U Partuhalii i Ispanii bušujuć lasnyja pažary. Na Pireniei pryjšła treciaja za leta chvala anamalnaj śpioki

Ekstrannyja słužby Ispanii i Partuhalii praciahvajuć zmahacca ź lasnymi pažarami, jakija achapili tysiačy hiektaraŭ. Na Pireniejski paŭvostraŭ pryjšła novaja chvala haračaha nadvorja, jakaja spryjaje raspaŭsiudžvańniu pažaraŭ, piša Bi-bi-si.

Pavodle danych Nacyjanalnaha ŭpraŭleńnia hramadzianskaj abarony Partuhalii, u centralnaj i paŭdniovaj častkach krainy na baraćbu z ahniom byli kinutyja tysiača pažarnych i 12 samalotaŭ.

Lasny pažar, ź jakim zmahajecca bolš za 800 pažarnych, pačaŭsia ŭ subotu ŭ municypalitecie Ademira ŭ rehijonie Alentežu, ale zatym raspaŭsiudziŭsia na poŭdzień, u bok Ałharve, adnaho z hałoŭnych turystyčnych napramkaŭ Partuhalii.

Vysokaja tempieratura i mocny viecier uskładniajuć baraćbu z ahniom, jaki źniščyŭ kala siami tysiač hiektaraŭ lesu. Uviečary ŭ paniadziełak nieba ŭ Ademiry paciamnieła i ŭ pavietra padniałosia vielizarnaje vobłaka dymu. Mer horada Ademira Chiełder Hierejra nazvaŭ situacyju krytyčnaj.

Ź mierkavańniaŭ zaściarohi byli evakujavanyja 19 nievialikich viosak, čatyry turystyčnyja bazy i kiempinh. Niekalki daroh byli pierakrytyja, uklučajučy častki trasy A-1 pamiž Lisabonam i Portu.

Mnohija navukoŭcy źviazvajuć lasnyja pažary z klimatyčnymi źmienami, uzmocnienymi za košt dziejnaści čałavieka. I choć maštab pažaraŭ u Ispanii i Partuhalii hetym letam u cełym nižejšy za siarednija šmathadovyja značeńni, kampjutarnyja madeli pakazvajuć, što ŭ budučyni častata ŭźniknieńnia chval śpiakoty, imavierna, budzie pavialičvacca. Adpaviedna, biez pryniaćcia mier abarony, budzie pavyšacca i ryzyka ŭźniknieńnia pryrodnych pažaraŭ.

Pavodle acenak navukoŭcaŭ, z pačatku industryjalnaj epochi siarednija tempieratury na ziamli vyraśli prykładna na 1,1°C i praciahnuć raści ŭ ahladnaj budučyni.

Na hetym tydni na bolšaj častcy Pireniejskaha paŭvostrava čakajecca temperatura vyšejšaja za 40°C.

U paniadziełak mieteastancyja ŭ horadzie Santaren zafiksavała samuju vysokuju tempieraturu ŭ hetym hodzie — 46,4°C.

U paniadziełak partuhalskaje mietearałahičnaje ahienctva IPMA abviaściła ŭ šaści rajonach krainy, uklučajučy Lisabon, «čyrvonuju tryvohu» ŭ suviazi z nabližeńniem novaj chvali śpioki.

Ułady abviaścili bolš za 120 municypalitetaŭ Partuhalii źmieščanymi ŭ zonie maksimalnaj ryzyki lasnych pažaraŭ.

U paniadziełak u Ispanii try lasnyja pažary, jakija za vychadnyja vypalili bolš za 1000 hiektaraŭ ziamli, udałosia ŭziać pad kantrol, ale ŭ mnohich abłaściach krainy pa-raniejšamu horača: Ispaniju nakryła ŭžo treciaja za leta chvala anamalnaj śpiakoty.

Pa danych ispanskaha mietearałahičnaha ahienctva Aemet, u paŭdniovaj Andałusii, centralnaj Kastylii-Ła-Mančy i Estremadury na zachadzie krainy abvieščany aranžavy ŭzrovień niebiaśpieki, bo čakajecca, što tempieratura pavietra na hetym tydni dasiahnie ŭ asobnych miescach 43°C.

Pažar, jaki ŭźnik u niadzielu prykładna za 10 km ad ispanskaha prybiarežnaha horada Kadys, papularnaha siarod turystaŭ miesca adpačynku na bierazie Atłantyčnaha akijana, byŭ łakalizavany da poŭnačy, paviedamiła pažarnaja słužba Infoca.

Inšy pažar, jaki taksama znachodzicca pad kantrolem, u subotu i niadzielu achapiŭ kala 450 ha ŭ rajonie paŭdniova-zachodniaha horada Uelva.

U paniadziełak pradstaŭniki pažarnaj achovy Katałonii paviedamili, što pažar u rehijonie ŭžo ŭziaty pad kantrol, choć na miescy pažaru, dzie, pa słovach pradstaŭnikoŭ lasnoj haspadarki, haryć kala 600 hiektaraŭ, pa-raniejšamu znachodzicca kala 30 pažarnych padraździaleńniaŭ.

Katałonija i Andałusija — dva rehijony, jakija najbolš časta pakutujuć ad zasuchi, što stvaraje ŭmovy dla ŭźniknieńnia pažaraŭ.

Pa danych Jeŭrapiejskaj sistemy infarmacyi ab lasnych pažarach Effis, z pačatku hoda ŭ Ispanii zhareła bolš za 70 tysiač hiektaraŭ lesu. Absalutny rekord byŭ pastaŭleny letaś, kali pažary vypalili bolš za 300 tysiač hiektaraŭ ziamli.

• 0
• 0
• 0
• 0
• 1
• 3
• 1
• 0