» i straciła častku pravaj ruki praź niaščasny vypadak na vytvorčaści. Jana padała ŭ sud na handlovuju sietku i vyjhrała spravu — joj pastanavili vypłacić kampiensacyju maralnaj škody ŭ pamiery 10 tysiač rubloŭ. Pra hetuju historyju raspaviadaje «Zierkało» sa spasyłkaj na rašeńnie suda Smarhonskaha rajona.
U krasaviku 2018 hoda žančyna ŭładkavałasia ŭ kramu «Jeŭraopt» kuchonnaj rabočaj, a potym pierajšła ŭ cech pa vytvorčaści paŭfabrykataŭ.
U lipieni 2022 hoda padčas pracy ŭ cechu supracoŭnica prachodziła mima ŭklučanaj istužačnaj piły dla raśpiłoŭvańnia miasa. U hety momant joj na nahu pavaliłasia kalaska sa śvinymi tušami, jakuju razhružaŭ inšy pracaŭnik. Ad udaru žančyna straciła raŭnavahu i ŭpała na piłu, paškodziŭšy ruku.
Sudmiedekśpiertyza vyznačyła atrymanyja joju traŭmy jak «mienš ciažkija cialesnyja paškodžańni pa prykmiecie značnaj stojkaj straty ahulnaj pracazdolnaści mienš čym na adnu tracinu».
Dyrektar filijała TAA «Jeŭrahandal» u Hrodnie praz dva tydni padpisaŭ akt ab niaščasnym vypadku na vytvorčaści: jaho pryčynaj była nazvanaja techničnaja niaspraŭnaść istužačnaj piły z-za adsutnaści aharodžy, a asobaj, jakaja dapuściła parušeńni pracoŭnaha zakanadaŭstva, pryznany abvalščyk miasa.
U Śledčym kamitecie praviali pravierku pa fakcie pryčynieńnia cialesnych paškodžańniaŭ na vytvorčaści, ale ŭ vyniku admovilisia raspačać kryminalnuju spravu, spasłaŭšysia na adsutnaść składu złačynstva.
Tady paciarpiełaja padała pazoŭ u sud suprać TAA «Jeŭrahandal» z patrabavańniem vypłacić joj hrašovuju kampiensacyju maralnaj škody ŭ pamiery 10 000 rubloŭ.
«U suviazi z atrymanymi traŭmami pazoŭnicy byli pryčynienyja fizičnyja i maralnyja pakuty», — adznačajecca ŭ pastanovie suda.
Jana patłumačyła, što doŭhi čas pakutavała ad bolu i była vymušanaja prymać mocnyja abiazbolvalnyja preparaty. U balnicach Smarhoni i Minska žančynie zrabili try apieracyi pa vydaleńni častki fałanh palcaŭ pravaj ruki, paśla hetaha jana nie moža pracavać pa haspadarcy.
Pradstaŭnik «Jeŭrahandlu», choć i častkova pryznaŭ iskavyja patrabavańni, vypłačvać poŭnuju sumu kampiensacyi nie pahadziŭsia. Adnak sud usio ž zaniaŭ bok paciarpiełaj žančyny, pastanaviŭšy pakryć joj škodu ŭ 10 000 rubloŭ i vydatki pa apłacie jurydyčnaj dapamohi na sumu 550 rubloŭ, a taksama zapłacić dziaržpošlinu ŭ pamiery 111 rubloŭ.
Rytejler nie staŭ apratestoŭvać rašeńnie suda i vykanaŭ patrabavańni.
Kamientary
chiba što ŭ niabiosny