«Mama, u nas niama doma!» 12-hadovy chłopčyk cudam acaleŭ paśla rakietnaha abstrełu na Kijeŭščynie
16 červienia Rasija atakavała 10 abłaściej Ukrainy. U vyniku padzieńnia abłomkaŭ varožych rakiet byŭ razburany pryvatny dom na Kijeŭščynie.
U domie znachodziŭsia 12-hadovy chłopčyk, jaki zmoh vyratavacca, schavaŭšysia ŭ padvale. «Ukrainskaja praŭda» pahutaryła z mamaj padletka Viktoryjaj Suško i chłopčykam Ramanam, jakija raspaviali, jak usio adbyvałasia ŭ toj dzień.
Zdareńnie adbyłosia ŭ Vyšharadskim rajonie, u pryvatnym domie pryharada Kijeva.
«Moj 12-hadovy syn Raman zastaŭsia doma adzin. I ja, i maja mama źjechali na pracu. Jon prasiŭsia sa mnoj, ale ja nie nadała hetamu značeńnia. Kala 11 hadzin pačałasia pavietranaja tryvoha. Syn pačaŭ pisać paviedamleńni, što doma «hučna» i jamu strašna», — raspaviała Viktoryja Suško.
Kali žančyna pačała čytać naviny, to ŭbačyła infarmacyju, što «Kalibry» laciać z boku Čarkaskaj vobłaści.
Syna ŭžo supakojvała, maŭlaŭ, «heta ž nie z našaha boku, usio budzie dobra».
Raman praciahvaŭ pisać mamie i prasiŭ nie jechać dadomu, bo było «hučna». Sam ža schavaŭsia ŭ padvale.
U 11:58 Viktoryja pračytała paviedamleńnie ad syna, što ŭ ich dom «patrapiła». «Mama, u nas niama doma!» — napisaŭ chłopčyk.
«Raman dasłaŭ fota, jany byli nievyraznymi, tamu ja padumała, što ničoha surjoznaha nie zdaryłasia. Zdavałasia, što dzicia fantaziruje. Potym syn užo telefanavaŭ u isterycy, pytaŭsia, dzie ja, kazaŭ, što jamu vielmi strašna. Kali ja pryjechała, to ŭsio ŭbačyła na ŭłasnyja vočy», — uspaminaje žančyna.
Pa słovach žančyny, ad doma zastalisia tolki ścieny i acaleła trochi mebli. Paškodžany taksama chleŭ i haraž z aŭtamabilem.
Ramana z-pad zavałaŭ doma vyciahnuli susiedzi. Jon znachodziŭsia ŭ padvale pad domam.
«Mianie z-pad zavałaŭ vyciahnuŭ dziadźka. Dumaŭ, što ŭ dom trapiła sama rakieta, bo było vielmi hučna. Ciapier adčuvaju siabie niadrenna. Kali heta adbyłosia było strašna, ale ja nie zusim razumieŭ, što adbyvajecca. Hierojem siabie ja nie adčuvaju», — kaža Raman.
Viktoryja taksama raspaviała, što syn ciapier fizična adčuvaje siabie narmalna, ale jana razumieje, što z časam mohuć uźniknuć psichałahičnyja prablemy.
Heta ŭžo nie pieršy prylot u dom Suško za pieryjad poŭnamaštabnaha ŭvarvańnia. Viktoryja raspaviadaje, što papiaredni raz abyšłosia biez surjoznych razbureńniaŭ, vylecieła tolki dźvie šyby, adnak jaje syn mieŭ prablemy sa zdaroŭjem.
Pa słovach Viktoryi Suško, psichijatr, u jakoha jany prachodzili lačeńnie, raiŭ źmianić miesca žycharstva.
«Raman vielmi časta prasiŭ mianie spuskacca ŭ padvał padčas pavietranych tryvoh. Ja ŭvieś čas jaho supakojvała, kazała, što ŭsio budzie dobra. Ciapier razumieju, što jaho aściarohi nie byli marnymi», — dadała žančyna.
Palicyja dała zaklučeńnie paciarpiełaj siamji, što ich dom nie prydatny dla žyćcia, tamu Viktoryja z Ramanam i babulaj časova spynilisia ŭ siabroŭ.
Sa słoŭ žančyny, jaje susiedzi taksama paciarpieli, paškodžana try pryvatnyja damy. Viktoryja prosić ab dapamozie z adnaŭleńniem žylla.
Ciapier čytajuć
Łukašenka zajaviŭ pra hatoŭnaść pryjechać u Kijeŭ94
Kamientary